Eaha to roto?

Mau faaho'iraa ê

Tapura tumu parau

Ite no Iehova

Tahiti

Parau apî oaoa a te Atua

 HAAPIIRAA 7

Eaha te Basileia o te Atua?

Eaha te Basileia o te Atua?

1. Eaha te Basileia o te Atua?

No te aha mea tano roa e o Iesu te Arii?—MAREKO 1:40-42.

Te Basileia o te Atua, o te faatereraa arii ïa a te Atua i te ra‘i. E haamou te reira i te tahi atu mau faatereraa atoa, a tupu atu ai te hinaaro o te Atua i te ra‘i e i nia i te fenua. E parau apî oaoa teie. Ua hinaaro noa na hoi te taata i te hoê faatereraa maitai mai tera te huru. E tahoê te reira i te taata atoa i te fenua.—A taio i te Daniela 2:44; Mataio 6:9, 10; 24:14.

Ua faatoroa Iehova i ta ’na Tamaiti Iesu Mesia ei Arii o ta ’Na Faatereraa arii.—A taio i te Apokalupo 11:15.

2. No te aha mea tano roa e o Iesu te Arii?

Mea tano roa e o te Tamaiti a te Atua te Arii, mea hamani maitai hoi oia e mea au roa na ’na te parau-tia. (Ioane 1:14) E mana atoa to ’na no te tauturu i te taata no te mea na ’na e faatere i te fenua mai te ra‘i mai. I muri a‘e i to ’na tia-faahou-raa, ua haere oia i nia i te ra‘i e ua parahi i te rima atau o Iehova a tiai noa ’i. (Hebera 10:12, 13) I te pae hopea, ua horoa te Atua ia Iesu i te mana no te faatere.—A taio i te Daniela 7:13, 14.

3. O vai ma te faatere e o Iesu?

O te hoê pǔpǔ parauhia “te feia mo‘a” te faatere e o Iesu i te ra‘i. (Daniela 7:27) Te feia mo‘a i maitihia na mua, o te mau aposetolo taiva ore ïa a Iesu. Ua maiti â Iehova i te tahi mau tane e vahine taiva ore e tae roa mai i teie mahana. Mai ia Iesu, e faatiahia mai ratou ei varua.—A taio i te Ioane 14:1-3; Korinetia 1, 15:42-44.

 Ehia te haere i te ra‘i? Ua parau Iesu ia ratou e “nǎnǎ iti.” (Luka 12:32) To ratou numera, 144 000 ïa. E faatere ratou i te fenua na muri ia Iesu.—A taio i te Apokalupo 14:1.

4. Eaha tei tupu i to Iesu haamataraa i te faatere?

Ua haamata te Faatereraa arii a te Atua i te faatere i te matahiti 1914. * Te ohipa matamua ta Iesu i rave ei Arii, o te huriraa mai ïa ia Satani e ta ’na mau demoni i raro nei i te fenua. Ua riri roa Satani e ua haamata ’tura i te faatupu i te ati na te ao nei. (Apokalupo 12:7-10, 12) Mai reira mai, ua rahi noa ’tu â te ati o te huitaata. Te tama‘i, te o‘e, te ma‘i pee e te aueueraa fenua, e tuhaa ana‘e te reira o te “tapao” e faaite ra fatata te Faatereraa arii i te faaafaro i te mau fifi atoa i nia i te fenua.—A taio i te Luka 21:7, 10, 11, 31.

5. Eaha te ohipa ta te Faatereraa arii a te Atua e rave ra?

Maoti te ohipa pororaa na te ao nei, te haaputuputu ra te Faatereraa arii a te Atua i te hoê nahoa rahi taata no te mau nunaa atoa. E mirioni taata mǎrû te auraro nei i te Arii Iesu. E paruru te Faatereraa arii a te Atua ia ratou ia haamouhia te faanahoraa ino o te ao nei. Te feia atoa e hinaaro e fana‘o i te mau haamaitairaa a te Faatereraa arii a te Atua, ia haapii ïa i te auraro i te Arii Iesu.—A taio i te Apokalupo 7:9, 14, 16, 17.

I te roaraa o na 1 000 matahiti e faatere ai te Faatereraa arii, e tupu te opuaraa matamua a te Atua no te huitaata. E riro te fenua taatoa ei paradaiso. I te hopea, e faaho‘i Iesu i te Faatereraa arii i to ’na Metua. (Korinetia 1, 15:24-26) Ua matau anei oe i te tahi taata ta oe e hinaaro e faaite atu i te poroi o te Faatereraa arii a te Atua?—A taio i te Salamo 37:10, 11, 29.

 

^ par. 6 No te ite atu â no te aha e matahiti faufaa 1914 ia au i te parau tohu Bibilia, a hi‘o i te faataaraa hau 22 i te pae hopea o te buka Eaha ta te Bibilia e haapii mai?

No te ite atu â

EAHA TA TE BIBILIA E HAAPII MAU RA?

Te ora ra anei tatou i te “anotau hopea”?

Hi‘o e nafea te mau ohipa e haerea ta tatou e ite nei e haapapu ai e te ora nei tatou i te “anotau hopea” ta te Bibilia i tohu.

O vai te rave nei i to Iehova hinaaro i teie mahana?

E nafea te mau Ite no Iehova e faanaho ai i te pororaa?

Te pee nei matou i te hi‘oraa o Iesu a vai ai oia i te fenua nei. Eaha te tahi o teie mau huru pororaa?