Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Pahonoraa i na 10 uiraa ta te taurearea e uiui nei

 UIRAA 3

E nafea ia paraparau i to ’u na metua?

E nafea ia paraparau i to ’u na metua?

NO TE AHA MEA FAUFAA?

Mea maitai ana‘e te taairaa e to oe na metua, e ohie atu â to oe oraraa.

EAHA TA OE E RAVE?

Feruri na i teie tupuraa: I te po Mahana toru, ua faaoti Timona 17 matahiti i ta ’na ohipa i te fare e te tamǎrû ra o ’na ia ’na i teie nei! E tuama o ’na i te afata teata a parahi atu ai i mua.

Faura mai nei to ’na papa i te pae opani e te mata tu‘atu‘a.

“E Timona! Haamâu‘a oe to oe taime i mua tera afata teata. Aita oe i haere e tauturu i to oe teina? Eita e nehenehe e tiaturi!”

“Era faahou,” mutamuta a‘era Timona. Ua faaroohia râ.

Parau a‘era te papa: “Eaha ta oe i parau?”

“Aita,” ta Timona ïa e parau ma te amo i te mata i nia.

Ma te riri e te papu, parau a‘era to ’na papa: “Eiaha oe e paraparau mai ia ’u mai tera!”

O oe a‘e o Timona, e nafea oe ia ore teie tatama‘iraa e tupu?

A PARAHI E A FERURI!

E au te tauaparauraa i to oe na metua i te faahororaa i te pereoo. Mai te peu e ua tâpûhia te purumu i te hoê vahi, e paimi oe i te tahi atu purumu.

 EI HI‘ORAA:

Ua parau te hoê tamahine o Leah te i‘oa: “Mea fifi no ’u ia tauaparau e to ’u papa. I te tahi taime, e paraparau noa vau ia ’na e e pahono mai o ’na, ‘O vau ta oe e paraparau ra?’”

E TORU RAVEA TA LEAH.

  1. E tutuô i nia i to ’na papa.

    E tutuô Leah: “Mea faufaa hoi ta ’u e parau ra! Faaroo mai na!”

  2. E faaea i te paraparau.

    Eita Leah e tamata faahou i te paraparau i to ’na papa no nia i to ’na fifi.

  3. E tiai i te taime maitai a‘e no te paraparau.

    E paraparau Leah i to ’na papa i te tahi atu taime aore ra e papai o ’na i te hoê rata no te faaite ia ’na i to ’na fifi.

Eaha te ravea ta oe e faaitoito ia Leah ia maiti?

A FERURI NA: Vahi ê roa te feruriraa o te papa o Leah, aita ïa o ’na e ite ra i to Leah inoino. Ia maiti Leah i te Ravea 1, eita to ’na papa e taa no te aha o ’na e tutuô ai. Eita paha teie ravea e turai i to ’na papa ia faaroo atu â ia ’na. E aita Leah e faatura ra i to ’na papa. (Ephesia 6:2) Eita raua toopiti e faufaahia.

E imi oe i te tahi atu purumu ia farerei oe i te tahi fifi. Oia atoa, e imi oe i te tahi atu ravea ia maitai oe e to oe na metua

Mea ohie roa ia maiti i te Ravea 2, e ere râ i te haerea î i te paari. No te aha? No te faaafaro i to ’na mau fifi, mea faufaa ia paraparau Leah i to ’na papa. E no te tauturu ia Leah, e titauhia ia taa i to ’na papa eaha te tupu ra. Eita e haere i mua ia mamû noa Leah.

Tera râ, maoti te Ravea 3, eita Leah e vaiiho i tera fifi ia tapea ia ’na ia faaitoito i te paraparau i to ’na papa. E na reira râ o ’na i te tahi atu taime. E ia maiti o ’na i te papai i te hoê rata i to ’na papa, e maitai a‘e ïa Leah i tera iho â taime.

Maoti te hoê rata, e nehenehe atoa o ’na e faaite maitai i ta ’na e hinaaro ra e parau. A taio ai i te rata, e ite te papa o Leah i ta ’na e tamata ra i te parau ia ’na. E e taa ia ’na i te mau fifi o ta ’na tamahine. E faufaahia ïa Leah e to ’na papa i te Ravea 3. Ma te paraparau atu aore ra ma te papai i te rata, e faaitoito te Ravea 3 ia pee i te faaueraa Bibilia ia titau i “te parau hau.”—Roma 14:19.

Eaha ’tu â te ravea e vai ra ia Leah?

A feruri i te tahi ravea e a feruri i te faahopearaa e itehia.

 EIAHA E FAATAE ATU I TE POROI HAPE

A haamana‘o e eita e tuati noa te mea ta oe i parau e te mea ta to oe na metua i mana‘o ua parau oe.

EI HI‘ORAA:

E ani atu paha to oe na metua no te aha oe i riri ai. E parau oe: “Aita vau e hinaaro ra e paraparau no nia i te reira.”

E faaroo râ to oe na metua: “Aita vau e tiaturi ra ia orua. E faaite au i to ’u fifi i to ’u mau hoa, eiaha ia orua.”

A feruri na e te fifi ra oe e e hinaaro to oe na metua e tauturu atu. Tera râ, e parau oe: “Eiaha e haapeapea. Na ’u iho â e faaafaro.”

  • Eaha paha ta to oe na metua e faaroo?

  • Eaha te mea au a‘e ia parau atu oe?