Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Pahonoraa i na 10 uiraa ta te taurearea e uiui nei

 UIRAA 7

Eaha te rave ia onoono mai to ’u hoa ia taoto ia ’na?

Eaha te rave ia onoono mai to ’u hoa ia taoto ia ’na?

NO TE AHA MEA FAUFAA?

E ohipa ta oe mau faaotiraa no nia i teie tumu parau i nia i to oe ananahi.

EAHA TA OE E RAVE?

Feruri na i teie tupuraa: A piti noa ava‘e Hina i te matauraa ia Manu. No Hina râ, e au ra e mea maoro raua i te matauraa. Afaifai noa raua i te poroi vini, e paraparau ehia hora i nia i te niuniu e e faaoti atoa raua i to te tahi e te tahi mau parau! I teie nei râ, aita i navai no Manu.

I na piti ava‘e i mairi, aita e ohipa ê atu ta raua i rave i te tapearaa i to raua rima e te apâ-poto-raa ia raua. Tera noa ta Hina e hinaaro aita ’tu ai. Aita râ o ’na e hinaaro ra ia faarue Manu ia ’na. Aita ’tu hoi taata te faariro ia ’na ei tamahine nehenehe mau e te taa ê. E mana‘o o ’na: “I te tahi a‘e pae, te here nei mâua Manu . . .”

Mai te peu e ua tia to oe matahiti no te haamatau i te tahi atu e tei roto oe i te tupuraa o Hina, eaha ta oe e rave i muri iho?

A PARAHI E A FERURI!

E ô no ǒ mai i te Atua te taotoraa i te taata ta oe noa i faaipoipo. Eita e faaohipa-maitai-hia tera ô ia na reirahia hou te faaipoiporaa. Mai te tamâraa ïa i te fare e te hoê ahu nehenehe mau i horoahia mai

Ia ou‘a mai oe mai nia mai i te hoê tumu raau a tamata ’tu ai i te rere mai te manu, e mauiui oe. Hoê â huru ia ore oe e pee i te hoê ture morare mai teie: “Ia ore outou ia faaturi.”—Tesalonia 1, 4:3.

Eaha te faahopearaa ia ore e pee i teie faaueraa? Te na ô ra te Bibilia: “O te taata râ i faaturi ra, ua hamani ino oia i to ’na iho tino.” (Korinetia 1, 6:18) Tera iho â anei?

 Teie ta te feia maimi i ite mai: E pinepine e faaruru te rahiraa o te feia apî o tei taoto i te hoê taata hou te faaipoiporaa i te tahi o teie mau faahopearaa.

  • OTO. Ua parau te rahiraa o te feia apî tei taoto i te hoê taata hou te faaipoiporaa e ua tatarahapa ratou i muri iho.

  • TIATURI ORE. I muri iho i te taotoraa i te hoê taata, e haamata raua taitahi i te mana‘o, ‘O vai râ ïa ta ’na i taoto na mua ’‘e ia ’u?’

  • INOINO. I roto i te aau, mea au a‘e na te mau tamahine te hoê taata o te paruru ia ratou, eiaha râ o te hinaaro noa e taoto ia ratou. E aita te tamaroa e rave rahi e hinaaro roa i te hoê tamahine o tei farii i te taoto ia ratou.

  • Haapotoraa: Ia taoto oe i te hoê taata, e faaino oe ia oe ma te ere i te tahi mea faufaa roa. (Roma 1:24) Mea faufaa roa to oe tino no te horoa noa ’tu mai tera!

A faaite e mea puai oe no te ‘ore e faaturi.’ (Tesalonia 1, 4:3) Ia faaipoipo oe, e nehenehe oe e taoto i to oe apiti. A oaoa ’tu ai i te reira ma te ore e haapeapea e e tatarahapa. Ma te ore e faaruru i te mau faahopearaa o te faaturi.—Maseli 7:22, 23; Korinetia 1, 7:3.

 EAHA TO OE MANA‘O?

  • E haafifi anei te hoê taata o te here mau ra ia oe i to oe maitai pae tino e i te pae o te aau?

  • E turai anei te hoê taata o te here mau ra ia oe ia haafifi i to oe auhoaraa e te Atua?—Hebera 13:4.