Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 71

Uiuiraa te mau Pharisea i te taata e matapo na mua ’‘e

Uiuiraa te mau Pharisea i te taata e matapo na mua ’‘e

IOANE 9:19-41

  • UIUIRAA TE MAU PHARISEA I TE TAATA E MATAPO NA MUA ’‘E

  • E “MATAPO” TE MAU ARATAI HAAPAORAA

Aita te mau Pharisea i farii e ua faaaraara Iesu i te mata o te matapo mai to ’na fanauraa mai. Tii a‘era ratou i to ’na na metua, tei ite e e nehenehe raua e tiavaruhia i rapae i te sunago. (Ioane 9:22) Ia ore raua e nehenehe faahou e amuimui i te tahi atu mau ati Iuda, e fifi ïa te utuafare i te pae moni e e hi‘o-ino-hia mai ratou.

Ui maira te mau Pharisea: “Na orua teie tamaiti? E matapo o ’na i to ’na fanauraahia mai? Mea nafea ïa o ’na i ite ai i teie nei?” Pahono atura na metua: “E, na mâua teie tamaiti e e matapo o ’na i to ’na fanauraahia mai. Aita râ mâua i ite mea nafea to ’na iteraa i teie nei, aita atoa mâua i ite na vai i faaaraara i to ’na mata.” Noa ’tu e ua faatia ’tu ta raua na tamaiti i te ohipa i tupu, ua haapao maitai raua i ta raua pahonoraa, a na ô ai: “A ui ia ’na. E ere faahou o ’na i te tamarii. Na ’na iho e pahono ia outou.”—Ioane 9:19-21.

Pii faahou maira ïa te mau Pharisea i te tamaiti e haamǎta‘u maira ia ’na e e haapapuraa ta ratou e faahapa ra ia Iesu. Na ô maira ratou: “A faahanahana i te Atua ma te faaite i te parau mau. Ua ite matou e e taata rave hara tena.” Patoi atura oia i ta ratou pariraa: “Aita vau i ite e e taata rave hara anei o ’na. Ta ’u râ i ite, e matapo vau na mua ’‘e, i teie nei te ite ra vau.”—Ioane 9:24, 25.

Aita te mau Pharisea i tuu, a na ô faahou ai: “Ua aha o ’na ia oe? Mea nafea to ’na faaaraararaa i to oe mata?” Pahono atura te taata taparu ma te taiâ ore: “Ua faaite a‘ena vau ia outou, aita râ outou i faaroo mai. No te aha ïa outou e hinaaro faahou ai e faaroo i ta ’u pahonoraa? Te hinaaro ra outou e riro ei pǐpǐ na ’na?” Faaino maira te mau Pharisea tei riri: “E pǐpǐ oe na tera taata, matou râ, e pǐpǐ ïa na Mose. Ua ite matou e ua paraparau te Atua ia Mose, teie râ taata, aita ïa matou i ite nohea mai o ’na.”—Ioane 9:26-29.

Na ô atura te taata taparu: “Te maere nei au e aita outou i ite nohea mai o ’na, e na ’na hoi i faaaraara i to ’u mata.” Haaferuri maitai atura oia o vai ta te Atua e faaroo e e farii: “Ua ite tatou e eita te Atua e faaroo i te feia rave hara, te taata râ e mǎta‘u i te Atua e e rave i to ’na hinaaro, o ’na ta ’na e faaroo. Aita hoi i faaroohia a‘enei e ua faaaraara te tahi taata i te mata o te hoê matapo mai to ’na fanauraahia mai.” Na ô atura oia: “Ahiri e ere o ’na i te taata no te Atua, aore roa ïa e mea e tia ia ’na ia rave.”—Ioane 9:30-33.

Aita i tia i te mau Pharisea ia patoi i teie haaferuriraa. Faaino maira ratou ia ’na: “Ua fanau-roa-hia oe i roto i te hara, e na oe ïa e haapii mai ia matou?” Tiavaru ihora ratou ia ’na.—Ioane 9:34.

Faaroo ihora Iesu i te ohipa i tupu. I te itearaa mai ia ’na te taata taparu, ui maira oia: “Te tiaturi ra anei oe i te Tamaiti a te taata nei?” Pahono atura teie taata: “E te Fatu, o vai ïa oia e tiaturi ai au ia ’na?” Na ô roa maira Iesu: “Ua ite oe ia ’na, inaha te taata e paraparau nei ia oe, o ’na ïa.”—Ioane 9:35-37.

Parau atura teie taata: “E te Fatu, te tiaturi nei au ia ’na.” Ma te faaroo e te faatura, tipapa ihora oia i raro i mua ia Iesu, tei faahiti i teie parau hohonu: “Ua haere mai au i roto i teie nei ao ia haavahia te taata: ia ite hoi te feia aita e ite nei, e ia riro te feia e ite nei ei matapo.”—Ioane 9:38, 39.

Ua ite te mau Pharisea, to reira atoa, e ere ratou i te matapo. Mai te aha râ te huru o ta ratou hopoia aratai i te pae varua? Ui maira ratou tei inoino: “E matapo atoa anei ïa matou?” Na ô atura Iesu: “Ahiri e matapo outou, aita ïa e hara ta outou. Te parau nei râ outou: ‘Te ite nei matou.’ E ore ïa ta outou hara e faaorehia.” (Ioane 9:40, 41) Ahani e ere ratou i te orometua haapii i Iseraela, eita ïa e maerehia ia patoi ratou ia Iesu te Mesia. Ua ite râ ratou i te ture a Mose, ua hara ïa ratou i to ratou patoiraa ia ’na.