Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe to utuafare e oaoa

 TUHAA 5

E nafea ia vai hau noa e te fetii?

E nafea ia vai hau noa e te fetii?

‘Ei aau aroha noa to outou, e te hamani maitai, e te haehaa, e te mǎrû, e te faaoromai.’—Kolosa 3:12

A faaipoipo ai, ua riro oe e to hoa ei utuafare apî. E faatura e e here noa iho â oe i to oe na metua, tera râ i teie nei, o to hoa faaipoipo te taata faufaa roa ’‘e no oe i te fenua nei. E ere i te mea ohie no vetahi fetii ia farii. Ma te haapao i te mau aratairaa Bibilia, e nehenehe oe e vai hau noa e to fetii e i te hoê â taime e haapao i to oe utuafare apî a oaoa ’tu ai.

 1 TE MANA‘O TANO NO NIA I TE FETII

TA TE BIBILIA E PARAU RA: “E faatura ’tu i to metua tane e to metua vahine.” (Ephesia 6:2) Noa ’tu ehia matahiti to oe, e titauhia ia haapao e ia faatura noa i to oe na metua. A farii e no to hoa faaipoipo, mai tera atoa ïa. Te parauhia ra e: “E ore te aroha e feii,” eiaha ïa e mana‘o ino i to hoa ia tapea i te taairaa maitai e to ’na fetii.—Korinetia 1, 13:4; Galatia 5:26.

TA OE E NEHENEHE E RAVE:

  • A haapae i te mau parau mai teie te huru, “Hopea ore to oe fetii i te faaino ia ’u” aore ra “Aita iho â to oe metua vahine e mauruuru i te tahi noa ’‘e ohipa ta ’u e rave”

  • A tamata na i te feruri i te huru o to oe hoa a faahiti ai oe i tera mau parau

 2 IA TITAUHIA, A FAAITE PAPU I TE MANA‘O

TA TE BIBILIA E PARAU RA: “No reira e faarue ai te taata i tana metua tane e tana metua vahine, a ati atu ai i ta ’na vahine, e e riro hoi raua ei hoê.” (Genese 2:24) No to oe na metua, na raua noa ra paha e haapao ia oe noa ’tu e ua faaipoipo oe. I to raua mana‘o, e parau atoa ïa ta raua i to orua oraraa.

Tei ia oe e to hoa faaipoipo atura ïa te faaotiraa eaha to ratou otia a faaite atu ai i te reira ma te here. E nehenehe e faaite papu i te mana‘o ma te ore e tuhi. (Maseli 15:1) E tauturu atu te haehaa, te mǎrû e te faaoromai ia haamaitai i to orua taairaa e te fetii a tamau noa ’i i “te faaoromairaa te tahi i te tahi ma te aroha.”—Ephesia 4:2.

TA OE E NEHENEHE E RAVE:

  • Ia haapeapea oe no te mea te faaô pinepine ra te fetii i roto i to orua oraraa, a tauaparau e to hoa i te taime aita orua i riri

  • Ia hoê to orua mana‘o no te faaafaro i te mau fifi atoa e nehenehe e tupu e te fetii