Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe to utuafare e oaoa

 TUHAA 3

E nafea ia faaafaro i te fifi?

E nafea ia faaafaro i te fifi?

“Te aroha, ia u‘ana maite ïa ia outou outou iho: e moe hoi te hapa e rave rahi i te aroha.”—Petero 1, 4:8

I te haamataraa o to orua faaipoiporaa, e rave rau fifi te tupu. Mea taa ê paha to orua feruriraa, huru e mana‘o no nia i te oraraa. Aore ra no te tahi atu taata e no te tupuraa mana‘o-ore-hia paha orua e fifi atoa ’i.

Mea ohie a‘e paha ia ore e haapao i to tatou mau fifi, te a‘o maira râ te Bibilia ia faaafaro i te reira. (Mataio 5:23, 24) Ma te pee i te mau aratairaa Bibilia, e nehenehe oe e ite e nafea ia faaafaro maitai i te fifi.

 1 A PARAPARAU NO TE FAAAFARO I TE FIFI

TA TE BIBILIA E PARAU RA: “E taime to te parau.” (Koheleta 3:1, 7) A haapao maite e te paraparau ra orua no te faaafaro i te fifi. Ia taa maitai i to hoa faaipoipo i to oe mana‘o e huru i mua i tera tupuraa e a faaite noa atoa i te “parau mau.” (Ephesia 4:25) Noa ’tu e e riri aore ra e mauiui roa oe, eiaha e imi ia tatama‘i orua. Ia pahono oe ma te mǎrû, eita te tauaparauraa e riro ei taoraraa parau.—Maseli 15:4; 26:20.

Noa ’tu e aita oe i mauruuru, a faaite noa i te mǎrû ma te tamau i te here e faatura i to hoa faaipoipo. (Kolosa 4:6) A faaafaro oioi i te fifi e eiaha e mamû noa, a paraparau râ.—Ephesia 4:26.

TA OE E NEHENEHE E RAVE:

  • A faataa i te taime no te paraparau ia faaafarohia te fifi

  • Ia paraparau to oe hoa, a faaroo ia ’na e eiaha e tâpû i te parau. Ia oti, o oe ïa te paraparau

 2 A FAAROO NO TE TAA I TO ’NA MANA‘O

TA TE BIBILIA E PARAU RA: “Ei atiraa aroha mau to outou ia outou iho, . . . i te faaturaraa ’tu te tahi i te tahi.” (Roma 12:10) Mea faufaa roa te huru o ta oe faarooraa. A tutava i te taa i te mana‘o o to hoa ma te aau aroha e te haehaa. (Petero 1, 3:8; Iakobo 1:19) Eiaha e faahua faaroo. Ia nehenehe, a vaiiho i ta oe ohipa e a faaroo maite ia ’na aore ra a ani e e nehenehe anei e tiai maa taime iti. Ia faariro oe i to hoa ei apiti eiaha râ ei enemi, eita oe e ‘ru noa i te riri.’—Koheleta 7:9.

TA OE E NEHENEHE E RAVE:

  • A faaroo maite i te taatoaraa o ta ’na mau parau, noa ’tu e aita oe e au ra i ta oe e faaroo ra

  • A faaroo no te ite i te poroi ta ’na e hinaaro ra e faaite atu. A hi‘opoa i to ’na hoho‘a mata e toparaa reo

3 A RAVE MAI TA ORUA I FAAOTI

TA TE BIBILIA E PARAU RA: “E tao‘a ana‘e â tei te mau ohipa atoa ra; tei te paraparau noa râ te veve.” (Maseli 14:23) Eita e navai ia rave i te faaotiraa maitai, e titau-atoa-hia râ ia rave mai ta orua i faaoti. E ere ïa i te mea ohie, e tia hoi ia tutava mau, e hoona râ to orua taime. (Maseli 10:4) Ma te haa amui, e haamaitaihia orua.—Koheleta 4:9.

TA OE E NEHENEHE E RAVE:

  • A faaoti i ta orua e rave no te faaafaro i te fifi

  • A hi‘opoa pinepine e ua rave anei te tahi e te tahi i ta ’na tuhaa

No te ite atu â

A ARA MAI NA!

E nafea ia faaroo maite?

Ia faaroo ana‘e oe, te faaite ra ïa oe i to here. A hi‘o e nafea ia faaroo maite.

A ARA MAI NA!

E nafea ia ore e mamû noa?

E nafea vetahi mau hoa faaipoipo e ore ai e paraparau tau hora aore ra mahana? Eaha te rave no te faaafaro i te fifi?