Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 80

Te Tiai mamoe maitai e na aua mamoe

Te Tiai mamoe maitai e na aua mamoe

IOANE 10:1-21

  • FAAHITIRAA IESU I TE TIAI MAMOE MAITAI E NA AUA MAMOE

A haapii noa ’i Iesu i te taata i Iudea, ua faahiti oia i te tahi parau ta te feia e faaroo ra ia ’na i taa oioi, te mamoe e te aua mamoe. E auraa parau râ te reira. Ua haamana‘o paha te mau ati Iuda i ta Davida i parau: “O Iehova to ’u tiai, e ore roa vau e ere. Te faataoto nei oia ia ’u i te mau aua heeuri.” (Salamo 23:1, 2) I roto i te tahi atu salamo, ua titau Davida i te nunaa Iseraela: “E tuu i to tatou turi i te aro o tei hamani ia tatou nei, ia Iehova; oia hoi to tatou Atua, o tatou hoi te nǎnǎ no ta ’na ra aua.” (Salamo 95:6, 7) E au iho â te nunaa Iseraela i raro a‘e i te ture a Mose i te hoê nǎnǎ mamoe.

I vai na teie mau “mamoe” i roto i te hoê “aua mamoe,” oia hoi i fanauhia na ratou i raro a‘e i te faufaa i faaauhia ia Iseraela, te ture a Mose. E au te ture a Mose i te hoê aua, o tei faataa ê ia ratou i te mau peu viivii a te mau nunaa aita i raro a‘e i taua faanahoraa ra. Ua hamani ino râ te tahi mau ati Iseraela i te nǎnǎ a te Atua. Ua na ô Iesu: “E parau mau ta ’u e parau atu: O te ore e tomo mai i roto i te aua mamoe na te uputa, o te pauma râ na te tahi atu vahi, e eiâ ïa taua taata ra e te haru. O te tomo mai râ na te uputa, o te tiai mamoe ïa.”—Ioane 10:1, 2.

Ua mana‘o paha te feia e faaroo ra ia Iesu i te mau tane tei faahua parau e o ratou te Mesia, aore ra Kirito. E au ratou i te eiâ e te haru. Eiaha ïa e pee i taua mau haavare ra, ia pee râ i “te tiai mamoe,” no ’na hoi ta Iesu i parau:

“E iriti mai te tiai uputa ia ’na, e faaroo te mau mamoe i to ’na reo, e pii oia i ta ’na iho mau mamoe ma te faahiti i to ratou i‘oa, a aratai atu ai ia ratou i rapae. Ua aratai ana‘e oia i ta ’na iho mau mamoe atoa i rapae, e haere oia na mua ia ratou, a pee mai ai ratou ia ’na, no te mea ua matau ratou i to ’na reo. E ore roa ratou e pee i te hoê taata ê, e horo ê râ, no te mea aita ratou i matau i te reo o te taata ê.”—Ioane 10:3-5.

I faaite a‘ena Ioane Bapetizo, e au i te tiai uputa, e o Iesu ta taua mau mamoe taipe ra i raro a‘e i te ture a Mose e pee e tia ’i. E ua taa i te tahi mau mamoe, i Galilea e i Iudea nei, i to Iesu reo. Ua “aratai atu” oia “ia ratou i rapae” i te aha? Eaha ta ratou i fana‘o i te peeraa ia ’na? Ua maere paha vetahi i te faarooraa i teie faahoho‘araa, aita hoi “i taa ia ratou te auraa o ta ’na e parau atu ra.”—Ioane 10:6.

Faataa ’tura Iesu: “E parau mau ta ’u e parau atu: O vau te uputa e na reira te mau mamoe e haere ai i roto e i rapae. Te feia atoa tei haere mai ma te parau e o ratou te tiai mamoe mau, e eiâ ïa e te haru. Aita râ te mau mamoe i faaroo ia ratou. O vau te uputa. O te na roto atu ia ’u i te tomo, e ora ïa. E haere oia i roto e i rapae, a ite atu ai i te vahi e aihere to reira ei maa na ’na.”—Ioane 10:7-9.

Papu maitai, te omua ra Iesu i te tahi ohipa apî. Ua ite te feia e faaroo ra ia ’na e e ere o ’na te uputa o te faufaa i faaauhia ia Iseraela, te ture a Mose, tei vai na ahia hanere matahiti. Te parau ra râ oia e e tomo te mau mamoe ta ’na e aratai i rapae i roto i te tahi atu aua mamoe. Eaha ïa tei tupu mai?

Faataa maitai atura Iesu i ta ’na hopoia: “Ua haere mai au ia noaa ia ratou te ora e ia ora maoro atu â. O vau te tiai mamoe maitai. E horoa te tiai mamoe maitai i to ’na ora no te mau mamoe.” (Ioane 10:10, 11) I tamahanahana na oia i ta ’na mau pǐpǐ i teie parau: “Eiaha e mǎta‘u, nǎnǎ iti, ua faaoti hoi to outou Metua i te horoa ’tu i te Faatereraa arii na outou.” (Luka 12:32) O te “nǎnǎ iti” te feia ta Iesu e aratai i roto i te hoê aua mamoe apî, ia “noaa ia ratou te ora e ia ora maoro atu â.” E haamaitairaa mau â te ôraa i roto i taua nǎnǎ iti ra.

 E ere râ teie te parau hopea a Iesu. Na ô atura oia: “E mamoe ê atu ta ’u, e ere i to teie nei aua. Ia aratai atoa mai au ia ratou e tia ’i, e faaroo mai ratou i to ’u reo, a riro atu ai ei hoê noa nǎnǎ, hoê noa tiai.” (Ioane 10:16) E ere teie mau “mamoe ê atu” i “to teie nei aua.” No te tahi atu aua ratou, taa ê i te aua o te “nǎnǎ iti” o te fatu i te Faatereraa arii. E tiaturiraa ê to teie na aua mamoe e piti. Noa ’tu râ, e fana‘o te mau mamoe o na aua e piti i te maitai o ta Iesu hopoia. Ua parau oia: “Mea here na te Metua ia ’u, no te mea e horoa vau i to ’u ora.”—Ioane 10:17.

Pahono maira e rave rahi: “E demoni to ’na e ua maamaahia o ’na.” Faaite maira râ te tahi atu e te faaroo ra ratou ma te aau tae e ua ineine ratou i te pee i te Tiai mamoe maitai. Ua parau ratou: “E ere teie mau parau na te hoê taata e demoni to ’na. E nehenehe anei te hoê demoni e faaaraara i te mata o te matapo?” (Ioane 10:20, 21) Te parau ra ratou i to Iesu faaaraararaa i te mata o te hoê matapo mai to ’na fanauraa mai.