Eaha to roto?

Mau faaho'iraa ê

Tapura tumu parau

Ite no Iehova

Tahiti

Pahonoraa i na 10 uiraa ta te taurearea e uiui nei

 UIRAA 5

E nafea i mua i te haamǎta‘uraa i te fare haapiiraa?

E nafea i mua i te haamǎta‘uraa i te fare haapiiraa?

NO TE AHA MEA FAUFAA?

Ia au i ta oe huru pahonoraa, e maitai atu â aore ra e ino atu â te tupuraa.

EAHA TA OE E RAVE?

Feruri na i teie tupuraa: I teie mahana, aita Toma e hinaaro faahou ra e haere i te haapiiraa. No te aha? E toru ava‘e i muri, ua haaparare to ’na mau hoa haapiiraa i te parau ino mau no nia ia ’na. E tuô ratou ia ’na ma te mau i‘oa faaooo. I te tahi taime, e faatopa vetahi i ta Toma mau buka a parau atu ai e aita ratou i haapao. Aore ra e turaihia o ’na na muri, aita râ o ’na i ite na vai. E inanahi ra, mea peapea roa ’tu â. Ua haponohia ia Toma te tahi parau haamǎta‘u na nia i te Internet . . .

Mai te peu o oe o Toma, eaha ta oe e rave?

A PARAHI E A FERURI!

E nehenehe ta oe e aro atu ma te ore e moto! E nafea?

  •   EIAHA E PAHONO ATU. Te parau ra te Bibilia: “E faahope te maamaa i to ’na mana‘o i rapae; area te taata paari e tapeapea ïa e ia maoro iti a‘e.” (Maseli 29:11) Ia vai mǎrû noa oe, eita tera mau taata e anaanatae faahou ia oe.

  • EIAHA E FAAHO‘I ATU. Te parau ra te Bibilia: “Eiaha roa te ino e tahoohia i te ino i te taata atoa nei.” (Roma 12:17) E ino atu â te tupuraa ia tahoo oe.

  • EIAHA E HAERE I TE VAHI E FIFIHIA ’I. Te parau ra te Bibilia: “E ite te taata haapao i te ino, e ua ape ihora.” (Maseli 22:3) Ia nehenehe, a ape i te feia e i te vahi e fifihia ’i oe.

  • A TAMATA I TE PAHONORAA MANA‘O-ORE-HIA. Te na ô ra te Bibilia: “O te parau mǎrû ra tei faaore i te riri.” (Maseli 15:1) A tamata i te parau hoata. Ei hi‘oraa, ia faaooo-noa-hia oe e mea poria oe, e nehenehe oe e parau noa ’tu: “E! Ua ite iho â vau e e tia ia haapararai!”

  • A HAERE. Te na ô ra Nora, 19 matahiti: “Ma te ore e pahono atu, e faaite oe e mea paari oe i roto i te feruriraa e e mea puai a‘e oe i tera taata e haamǎta‘u maira. Oia atoa i to oe faaoromai, te tahi mea aita ta tera taata.”—Timoteo 2, 2:24.

  • A FAAITE I TE TAIÂ ORE. E ite maitai te feia haamǎta‘u i te taata o te ore e tiaturi ia ratou iho e o te taiâ hanoa. Ia ite râ tera mau taata e eita oe e vaiiho ia ratou ia faatere ia oe, e haere atu ïa ratou.

  • A FAAITE I TE OHIPA E TUPU RA. Te na ô ra te hoê orometua tei haapii na i te tamarii: “Ia haamǎta‘uhia oe, a paraparau. O te ohipa tano e rave ia ore atoa te reira ia tupu i nia i te tahi atu taata.”

Maoti te taiâ ore, e fana‘o oe i te hoê puai aita ta tera taata haamǎta‘u