Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 72

Tonoraa Iesu e 70 pǐpǐ e poro

Tonoraa Iesu e 70 pǐpǐ e poro

LUKA 10:1-24

  • MAITIRAA E TONORAA IESU E 70 PǏPǏ E PORO

Tei te hopea matahiti 32, piri i te toru matahiti mai to Iesu bapetizoraahia. Na te Oroa patiaraa tiahapa i Ierusalema mai nei Iesu e ta ’na mau pǐpǐ. Tei pihai iho noa ratou i Ierusalema. (Luka 10:38; Ioane 11:1) I na ono ava‘e e toe ra, e rave Iesu i ta ’na taviniraa i Iudea aore ra i tera ’tu pae o te anavai Ioridana i Perea. Mea faufaa roa ia poro-atoa-hia na reira.

I muri a‘e i te Pasa 30, ua poro Iesu tau ava‘e na Iudea e na Samaria ’tu i te ratereraa. E i te Pasa 31, ua tamata te tahi mau ati Iuda i Ierusalema i te haapohe ia ’na. Hoê matahiti e te afa to Iesu haapiiraa i te taata i te pae apatoerau iho â râ, i Galilea. Mea rahi tei riro mai ei pǐpǐ na ’na. I Galilea, ua faaineine oia i ta ’na mau aposetolo e ua tono ia ratou ma teie faaueraa: “A poro haere ai outou, a na ô atu: ‘Ua fatata mai te Faatereraa arii o te ra‘i.’” (Mataio 10:5-7) I 32, faanaho atura oia i te hoê tere pororaa na Iudea.

No te haamata i teie tere pororaa, ua maiti Iesu e 70 pǐpǐ e ua tono tataipiti ia ratou e poro i te Faatereraa arii na te mau vahi “te rahi mau nei te auhune, mea iti râ te rave ohipa.” (Luka 10:2) Ua na mua ratou ia ’na i te mau vahi i haere atu ai Iesu. Ua faauehia na 70 ia faaora i te ma‘i e ia haaparare i te hoê â poroi ta Iesu e faaite haere ra.

Aita Iesu i faaue i teie mau pǐpǐ ia haapii i te taata i te mau sunago, ia haere râ i ǒ te taata, a na ô ai: “I te mau vahi atoa e tomo ai outou i roto i te hoê fare, a parau atu na mua: ‘Ia vai te hau i roto i teie nei fare.’ Mai te peu e e taata e au i te hau to reira, e vai ïa to outou hau i nia ia ’na.” Eaha ta ratou poroi? Na ô atura Iesu: “A parau atu: ‘Ua fatata mai te Faatereraa arii a te Atua.’”—Luka 10:5-9.

Hoê â faaueraa ta Iesu i horoa i na 70 e i na 12 aposetolo ta ’na i tono piri i te hoê matahiti na mua ’tu. Ua faaara ’tu oia e e ere pauroa te taata te farii ia ratou. Na roto râ i ta ratou mau tutavaraa, e ineine ïa te feia aau farii ia tae mai Iesu i muri iho. Mea rahi hoi tei hinaaro e farerei i te Fatu, a haapiihia ’tu ai ratou e ana.

Aita i maoro, ho‘i maira na 70 taata poro i te Faatereraa arii ia Iesu ra. Faatia maira ratou ma te oaoa: “E te Fatu, ua vî atoa te mau demoni ia matou ia faahiti matou i to i‘oa.” Papu roa, ua oaoa Iesu i teie parau maitai roa. Na ô atura hoi oia: “Te ite ra vau ia Satani i te mairiraa mai te ra‘i mai mai te uira ra. Inaha, ua horoa ’tu vau i te mana ia taataahi outou i te ophi e te pata patia.”—Luka 10:17-19.

Haapapu atura Iesu i ta ’na mau pǐpǐ e e upootia ratou i nia i te mau mea ino, mai te taataahiraa  ei auraa parau i te ophi e te pata patia, e e mairi mai iho â Satani mai te ra‘i mai a muri a‘e. Ua tauturu atoa Iesu i na 70 ia ite eaha te mea faufaa mau â a muri a‘e. Ua na ô oia: “Eiaha . . . e oaoa e ua vî te mau varua ino ia outou, a oaoa râ e ua papaihia to outou i‘oa i te ra‘i.”—Luka 10:20.

Oaoa roa ihora Iesu e arue atura i to ’na Metua i mua i te taata no te faaohiparaa i ta ’na mau tavini haehaa mai teie. Fariu atura oia i ta ’na mau pǐpǐ e na ô atura: “E oaoa te feia e te ite nei to ratou mata i ta outou e ite nei. Te parau atu nei hoi au: Mea rahi te peropheta e te arii tei hinaaro e ite i te mau mea ta outou e hi‘o nei, aita râ i ite, e faaroo atoa i te mau mea ta outou e faaroo nei, aita râ i faaroo.”—Luka 10:23, 24.