Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Parau apî oaoa a te Atua

 HAAPIIRAA 4

O vai Iesu Mesia?

O vai Iesu Mesia?

1. Nohea mai Iesu?

No teihea mau huru maitatai i tapiri noa ’tu ai te taata ia Iesu?—MATAIO 11:29; MAREKO 10:13-16.

E ere Iesu mai te tahi atu mau taata. I ora na oia i te ra‘i ei melahi hou a fanauhia mai ai i te fenua. (Ioane 8:23) O ’na ta te Atua i poiete na mua roa, e ua apiti oia i te poieteraa i te tahi atu mau mea atoa. Na Iehova iho i poiete ia ’na i parauhia ’i oia te Tamaiti “fanau tahi” a te Atua. (Ioane 1:14) O ’na atoa te Auvaha a te Atua, ua parauhia hoi oia “te Logo,” aore ra Parau.—A taio i te Maseli 8:22, 23, 30; Kolosa 1:15, 16.

2. No te aha Iesu i haere mai ai i te fenua?

Na te Atua i tono mai i ta ’na Tamaiti mai te ra‘i mai i te fenua. Ua tuu oia i to ’na ora i roto i te opu o Maria, paretenia ati Iuda. E ere ïa to Iesu papa i te hoê taata. (Luka 1:30-35) Ua haere mai oia i te fenua (1) no te haapii i te parau mau no nia i te Atua, (2) no te faaite e nafea ia rave i te hinaaro o te Atua noa ’tu te fifi, e (3) no te horoa i to ’na ora tia roa ei “hoo.”—A taio i te Mataio 20:28.

3. No te aha e hinaaro-mau-hia ’i te hoo?

E aufauhia te hoê hoo no te faaora mai i te hoê taata i te utua pohe. (Exodo 21:29, 30) Aita te Atua i opua na ia ruau e ia pohe te taata. Ua parau hoi oia i te taata matamua ra o Adamu e e pohe oia ia rave oia i ta te Bibilia e parau ra te “hara.” Ahiri Adamu i ore i hara, e ore roa ’tu oia e pohe. (Genese 2:16, 17; 5:5) Ia au i te Bibilia, no ’na i “ô mai” ai te pohe i te ao nei. Ua raea to ’na huaai i te hara e te pohe. E  hinaaro mau â tatou i te hoo no te ora mai i te utua o te pohe.—A taio i te Roma 5:12; 6:23.

O vai tei riro ei hoo no te faaora ia tatou i te pohe? E utua te pohe no ta tatou hara. Aita e taata tia ore e nehenehe e horoa i te hoo no te hara a vetahi ê.—A taio i te Salamo 49:7-9.

4. No te aha Iesu i pohe ai?

E ere Iesu mai ia tatou, aita hoi ta ’na e hara. Ua pohe oia no ta vetahi ê hara. E aroha rahi to te Atua i te huitaata i tono mai ai oia i ta ’na Tamaiti ia pohe no tatou. Mea here atoa na Iesu ia tatou i auraro ai oia i to ’na Metua, a horoa ’i oia i to ’na ora no ta tatou mau hara.—A taio i te Ioane 3:16; Roma 5:18, 19.

5. Te aha nei Iesu?

I te fenua, i faaora na Iesu i te feia ma‘i, i faatia mai na i tei pohe e i tamǎrû na i tei mauiui. Ua faaite ïa oia i ta ’na e rave a muri a‘e no te feia auraro atoa. (Mataio 15:30, 31; Ioane 5:28) I muri a‘e i to Iesu poheraa, ua faaho‘i mai te Atua ia ’na i te ora i te ra‘i. (Ephesia 1:20) Ua tiai atura Iesu i te rima atau o te Atua e tae atu i te taime i horoa ’tu ai Iehova i te mana no te faatere ei Arii o te fenua taatoa. (Hebera 10:12, 13) Te arii nei ïa Iesu i te ra‘i e te faaite haere nei ta ’na mau pǐpǐ i tera parau apî oaoa e ati a‘e te ao nei.—A taio i te Daniela 7:13, 14; Mataio 24:14.

Ua fatata Iesu ei Arii puai i te faaore i te mauiui atoa e te feia e faatupu ra i te reira. E oaoa te feia o te tiaturi ia ’na ma te auraro atu, i te ora i roto i te paradaiso i te fenua.—A taio i te Salamo 37:9-11.

 

No te ite atu â

Te hoo—Te ô rahi roa ’‘e a te Atua

Eaha te hoo? E nafea oe e faufaahia ’i i te pohe o Iesu e te tia-faahou-raa?