Eaha to roto?

Mau faaho'iraa ê

Tapura tumu parau

Ite no Iehova

Tahiti

Parau apî oaoa a te Atua

 HAAPIIRAA 8

No te aha te Atua e vaiiho noa ’i i te ino e te mauiui?

No te aha te Atua e vaiiho noa ’i i te ino e te mauiui?

1. Nohea mai te ino?

Ua vaiiho te Atua i te taata ia faatere ehia maororaa. No te faaite ïa eita te fifi o te huitaata e afaro ia ratou

Ua haamata te ino i te fenua i to Satani haavareraa no te taime matamua. E melahi tia roa oia na mua ’‘e, tera râ “aita oia i mau papu i roto i te parau mau.” (Ioane 8:44) Ua nounou oia i te haamoriraa e au i te Atua ana‘e. Ua haavare oia ia Eva te vahine matamua tei faaroo ia ’na eiaha i te Atua. Ua pee Adamu ia Eva ma te faaroo ore i te Atua. O te mauiui e te pohe te faahopearaa.—A taio i te Genese 3:1-6, 19.

I to Satani faahemaraa ia Eva ia faaroo ore i te Atua, te patoi ra ïa oia i to te Atua mana arii, aore ra to ’na tiaraa Arii hau ê. Ua turu te rahiraa o te taata ia Satani ma te patoi i te Atua ei Faatere. Riro maira Satani “te arii o teie nei ao.”—A taio i te Ioane 14:30; Ioane 1, 5:19.

2. Mea ino anei te mau mea ta te Atua i poiete?

Mea maitai roa te ohipa a te Atua. E nehenehe ïa te melahi e te taata ta ’na i poiete e faaroo ia ’na. (Deuteronomi 32:4, 5) Ua hamani oia ia tatou ma te tiamâraa e maiti e rave i te maitai aore ra te ino. Maoti taua tiamâraa ra e faaite ai tatou i to tatou here i te Atua.—A taio i te Iakobo 1:13-15; Ioane 1, 5:3.

3. No te aha te Atua i vaiiho noa ’i i te mauiui e tae roa mai i teie mahana?

Mai te ô i Edene mai â to Iehova vaiiho-noa-raa i te taata ia patoi i ta ’na faatereraa. No te aha? No te faaite eita te taata e maitai na ratou ana‘e e faatere ia ratou iho. (Koheleta 7:29; 8:9) I muri a‘e e 6 000 matahiti faatereraa a  te taata, aita i ore te tama‘i, te ohipa ino, te ohipa tano ore aore ra te ma‘i.—A taio i te Ieremia 10:23; Roma 9:17.

Area te faatereraa a te Atua, e haamaitai ïa i te feia e farii i te reira. (Isaia 48:17, 18) Ua fatata Iehova i te haamou i te mau faatereraa atoa a te taata. O te feia ana‘e e farii i te faatereraa a te Atua te parahi i te fenua.—Isaia 11:9.—A taio i te Daniela 2:44.

4. Maoti te faaoromai o te Atua, eaha ta tatou e nehenehe e rave?

No Satani, aita e taata e tavini ia Iehova ma te here. E nehenehe oe e haapapu e e haavare teie. Maoti to te Atua faaoromai e faaite ai tatou teihea faatereraa ta tatou e farii. Na to tatou huru oraraa ïa e faaite ua maiti anei tatou i ta te Atua e aore ra i ta te taata.—A taio i te Ioba 1:8-12; Maseli 27:11.

5. E nafea ia maiti i te Atua ei Faatere no tatou?

E faaite to tatou huru oraraa e o te Atua anei to tatou Faatere

E maiti tatou i te Atua mau ei Faatere no tatou ma te haapii e te haamori ia ’na ia au i ta ’na Parau te Bibilia. (Ioane 4:23) Ma te ore e faaô i roto i te poritita e te tama‘i, mai ia Iesu, e faaite tatou e e ere o Satani to tatou faatere.—A taio i te Ioane 17:14.

Te faaohipa ra Satani i to ’na mana ia rahi te mau peu ino e te tia ore. E faaooo aore ra e riri mai paha te hoa e te fetii no te mea aita tatou e rave ra i teie mau peu. (Petero 1, 4:3, 4) Na tatou ïa e maiti. E amuimui anei e te feia e here ra i te Atua? E auraro anei i ta ’na mau ture paari î i te here? Ia na reira tatou, e haapapu ïa tatou e ua haavare Satani. No ’na, aita e taata e faaroo i te Atua ia fifi oia.—A taio i te Korinetia 1, 6:9, 10; 15:33.

No to ’na here i te huitaata, e faaore iho â te Atua i te ino e te mauiui. Te feia e faaite e te tiaturi ra ratou i te reira, e oaoa ïa i te ora i nia i te fenua e a muri noa ’tu.—A taio i te Ioane 3:16.