Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Parau apî oaoa a te Atua

 HAAPIIRAA 2

O vai te Atua?

O vai te Atua?

1. No te aha e haamori ai i te Atua?

Na te Atua mau i poiete i te mau mea atoa. Aita to ’na e haamataraa e e vai oia e a muri noa ’tu. (Salamo 90:2) Na ’na te parau apî oaoa i roto i te Bibilia. (Timoteo 1, 1:11) O ’na ana‘e ta tatou e haamori, na ’na hoi i horoa mai i te ora.—A taio i te Apokalupo 4:11.

2. Mai te aha te huru o te Atua?

Aita e taata i ite mata a‘enei i te Atua, e Varua hoi oia tei hau ê i te taata e ora nei i te fenua. (Ioane 1:18; 4:24) E ite râ tatou i to ’na huru i roto i te mau mea ta ’na i hamani. A hi‘o na i te maa hotu e te tiare rave rau, te faaite maira ïa i to ’na here e paari. E te ao nui, i to ’na ïa puai.—A taio i te Roma 1:20.

E ite atu â tatou i te huru o te Atua ma te taio i te Bibilia. E faaite mai te reira eaha ta ’na e au e ta ’na e ore e au, to ’na huru i nia i te taata e ta ’na e rave i roto i te mau tupuraa rau.—A taio i te Salamo 103:7-10.

3. E i‘oa anei to te Atua?

Ua parau Iesu: “E to matou Metua i te ao ra, ia raa to oe i‘oa.” (Mataio 6:9) Mea rahi te tiaraa o te Atua, hoê ana‘e râ i‘oa to ’na. E faahitiraa taa ê to to ’na i‘oa i roto i tera e tera reo. I ǒ tatou, o “Iehova” ïa.—A taio i te Salamo 83:18.

I roto e rave rahi Bibilia, ua monohia to te Atua i‘oa e na tiaraa Fatu aore ra Atua. I te papairaahia râ te Bibilia, e itehia te i‘oa o te Atua hau atu i te 7 000 taime. Ua faaite Iesu i to te Atua i‘oa i to ’na haapiiraa i te taata no nia i to ’na Metua.—A taio i te Ioane 17:26.

 4. Te haapeapea maira anei Iehova?

Mai teie papa î i te here, te haa nei te Atua ia oaoa noa tatou

Ua rahi roa te mauiui. Te auraa anei ïa e aita te Atua e haapeapea maira? No vetahi, te haamauiui ra te Atua ia tatou no te haavare, aore ra tamata, ia tatou. Ua hape râ ratou.—A taio i te Iakobo 1:13.

E haafaufaa te Atua i te taata ma te ho atu i te tiamâraa e maiti. Na tatou iho e maiti e tavini ia ’na, e ere anei i te mea faahiahia? (Iosua 24:15) Mea rahi râ tei faaoti e rave ino ia vetahi ê, a rahi atu ai te mauiui. Te oto nei Iehova no teie mau ohipa tano ore.—A taio i te Genese 6:5, 6.

Te haapeapea ra te Atua ra o Iehova no tatou. E hinaaro oia ia oaoa tatou i te oraraa. E fatata oia i te faaore i te mauiui e te feia e faatupu ra i te reira. No te aha râ oia i vaiiho noa ’i i te mauiui? E pahono mai te Haapiiraa 8.—A taio i te Petero 2, 2:9; 3:7, 13.

5. E nafea ia haafatata ’tu â i te Atua?

Te ani maira Iehova ia haafatata ’tu ia ’na na roto i te pure. Te tâu‘a ra oia ia tatou taitahi. (Salamo 65:2; 145:18) Ua ineine oia i te faaore i te hara. Te ite nei oia e te tutava ra tatou i te faaoaoa ia ’na noa ’tu to tatou huru tia ore. E nehenehe iho â e fana‘o i te taairaa piri e te Atua.—A taio i te Salamo 103:12-14; Iakobo 4:8.

Na Iehova i ho mai i te ora. Ia rahi a‘e ïa to tatou here ia ’na i te tahi atu. (Mareko 12:30) Ia faaite oe i to here i te Atua ma te haapii â no nia ia ’na e ma te rave i to ’na hinaaro, e piri roa ’tu â oe ia ’na.—A taio i te Timoteo 1, 2:4; Ioane 1, 5:3.

No te ite atu â

E i‘oa anei to te Atua?

Mea rahi to te Atua tiaraa, mai te tiaraa Manahope, Atua poiete, e Fatu. Ua faahitihia râ te i‘oa o te Atua hau atu i te 7 000 taime i roto i te Bibilia.