Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Pahonoraa i na 10 uiraa ta te taurearea e uiui nei

 UIRAA 8

E ia faahepohia ia rave i te mau peu taotoraa tia ore?

E ia faahepohia ia rave i te mau peu taotoraa tia ore?

NO TE AHA MEA FAUFAA?

I te mau matahiti atoa, e mirioni taata te maferahia e te faahepohia ia rave i te mau peu taotoraa tia ore. E feia apî te rahiraa.

EAHA TA OE E RAVE?

Ua taue te hoê taata ia Annette i raro. Aita tera tamahine i taa eaha te tupu ra. Te parau ra o ’na: “Ua tamata vau i te turai ia ’na. Ua tamata vau i te tuô, aita râ te reo i matara mai. Ua turai au ia ’na, ua tue, ua moto. I muri iho, patia mai nei o ’na i te tipi. Aita ta ’u e nehenehe faahou e hauti.”

Mai te peu e tei roto oe i tera huru tupuraa, eaha ta oe e rave?

A PARAHI E A FERURI!

Noa ’tu e ua ineine oe, peneia‘e ma te haapao maitai a hahaere ai na rapae i te po, e nehenehe te ohipa ino e tupu. Te parau ra te Bibilia: “Aore roa e taata i ite i ta ’na e roohia mai.”—Koheleta 9:12.

Ua rave-ino-hia vetahi feia apî, mai ia Annette, na te feia ta ratou i ore i matau. E te tahi atu na te hoê taata matau aore ra te hoê mero utuafare. Ahuru noa matahiti to Natalie, a ravehia ’i i nia ia ’na te mau peu taotoraa tia ore e te hoê taurearea tei faaea i pihai iho i to ’na fare. Te parau ra o ’na: “Ua riaria e ua haama roa vau. Aita ïa vau i faaite oioi i tei tupu.”

 E ERE NA OE TE HAPE

E faahapa noa Annette ia ’na. Te parau ra o ’na: “E na nia iho noa vau i roto i to ’u upoo i te ohipa i tupu i tera po. I nehenehe paha ta ’u e turai puai atu â ia ’na. Teie râ, i to ’na patiaraa mai i te tipi, aita vau e nehenehe faahou e hautiuti no to ’u riaria. Aita faahou! I to ’u râ mana‘o, e nehenehe ta ’u.”

E faahapa noa atoa Natalie ia ’na. Te parau ra o ’na: “Ahani vau aita i tiaturi noa ia ’u iho. Ua parau noa mai to ’u na metua ia mâua to ’u tuahine ia faaea amui noa a hauti ai i rapae. Aita râ vau i faaroo. Ua rave te hoê taata tapiri i te hoê mea hairiiri i nia ia ’u, na ’u iho â ïa te hape. Ua mauiui atoa to ’u utuafare i te ohipa i tupu, na ’u atoa ïa te hape. O tera huru aau ta ’u e aro noa ra.”

Mai te peu hoê â huru aau to oe i to raua, a haamana‘o e aita te taata i maferahia i hinaaro i te reira. No te tahi mau taata e ere te reira i te mea ino, tera iho â ta te mau tamaroa e rave aore ra na tera mau tamahine iho â i imi. E ere roa ’tu râ. Mai te peu e ua ravehia te peu taotoraa tia ore i nia ia oe, e ere na oe te hape!

Parau mau, mea ohie ia taio “e ere na oe te hape.” Mea fifi roa râ ia tiaturi i te reira. E tapea vetahi i to ratou mauiui no ratou, e faahapahapa ia ratou iho e e hepohepo. O vai râ te faufaahia ia mamû noa oe? O oe anei aore ra te taata tei hamani ino ia oe? Tei ia oe noa te feruriraa i te tahi atu ravea.

A FAATIA I TEI TUPU

Te faatia maira te Bibilia i ta te taata haerea tia o Ioba i parau i roto i to ’na hepohepo rahi: “E parau â vau ma te ati rahi.” (Ioba 10:1) E faufaahia oe ia na reira atoa oe. A paraparau i te hoê taata tiaturihia, e farii ïa oe i te ohipa ino i tupu e e tauturu atu te reira ia aro i te hepohepo.

Mea teimaha roa to oe mau huru aau no te amo o oe ana‘e. A ani i te tauturu ma te paraparau i te hoê taata

Tera ta Annette i rave. Te na ô ra o ’na: “Ua paraparau vau i te hoê hoa piri o tei faaitoito ia ’u ia paraparau i na hoa faaipoipo Kerisetiano paari i roto i ta ’u amuiraa. Oaoa roa vau i te na reiraraa. Ehia taime raua i te parahiraa ia ’u ra e i te parauraa mai e e ere na ’u te hape. E ere roa ’tu na ’u te hape.”

Ua paraparau Natalie i to ’na na metua no nia i te ohipa ino ta ’na i faaruru. Te na ô ra o ’na: “Ua tauturu mai raua ia ’u. E ua faaitoito mai ia paraparau no nia i tera ohipa. E ua tauturu mai te reira ia ore e hepohepo e e riri roa i roto ia ’u.”

Ua ite atoa Natalie i te tamahanahanaraa i roto i te pure. Te parau ra o ’na: “E paraparau vau i te Atua. Ua tauturu rahi mai te reira aita ana‘e e tae ia ’u ia paraparau i te tahi atu taata. A pure ai, aita e mea ta ’u e tapea na ’u. E horoa mai te reira i te hau e te tamǎrûraa.”

E nehenehe atoa oe e ite e “e taime to te faaora.” (Koheleta 3:3) A haapao ia oe i te pae tino e i te pae aau. A haamâha i to oe rohirohi. E te mea faufaa roa ’tu â, a tiaturi i te Atua no ’na ana‘e te mahanahana, oia hoi o Iehova.—Korinetia 2, 1:3, 4.

 IA TIA TO OE MATAHITI NO TE HAAMATAU

Ei tamahine, ia turaihia oe ia pee i te haerea viivii, aita e ino ia parau atu oe ma te papu, “Faaea!” aore ra “Faanuu atu to oe rima!” Eiaha e mǎta‘u ia taie ta oe here. Ia taie o ’na i muri iho i tera tupuraa, aita e faufaa ia tapea ia ’na! Mea au a‘e no oe te hoê taata o te faatura i to oe tino e i to oe mau tiaturiraa.

UIRAA

“I te fare haapiiraa tuarua, e huti noa te mau tamaroa i to ’u pǎpǎ titi a faahiti atu ai i te mau parau faahaama. E parau mai ratou e e oaoa a‘e vau ia taoto vau ia ratou.”—Coretta.

I to oe mana‘o, ua aha teie mau tamaroa?

  1. Ua hauti e o ’na?

  2. Ua faahinaaro ia ’na?

  3. Ua faahepo ia ’na ia taoto ia ratou?

“I nia i te pereoo uta taata, ua haamata te hoê tamaroa i te parau mai i te mau mea faufau e ua haru ia ’u. Ua turai taue au i to ’na rima e ua tiahi ia ’na. Ua hi‘o mai o ’na ia ’u mai te huru ra e mea maamaa vau.”—Candice.

I to oe mana‘o, ua aha teie tamaroa ia Candice?

  1. Ua hauti e o ’na?

  2. Ua faahinaaro ia ’na?

  3. Ua faahepo ia Candice ia taoto ia ’na?

“I te matahiti i mairi a‘enei, parau noa mai te hoê tamaroa e mea au na ’na ia ’u e ua hinaaro e haamatau ia ’u noa ’tu e ua parau noa vau ia ’na aita. I te tahi taime, e haru o ’na i to ’u rima. Parau vau ia ’na ia faaea, aita râ. I te hoê taime, a oomo ai au i to ’u tiaa, ua tapea o ’na i to ’u ohure.”—Bethany.

I to oe mana‘o, ua aha teie tamaroa:

  1. Ua hauti e o ’na?

  2. Ua faahinaaro ia ’na?

  3. Ua faahepo ia Bethany ia taoto ia ’na?

O te numera 3 te pahonoraa tano i na uiraa e toru.

Na te aha e faataa ê ra i te faaheporaa e taoto i te hautiraa aore ra te faahinaaroraa?

No ǒ mai te faaheporaa e taoto i te hoê noa pae. E tamau noa te reira noa ’tu e e parau atu te taata faahepohia i te tahi atu ia faaea.

E fifi ino mau te reira o te nehenehe e aratai i te maferaraa.