Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe to utuafare e oaoa

 TUHAA 7

E nafea ia haapii i to tamarii

E nafea ia haapii i to tamarii

“E teie nei mau parau ta ’u e parau atu ia oe i teie nei mahana, ei roto i to aau e vai ai: e e haapii tamau maite oe i to mau tamarii i taua mau parau nei.”—Deuteronomi 6:6, 7

Ei tumu o te utuafare, ua faaoti Iehova e na te mau metua e haapao i ta ratou tamarii. (Kolosa 3:20) Ei metua, na oe ïa te hopoia e haapii i to tamarii ia here ia Iehova e ia riro ei taata paari maitai. (Timoteo 2, 1:5; 3:15) E mea tia ia haapii atoa oe ia ite eaha to roto i te aau o to tamaiti aore ra tamahine. Mea faufaa roa to oe hi‘oraa. Tei roto ana‘e i to aau ta Iehova Parau, e tia ia oe ia haapii i te reira i ta oe tamarii.—Salamo 40:8.

 1 IA INEINE OE I TE FAAROO

TA TE BIBILIA E PARAU RA: “Ia ru te taata atoa i te faaroo, ia haere maine i te parau.” (Iakobo 1:19) E hinaaro oe ia taa to tamarii e e nehenehe oia e paraparau ia oe i te mau taime atoa. E mea tia ia ite oia e ua ineine oe i te faaroo atu. Ia au i to oe huru, e faaite ohie atu paha to tamarii i to ’na mana‘o. (Iakobo 3:18) E taiâ râ o ’na mai te peu e e metua etaeta aore ra faahapa hanoa oe. A faaite i te faaoromai i nia i ta oe tamarii e a haapapu tamau atu i to here ia ’na.—Mataio 3:17; Korinetia 1, 8:1.

TA OE E NEHENEHE E RAVE:

  • Ia vata noa oe no te faaroo i to tamarii

  • A paraparau tamau e to tamarii, eiaha noa i te taime e fifi ai o ’na

2 A FERURI I TE POROI

TA TE BIBILIA E PARAU RA: “O tei paari tana haapaoraa ra e noaa ia ’na te maitai.” (Maseli 16:20) I te tahi taime, e titauhia ia ore e haapao noa i te mau parau a te tamarii, i te poroi atoa râ ta ratou e faaite atura. Ma te na reira e ite ai oe eaha mau na to ratou mana‘o. Mea pinepine te tamarii i te faarahi i te parau aore ra i te paraparau ma te ore e feruri. Ua faaitehia hoi e “o tei parau vave mai aitâ i faaitehia ’tu, ua faaite oia e maamaa to ’na.” Eiaha ïa e riri hanoa.—Maseli 18:13; 19:11.

TA OE E NEHENEHE E RAVE:

  • Noa ’tu eaha ta to tamarii e parau atu, a faaoti papu eiaha e tâpû i ta ’na parau aore ra e riri

  • A haamana‘o na i to oe tamariiraa, mai te aha to oe huru? Eaha te mea faufaa no oe i tera ra tau?

 3 IA HOÊ TO ORUA MANA‘O

TA TE BIBILIA E PARAU RA: “E faaroo mai, e tau tamaiti, i te a‘o a to metua tane, e eiaha e faarue i te faaitoito a to metua vahine.” (Maseli 1:8) Ia au i ta Iehova i faaoti, na te metua tane e metua vahine e faatere i te tamarii. E mea tia ia haapii ia ratou ia faatura e ia auraro ia oe. (Ephesia 6:1-3) E taa te tamarii ia ore na metua e “ati maite . . . e te mana‘o hoê.” (Korinetia 1, 1:10) Ia ore oe e mauruuru i to hoa, eiaha e faaite i te tamarii a‘unei ratou e ore ai e faatura faahou ia orua.

TA OE E NEHENEHE E RAVE:

  • A paraparau e a faaoti e nafea ia a‘o i ta orua tamarii

  • Mea taa ê ana‘e to oe mana‘o no nia i te huru haapiiraa e horoa i te tamarii, a feruri e ere anei te mana‘o o to hoa i te mea tano atoa

 4 A FAAINEINE I TA OE TAMARII

TA TE BIBILIA E PARAU RA: “E haapii i te tamaiti i tana e‘a ia haere.” (Maseli 22:6) Eita ta oe tamarii e riro ei taata maitai mai tera noa. E titauhia ia faaineine ia ratou ma te haapii atu e ma te a‘o atoa râ. (Salamo 127:4; Maseli 29:17) E ere râ te tama‘i-noa-raa, mea faufaa atoa hoi ia tauturu atu ia taa e mea hape ta ratou i rave. (Maseli 28:7) A haapii atoa ia ratou ia hinaaro i te Parau a Iehova e ia feruri i ta ’na mau aratairaa. (Salamo 1:2) E tauturu hoi te reira i ta oe tamarii ia noaa i te mana‘o haava maitai.—Hebera 5:14.

TA OE E NEHENEHE E RAVE:

  • A hi‘opoa e ua faatupu anei to tamarii i te taairaa e te Atua a tiaturi atu ai ia ’na

  • A tauturu atu ia ite e ia haapae i te mea e fifihia ’i o ’na, mai te itehia ra i nia i te Internet e te mau reni faahoaraa. A haapii e nafea ia patoi i te feia e hamani ino i te tamarii

“E haapii i te tamaiti i ta ’na e‘a ia haere”

No te ite atu â

TE PARE TIAIRAA

E nafea ia a‘o i ta oe tamarii?

Te faaite ra te Bibilia e toru mana‘o faufaa no te a‘o maitai.