Eaha to roto?

Faaueraa no te putuputuraa Oraraa e taviniraa Kerisetiano

Faaueraa no te putuputuraa Oraraa e taviniraa Kerisetiano

Tapura tumu parau

1. E tupu te putuputuraa Oraraa e taviniraa Kerisetiano ia au i te porotarama itehia i roto i te Faaineineraa no te putuputuraa Oraraa e taviniraa Kerisetiano. Oia atoa ia au i to muri nei mau faaueraa. A parau i te feia poro atoa ia horoa iho â i ta ratou mau vauvauraa. E nehenehe te feia e apiti tamau nei i te amuiraa e vauvau atoa mai, mai te peu te farii ra ratou i te mau haapiiraa Bibilia e te ora ra ratou ia au i te mau faaueraa tumu Kerisetiano.—be-F api 282.

PARAU OMUARAA

 2. Hoê minuti. I te hebedoma taitahi, e haamata te putuputuraa Oraraa e taviniraa na roto i te hoê reo himene e te pure. I muri iho, e faatupu te peretiteni i te anaanatae o te feia e faaroo ra ma te faaite eaha te hi‘opoahia i te roaraa o te putuputuraa. E titauhia i te peretiteni ia haafaufaa i te mau mana‘o e faufaa-rahi-hia ’i te amuiraa.

TAO‘A RAU BIBILIA

  3. Oreroraa parau: Ahuru minuti. E itehia te tumu parau e e piti aore ra toru mana‘o faufaa i roto i te Faaineineraa no te putuputuraa Oraraa e taviniraa. Na te hoê matahiapo aore ra tavini  tauturu aravihi e rave mai i te reira. Ia hi‘opoahia te hoê buka Bibilia apî i te taioraa Bibilia o te hebedoma, a pata i te video no nia i tera buka Bibilia. E haamahiti te taeae orero i te mau haapiiraa o te video o te tuati ra i te tumu parau. Ia hi‘opoa oia i te mau mana‘o o te tumu parau e vai ra i roto i te faaineineraa no te putuputuraa. Ia taimehia, e mea titau-atoa-hia ia faaohipa i te mau hoho‘a e te mau mana‘o Bibilia no te mea e haapapu atu â te reira i te tumu parau.

 4. A maimi i te mau poe pae varua: Ahuru minuti. Na te hoê matahiapo aore ra tavini tauturu aravihi e rave i te reira ma te uiraa e te pahonoraa. Aita e parau omuaraa aore ra parau hopea. Ia faataa oia i te taime tano no na uiraa e toru ia au i te hinaaro o te amuiraa. Tera râ, e mea tia ia ui oia i te mau uiraa atoa. Hau atu â, na te taeae orero e faaoti e taiohia anei te mau irava Bibilia atoa o na uiraa matamua e piti. E titauhia i te feia pahono ia ore e mairi 30 tetoni.

  5. Taioraa Bibilia: Maha minuti aore ra iti a‘e. Na te hoê taeae e rave mai i teie tuhaa. E titauhia i te piahi ia taio i te tuhaa faataahia ma te ore e faahiti i te hoê parau omuaraa e hopea. E horoa te peretiteni o te putuputuraa i te a‘oraa no te tauturu iho â i te piahi ia taio ma te tano, te maramarama, te maumau ore e ma te au. To ’na atoa huru a taio ai i te mau ta‘o faufaa, a tauiui ai te toparaa reo e a faafaaea ’i. I te mea e mea poto a‘e aore ra mea roa a‘e te tahi mau taioraa Bibilia, e titauhia i te tiaau o te putuputuraa Oraraa e taviniraa ia feruri o vai te nehenehe e rave i taua mau taioraa ra.

A RAVE MAITE I TA OE TAVINIRAA

 6. Ahuru ma pae minuti aore ra iti a‘e. Maoti teie tuhaa o te putuputuraa, e ineine te taatoaraa no te taviniraa e e maitai atu â ta ratou huru pororaa e huru haapiiraa. E niu te piahi i te farereiraa matamua e te farerei-faahou-raa i nia i te hi‘oraa no te aparauraa i te api 1 o te Faaineineraa no te putuputuraa Oraraa e taviniraa. Na te taata poro e faaoti e faaohipa anei oia i te hoê papai aore ra video no roto mai i ta tatou mauhaa no te taviniraa. No te tauturu ia tatou i roto i te taviniraa, e itehia i roto i te mau hi‘oraa no te aparauraa te tuhaa “Irava no ǒ mai i te mauhaa no te taviniraa.” Na te piahi taitahi e faaoti e faaohipa anei oia i taua tuhaa ra i roto i ta ’na tumu parau. E faaite te Faaineineraa no te putuputuraa Oraraa e taviniraa i te taime faataahia no te tumu parau taitahi. I te tahi taime, e horoahia te mau faaueraa hau. Eita e titauhia i te mau piahi ia faaohipa i te mana‘o hau no te faatia i te taime faataahia no te tumu parau. E nehenehe te tahi mau vauvauraa faaineine-maitai-hia e oti hoê minuti aore ra hau atu, hou te taime faataahia. Ia titauhia, e horoa-atoa-hia tera mau tumu parau i te mau matahiapo.

 7. Video Hi‘oraa no te aparauraa: E patahia e e aparauhia i nia i te mau video o te faaite ra i te mau hi‘oraa no te aparauraa i te ava‘e taitahi. E faaite tera mau video i te farereiraa matamua e te mau farerei-faahou-raa. Na te peretiteni o te putuputuraa Oraraa e taviniraa e rave mai i teie tumu parau.

 8. Farereiraa matamua: Na te hoê taeae aore ra tuahine e rave mai i te reira. Mai te peu e e tane te vauvau mai, e tane atoa te taata e apiti ia ’na. Hoê â huru no te mau vahine. Tera râ, e nehenehe hoê tane raua hoê vahine e horoa i tera vauvauraa mai te peu e e fetii raua. E nehenehe raua e parahi aore ra e tia noa. E titauhia i te piahi ia aroha i te taata ia au i tei matauhia i roto i te tuhaa fenua. E faaohipahia te hi‘oraa no te aparauraa i roto i te Faaineineraa no te putuputuraa Oraraa e taviniraa ei niu no tera vauvauraa.

 9. Farerei-faahou-raa: Na te hoê taeae aore ra tuahine e rave mai i te reira. Mai te peu e e tane te vauvau mai, e tane atoa ïa te taata e apiti ia ’na. Hoê â huru no te mau vahine. (km 5/97 api 2) E nehenehe raua e parahi aore ra e tia noa. E faaite te taata poro eaha te parau a ho‘i ai e farerei i te taata tei faaite i te anaanatae. E faaohipahia te hi‘oraa no te aparauraa o te Faaineineraa no te putuputuraa Oraraa e taviniraa ei niu no tera vauvauraa.

 10. Haapiiraa Bibilia: Na te hoê taeae aore ra tuahine e rave mai i te reira. Mai te peu e e tane te vauvau mai, e tane atoa ïa te taata e apiti ia ’na. Hoê â huru no te mau vahine. (km 5/97 api 2)  E nehenehe raua e parahi aore ra e tia noa. I roto i tera vauvauraa, e faaitehia hoê tuhaa o te tahi haapiiraa Bibilia tei haamatahia. Aita e faufaa ia faaineine mai i te parau omuaraa aore ra parau hopea. E na reira râ te piahi mai te peu e tera te haapiiraa ta ’na e tia ia ohipa mai. A vauvau ai, aita e titauhia ia taio ma te reo puai i te mau paratarafa atoa faataahia, noa ’tu e nehenehe e na reira. Ia ite-maitai-hia e nafea ia haapii atu ma te aravihi.

 11. Oreroraa parau: Na te hoê taeae e rave mai i te reira. E vauvauhia te reira mai te hoê oreroraa parau i mua i te amuiraa.

ORARAA KERISETIANO

 12. I muri a‘e i te hoê reo himene, ua faataahia 15 minuti no te tauturu i te taatoaraa ia faaohipa i te Parau a te Atua na roto hoê aore ra piti tuhaa. Mai te peu e aita i faaite-a‘ena-hia, na te hoê matahiapo aore ra tavini tauturu aravihi e rave mai i tera na tuhaa. Na te hoê matahiapo râ e rave mai i te hinaaro o te amuiraa.

  13. Haapiiraa Bibilia a te amuiraa: Toru ahuru minuti aore ra iti a‘e. Na te hoê matahiapo aravihi e rave mai i te reira. (Mai te peu aita e rave rahi matahiapo i roto i te amuiraa, e nehenehe e faaohipa i te mau tavini tauturu aravihi ia titauhia.) Na te tino matahiapo e haapapu o vai te mea aravihi no te faatere i te Haapiiraa Bibilia a te amuiraa. E maitihia te hoê taeae mea papu to ’na huru faatereraa i te Haapiiraa: e faatere oia i te reira i roto i te taime faataahia, e haapapu oia i te mau irava Bibilia faufaa e e tauturu oia i te taatoaraa ia huti i te haapiiraa. E itehia te mau a‘oraa maitai i roto i te mau aratairaa piahia no nia i te huru faatereraa i te haapiiraa o Te Pare Tiairaa. Ia hi‘opoa-maite-hia te mau mana‘o atoa o te tuhaa faataahia no te hebedoma, aita e faufaa ia haamaoro i te haapiiraa. Ia nehenehe, e tauihia te taeae faatere e te taeae taio i te hebedoma taitahi. Mai te peu e e faaite te peretiteni o te putuputuraa Oraraa e taviniraa ia haapoto mai i te haapiiraa, na te taeae faatere e faaoti e nafea oia e haapoto ai i te reira. E faaoti paha oia ia ore e taio mai i te tahi mau paratarafa.

PARAU HOPEA

  14. Toru minuti aore ra iti a‘e. E haamana‘o te peretiteni o te putuputuraa Oraraa e taviniraa i te mau mana‘o tauturu o te putuputuraa. E faahiti atoa oia i te hi‘opoahia i te hebedoma i mua, mai te tahi uiraa o te pahonohia. Ia taimehia, e nehenehe oia e haamana‘o i te i‘oa o te mau piahi o te putuputuraa o te hebedoma i mua. Mai te peu aita i faaite-a‘ena-hia, e nehenehe te peretiteni e horoa i te tahi mau faaararaa faufaa i roto i ta ’na mau parau hopea aore ra taio i te tahi mau rata faufaa i te amuiraa. Eiaha râ e faaite atu i te mau ohipa matauhia e te amuiraa mai te faanahoraa o te pororaa e te porotarama tamâraa. E piahia tera mau mana‘o i nia i te iri haamaramaramaraa. Ia titauhia hau atu â taime no tera mau faaararaa e rata, e ani te peretiteni i te mau taeae o te rave mai i te tuhaa Oraraa Kerisetiano ia haapoto i ta ratou tumu parau. (A hi‘o i te mau  paratarafa 13 e te  17.) E oti te putuputuraa na roto i te hoê reo himene e te pure.

A HAAMATARO I TE TAIO E TE HAAPII ATU

 15. E titauhia ia afai mai te piahi taitahi i te buka rairai Haapii atu, i nia i te papie aore ra i roto i te roro uira, no te putuputuraa Oraraa e taviniraa. E titauhia i te peretiteni o te putuputuraa Oraraa e taviniraa ia faaohipa i te buka rairai ei niu no te haapopou e no te horoa i te a‘oraa. E titauhia i te piahi taitahi ia faaohipa i te haapiiraa e vai ra i roto i te mau paruru, i pihai iho i te tumu parau papaihia i roto i te Faaineineraa no te putuputuraa Oraraa e taviniraa. Na te piahi e faaohipa i te tuhaa “A tapao ua haere oe i mua” o te buka rairai, e ere na te peretiteni.

A‘ORAA

  16. I muri iho i te vauvauraa taitahi, e rave te peretiteni o te putuputuraa Oraraa e taviniraa hoê minuti no te haapopou e no te horoa i te mau a‘oraa niuhia i nia i te buka rairai Haapii atu. Ia titau te peretiteni i te piahi no ta ’na vauvauraa, eita oia e faahiti i te haapiiraa a te piahi. I muri a‘e râ i te vauvauraa e te tahi mau parau haapopou, e nehenehe te peretiteni e faaite i te haapiiraa  ta te piahi i ohipa mai e no te aha ua ohipa maitai oia i te reira. Ia titauhia, e parau oia ma te mǎrû no te aha e ohipa faahou â oia i te reira. E faahiti atu paha te peretiteni i te tahi atu mau tuhaa o te vauvauraa mai te peu e e tauturu te reira i te piahi aore ra i te feia e faaroo ra. E horoahia ’tu te tahi atu mau a‘oraa maitatai niuhia i nia i te buka rairai Haapii atu aore ra te buka École du ministère ia oti te putuputuraa aore ra i te tahi atu taime o raua ana‘e. No nia iho â râ i te haapiiraa tei titauhia ia ’na ia ohipa.—A hi‘o i te mau  paratarafa 17,  22 24 no te ite atu â no nia i te hopoia a te peretiteni o te putuputuraa Oraraa e taviniraa e a te taeae a‘o tauturu.

TAIME

     17. Eiaha te vauvauraa a te piahi taitahi e te a‘oraa a te peretiteni o te putuputuraa Oraraa e taviniraa ia mairi i te taime faataahia. Ia ore te reira e haapaohia, e mea tia ia tâpû i te vauvauraa ma te tura. Ia mairi te tahi taeae i te taime faataahia no te tahi atu tuhaa o te putuputuraa, na te taeae a‘o tauturu e haere e hi‘o i tera taeae no te horoa i te a‘oraa o raua ana‘e. (A hi‘o i te  paratarafa 24.) E tupu te putuputuraa taatoa, oia atoa te mau himene e pure, 1 hora e 45 minuti i te maoro.

TERE O TE TIAAU HAAATI

 18. E faanahohia te porotarama ia au i tei papaihia i roto i te Faaineineraa no te putuputuraa Oraraa e taviniraa. A haapao maitai râ: e monohia te Haapiiraa Bibilia a te amuiraa o te tuhaa Oraraa Kerisetiano e te oreroraa parau taviniraa a te tiaau haaati. Hou tera oreroraa parau e 30 minuti i te maoro, e haamana‘o poto te peretiteni i te porotarama o te putuputuraa Oraraa e taviniraa o te hebedoma, e faaite oia i to te hebedoma i mua e i te mau faaararaa faufaa e e taio oia i te mau rata faufaa. I muri iho, e titau oia i te tiaau haaati. Ia oti ta ’na oreroraa parau, na te tiaau haaati e faaoti i te putuputuraa na roto i te reo himene ta ’na i maiti. E nehenehe oia e ani i te tahi atu taeae ia faaoti i te pure. I te hebedoma e tere ai te tiaau haaati, aita e piha hau i roto i te reo o te amuiraa. Mai te peu râ e pǔpǔ to te amuiraa, e faatupu te pǔpǔ i ta ’na iho putuputuraa i roto i te piha faataahia. E ho‘i râ ratou i te piha matamua ia vauvau mai te tiaau haaati i ta ’na oreroraa parau taviniraa.

TE HEBEDOMA O TE TAIRURURAA HAAATI AORE RA TE TAIRURURAA E TORU MAHANA

 19. Aita e putuputuraa. E hi‘opoa te taata taitahi aore ra te utuafare taitahi i te mau tumu parau o te putuputuraa o te hebedoma i ǒ ratou.

TE HEBEDOMA O TE OROA HAAMANA‘ORAA

 20. Mai te peu e tupu te Oroa haamana‘oraa i te hoê mahana o te hebedoma, aita e putuputuraa Oraraa e taviniraa. Papu maitai râ e ravehia te mau putuputuraa no te pororaa i te mahana o te Oroa haamana‘oraa.

TE TIAAU O TE PUTUPUTURAA ORARAA E TAVINIRAA

 21. Na te tino matahiapo e maiti i te hoê matahiapo no te amo i tera hopoia. E haapao oia e ua faanaho-maitai-hia tera putuputuraa e ua ravehia te reira ia au i teie mau faaueraa. E tauaparau pinepine atoa oia e te taeae a‘o tauturu. Ia piahia te Faaineineraa no te putuputuraa Oraraa e taviniraa, e maiti te tiaau o te putuputuraa o vai te hi‘opoa i te tumu parau taitahi i taua ava‘e ra. (A hi‘o i te  paratarafa 5-11.) E faaarahia te piahi no ta ’na tumu parau toru hebedoma na mua ’tu i te mahana o te vauvauraa maoti te api parau Vauvauraa no te putuputuraa Oraraa e taviniraa Kerisetiano (S-89).

TE PERETITENI O TE PUTUPUTURAA ORARAA E TAVINIRAA

  22. I te hebedoma taitahi, e maitihia hoê matahiapo no te amo i tera hopoia. (Mai te peu aita e rave rahi matahiapo i roto i te amuiraa, e nehenehe e faaohipa i te mau tavini tauturu aravihi ia titauhia.) Na ’na e faaineine i te mau parau omuaraa e hopea. Oia atoa i te mau aparauraa atoa i nia i te mau video Hi‘oraa no te aparauraa e te mau video i nia i te hoê haapiiraa apî no roto mai i te buka rairai Haapii atu. Na ’na e titau i te taeae e tuahine taitahi no ta ratou vauvauraa.  Ia au i te rahi o te tino matahiapo, e vauvau atoa paha te peretiteni i te tahi atu mau tumu parau o te putuputuraa. E mau parau poto noa ta ’na e faahiti a titau ai oia i te taeae orero taitahi. Na te tino matahiapo e maiti i te mau matahiapo aravihi no te hopoia peretiteni o te putuputuraa. E tauiui-tamau-hia te matahiapo o te haapao i tera tuhaa. Ia au i te tupuraa o te amuiraa, e faaohipa-pinepine-a‘e-hia te tiaau o te putuputuraa ei peretiteni. Mai te peu e e mea aravihi te hoê matahiapo no te faatere i te Haapiiraa Bibilia a te amuiraa, e mea aravihi atoa ïa oia no te tavini ei peretiteni o te putuputuraa. A haamana‘o na e titauhia i te peretiteni ia horoa i te mau haapopouraa e a‘oraa î i te here no te tauturu i te mau piahi. E haapao atoa oia ia oti te putuputuraa i te taime faataahia. (A hi‘o i te mau  paratarafa 14 17.) Ia hinaaro te peretiteni e ia nehenehe, e tuuhia paha te tahi atu tao‘a haapuai reo i nia i te tahua i reira te peretiteni e faaite ai i te tumu parau taitahi a haere mai ai te taeae orero i mua no ta ’na vauvauraa. E hinaaro atoa paha te peretiteni e parahi i te airaa maa i nia i te tahua a vauvau ai te piahi i te taioraa Bibilia e i te roaraa o te tuhaa A rave maite i ta oe taviniraa. E faaohipa-maitai-hia ïa te taime.

TE TIAAU O TE TINO MATAHIAPO

 23. Na ’na aore ra na te hoê matahiapo o te tauturu ia ’na e faaoti o vai te vauvau i te mau tuhaa atoa o te putuputuraa, eiaha râ te vauvauraa a te piahi. Na ’na e faaoti o vai te peretiteni o te putuputuraa i te hebedoma taitahi i rotopu i te mau taeae tei maiti-a‘ena-hia e te tino matahiapo. Na raua te tiaau o te putuputuraa Oraraa e taviniraa e haapao e ua piahia anei te porotarama i nia i te iri piaraa o te amuiraa.

TE TAEAE A‘O TAUTURU

   24. Ia nehenehe, mea maitai ia faaohipa i te hoê matahiapo e taeae orero aravihi oia no te amo i tera hopoia. Ia hinaarohia, e horoa oia i te a‘oraa i te matahiapo e i te tavini tauturu o tei vauvau i te mau tuhaa o te putuputuraa Oraraa e taviniraa e i te mau oreroraa parau. Oia atoa te taeae o te faatere aore ra o te taio i te Haapiiraa o Te Pare Tiairaa aore ra i te Haapiiraa Bibilia a te amuiraa. E horoa te taeae a‘o tauturu i te a‘oraa i te taeae i te taime o raua ana‘e. (A hi‘o i te  paratarafa 17.) I roto i te amuiraa, mai te peu e rave rahi matahiapo mea aravihi ratou i te orero e te haapii, e taui ïa te taeae a‘o tauturu i te matahiti taitahi. Aita e faufaa ia horoa te taeae a‘o tauturu i te a‘oraa i muri a‘e i te vauvauraa taitahi.

TE MAU PIHA HAU

 25. Mea rahi ana‘e te piahi, e nehenehe te amuiraa e faanaho i te mau piha hau. E maitihia ïa te hoê taeae a‘o aravihi no te piha hau taitahi. Mea maitai ia maiti i te hoê matahiapo no te amo i tera hopoia. Ia titauhia râ, na te hoê tavini tauturu aravihi e haapao i te reira. Na te tino matahiapo ïa e maiti o vai te nehenehe e tavini ei taeae a‘o e e taui anei te taeae a‘o i te hebedoma taitahi. E pee te taeae a‘o i te mau faaueraa itehia i te  paratarafa 16. Mai te peu e te vai ra te piha hau, e anihia te mau piahi ia haere i te piha faataahia i muri iho i te vauvauraa A maimi i te mau poe pae varua itehia i roto i te tuhaa Tao‘a rau Bibilia. E ho‘i mai ratou i te piha matamua i muri iho i te tuhaa A rave maite i ta oe taviniraa. Ia aparauhia i nia i te mau video Hi‘oraa no te aparauraa, e mataitaihia aore ra e faaroohia te reira mai te piha hau, ia nehenehe. Aita ana‘e, e faaohipa te taeae a‘o i te hoê matini afaifai no te faaite i te video e na ’na e aratai i te aparauraa.

VIDEO

 26. E faaohipahia te tahi mau video i te putuputuraa o te hebedoma. E itehia tera mau video i nia i te porotarama roro uira JW Library® e maoti e rave rau ravea roro uira. I te tahi mau taime, i te putuputuraa no te pororaa, e patahia te mau video o te faaite ra i te hi‘oraa no te aparauraa. A tiai râ ia patahia teie mau video i te putuputuraa Oraraa e taviniraa hou a pata ’i i te reira i te mau putuputuraa no te pororaa.