Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 66

I Ierusalema no te Oroa patiaraa tiahapa

I Ierusalema no te Oroa patiaraa tiahapa

IOANE 7:11-32

  • HAAPIIRAA IESU I TE TAATA I TE HIERO

Ua matau-maitai-hia Iesu mai to ’na bapetizoraahia mai. E tausani ati Iuda tei ite mata i ta ’na mau semeio, e ua atutu te parau o ta ’na mau ohipa. I te Oroa patiaraa tiahapa i Ierusalema, mea rahi te paimi ra ia ’na.

Ua rau te mana‘o o te taata ia Iesu. No vetahi: “E taata maitai o ’na.” No te tahi atu: “E ere, te haavare nei hoi oia i te nahoa.” (Ioane 7:12) I te mau mahana matamua o te oroa i paraparau mǎrû noa ’i te tahi i te tahi no Iesu. Aita râ hoê a‘e i paraparau no ’na i mua i te taata no to ratou mǎta‘u i te mau aratai ati Iuda.

E tae a‘era i ropu i te oroa, pauma ’tura Iesu i te hiero. Mea rahi tei maere i to ’na ite rahi i te haapii i te taata. Aita oia i haere a‘enei i te haapiiraa a te mau Rabi. Mana‘o a‘era ïa te ati Iuda: “Nohea mai te ite o teie taata i te mau Papai, aita hoi oia i haere i te haapiiraa?”—Ioane 7:15.

Faataa ’tura Iesu: “E ere na ’u iho ta ’u e haapii nei, na tei tono mai râ ia ’u. Ia opua te hoê taata e rave i te hinaaro o te Atua, e ite oia e no ǒ mai anei i te Atua ra ta ’u e haapii nei aore ra o to ’u iho mau mana‘o ta ’u e faahiti nei.” (Ioane 7:16, 17) Te tuati ra ta Iesu haapiiraa e te ture a te Atua ia Mose. Papu maitai ïa e o te Atua ta ’na e hinaaro ra ia faahanahanahia, eiaha râ o ’na.

Na ô atura Iesu: “Ua horoa ’tu Mose i te ture ia outou, e ere anei? Aita râ hoê a‘e o outou e haapao ra i te ture a Mose. Eaha outou e imi ai i te haapohe ia ’u?” Aita vetahi o te nahoa, te mau ratere paha no te tahi atu mau vahi, i ite e te imi ra vetahi i te haapohe ia Iesu. No ratou, aita hoê a‘e taata e hinaaro e haapohe i te hoê orometua mai ia ’na. Mana‘o a‘era ïa ratou e ua hape Iesu. Parau maira ratou: “E demoni to oe. O vai teie e imi nei i te haapohe ia oe?”—Ioane 7:19, 20.

Hoê matahiti e te afa na mua ’tu, i imi na te mau aratai ati Iuda i te haapohe ia Iesu i muri iho i to ’na faaoraraa i te ma‘i o te hoê taata i te Sabati. Faahiti ihora Iesu i te tahi parau o te haaferuri ia ratou, a faaite roa ’tu ai e mana‘o tano ore to ratou. Parau ihora oia e i raro a‘e i te ture a Mose, e peritomehia te hoê aiû tamaroa i te va‘u o te mahana, noa ’tu e Sabati. Ui atura oia: “Ia peritome outou i te tamarii tamaroa i te Sabati ia ore te ture a Mose ia ofatihia, eaha ïa outou e hae mai ai ia ’u no to ’u faaora-roa-raa i te ma‘i o te hoê taata i te Sabati? A faaea i te haava ma te haapao i te huru rapaeau, a haava râ ma te parau-tia.”—Ioane 7:23, 24.

Parau a‘era vetahi no Ierusalema tei ite i te ohipa i tupu: “Teie te taata ta ratou [te mau raatira] e imi nei i te haapohe, e ere anei? A hi‘o na râ, te paraparau nei oia i te vahi taata e aita ratou e parau noa ’‘e ra ia ’na. Aita paha ïa i papu i to matou mau raatira e o te Mesia teie.” No te aha hoi te taata i ore ai i tiaturi e o Iesu te Mesia? Na ô a‘era ratou: “Ua ite . . . [tatou] nohea mai teie taata. Ia haere mai râ te Mesia, aore roa ïa e taata e ite nohea mai o ’na.”—Ioane 7:25-27.

Parau atura Iesu, tei te hiero â: “Ua ite outou ia ’u e ua ite outou nohea mai au. Aita vau i haere mai ia au i to ’u iho hinaaro, te vai mau nei râ tei tono mai ia ’u e aita outou i ite ia ’na. Ua ite au ia ’na no te mea e tia vau no ’na, e na ’na i tono mai ia ’u.” (Ioane 7:28, 29) No teie parau maramarama maitai, tamata a‘era vetahi i te haru ia Iesu no te tuu anei ia ’na i roto i te fare tapearaa aore ra no te haapohe ia ’na. Aita râ te reira i tupu, no te mea aita â te taime e pohe ai Iesu i tae mai atura.

Mea rahi râ tei tiaturi ia Iesu no te ohipa mana e rave rahi ta ’na i faatupu. Ua haere oia na nia i te miti, ua pohe te mata‘i ia ’na, ua faatamaa  semeio oia e tausani taata e maa faraoa e maa i‘a noa, ua ora te ma‘i, ua haere te pirioi, ua araara te mata o te matapo, ua ora te lepera, e ua tia atoa mai te feia pohe. Ua tano ïa ratou i te parauraa: “Ia tae mai te Mesia, eita e rahi a‘e ta ’na semeio e rave i ta teie taata e rave nei.”—Ioane 7:31.

I to te mau Pharisea faarooraa i te nahoa i te na reiraraa i te parau, tono maira ratou e te mau tahu‘a tiaau i te mau tiai e haru ia Iesu.