Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Pahonoraa i na 10 uiraa ta te taurearea e uiui nei

 UIRAA 4

Eaha te rave ia hape au?

Eaha te rave ia hape au?

NO TE AHA MEA FAUFAA?

Ma te farii i ta oe mau hape, e riro atu â oe ei taata faaturahia e tiaturihia.

EAHA TA OE E RAVE?

Feruri na i teie tupuraa: A hauti ai e to ’na mau hoa, taue a‘era Timi i te hoê popo a parari atu ai te hi‘o pereoo o te hoê taata tapiri.

O oe a‘e o Timi, eaha ta oe e rave?

A PARAHI E A FERURI!

E TORU RAVEA TA OE:

  1. Horo.

  2. Pari i te tahi atu.

  3. Faaite i te taata tapiri i tei tupu a parau atu ai e e aufau oe i te hi‘o parari.

E hinaaro paha oe e maiti i te Ravea 1. Mea maitai râ ia farii i ta oe mau hape, no te hoê hi‘o parari aore ra te tahi atu mea.

 E TORU TUMU E FARII AI I TA OE MAU HAPE

  1. Tera te mea maitai e rave.

    Te parau ra te Bibilia: “Ei haapao maitai ta matou i te mau mea atoa nei.”—Hebera 13:18.

  2. E pinepine te taata i te faaore i te hapa o te feia e farii e ua hape ratou.

    Te parau ra te Bibilia: “O tei tapo‘i i ta ’na hara, e ore ïa e maitai; o tei fa‘i râ e ua faarue, e arohahia ïa.”—Maseli 28:13.

  3. Te mea faufaa a‘e, e oaoa te Atua.

    Te parau ra te Bibilia: “Mea faufau hoi na Iehova te feia mârô ra [aore ra pi‘o], tei te feia parau-tia ra ta ’na parau moe.”—Maseli 3:32.

Ua tamata Karina, e 20 matahiti, i te tahuna i to ’na papa te parau faautuaraa no te faahoro-vitiviti-raa i te pereoo. Eita râ ta ’na e nehenehe e na reira noa. Te na ô ra Karina: “Fatata hoê matahiti i muri iho, ua ite to ’u papa i te hoê parau faautuaraa i to ’u i‘oa. Ua fifihia vau!”

Te haapiiraa? Te parau ra Karina: “E rahi atu â te fifi ia huna oe i te tahi hape. E amo iho â oe i te hopoia!”

E NAFEA IA HAAPII MAI I TA OE MAU HAPE?

Te na ô ra te Bibilia: “Te hapa nei hoi tatou atoa i te mau mea atoa e rave rahi.” (Iakobo 3:2) A farii i ta oe mau hape, e a na reira oioi. E tapao faaite te reira o to oe haehaa e to oe paari.

E tia atoa ia haapii mai i ta oe mau hape. Te na ô ra te tahi tamahine o Vera te i‘oa: “E faaitoito vau i te huti mai i te haapiiraa i te hape taitahi ta ’u e rave nei. E tauturu mai te reira ia riro ei taata maitai a‘e e ia ore e rave i te hoê â hape.” E hi‘o ana‘e e nafea oe e na reira atoa ’i.

E rave oe i te pereoo tataahi o papa a ino atu ai te reira. Eaha ta oe e rave?

  • Eita oe e faaite atu a tiaturi atu ai e eita papa e ite.

  • E faataa ia papa eaha tei tupu.

  • E faataa ia papa eaha tei tupu a pari atu ai i te tahi atu.

Aita oe i manuïa i te tahi hi‘opoaraa no te mea aita oe i hi‘o faahou i tei haapiihia. Eaha ta oe e rave?

  • E faahape i te hi‘opoaraa.

  • E farii e na oe te hape.

  • E parau e aita te orometua i au ia oe.

E au te mana‘o-noa-raa i te mau hape tahito i te hi‘o-noa-raa i roto i te hi‘o iti a faahoro noa ’i i te pereoo

 I teie nei, e rave ana‘e i teie na aamu a tamata atu ai i te feruri e o oe (1) o papa e (2) ta oe orometua. Eaha te mana‘o o papa e o ta oe orometua ia farii oioi oe i ta oe mau hape? Eaha ta raua e mana‘o ia huna oe i ta oe mau hape?

A feruri na i teie nei i te hoê hape ta oe i rave i te matahiti i mairi e a pahono i teie mau uiraa.

Eaha te hape? Ua nafea oe?

  • Ua huna vau i te reira.

  • Ua faahape au i te tahi atu.

  • Ua farii oioi au i te reira.

Mai te peu e aita oe i farii i ta oe hape, eaha to oe huru i muri iho?

  • Maitai—Aita vau i fifihia!

  • Faahapahapa—Ahani au i faaite i te parau mau.

Nafea oe e arai maitai a‘e ai i tera fifi?

Eaha te haapiiraa ta oe i huti mai i tera fifi?

EAHA TO OE MANA‘O?

No te aha vetahi e ore ai e farii i ta ratou mau hape?

Eaha to vetahi ê mana‘o ia tamata noa oe i te huna i ta oe mau hape? Eaha râ ia farii oe i ta oe mau hape?—Luka 16:10.