Eaha to roto?

Tapura tumu parau

 PENE 78

Ia ineine noa oe, tiaau haapao maitai!

Ia ineine noa oe, tiaau haapao maitai!

LUKA 12:35-59

  • IA INEINE NOA TE TIAAU HAAPAO MAITAI

  • HAERERAA MAI IESU NO TE FAATUPU I TE AMAHAMAHA

Ua faataa Iesu e e “nǎnǎ iti” noa te parahi i roto i te Faatereraa arii o te ra‘i. (Luka 12:32) Ia haafaufaahia râ teie haamaitairaa faahiahia mau. Haapapu atura oia e ei huru feruriraa e tano to te hoê taata e ô ai oia i roto i te Faatereraa arii.

A‘o atura Iesu i ta ’na mau pǐpǐ ia ineine noa ratou no to ’na ho‘iraa mai, a na ô ai: “Ia ineine outou e ia ama noa ta outou mori, e ia riro outou mai te feia e tiai ra i to ratou fatu ia ho‘i mai na te faaipoiporaa mai, no te iriti atu i te opani ia tae mai oia e ia patoto mai. E oaoa taua mau tavini ra ia roohia mai ratou e te fatu te ara ra ratou!”—Luka 12:35-37.

Ua taa oioi i te mau pǐpǐ te huru feruriraa ta Iesu e faahiti ra i roto i ta ’na faahoho‘araa. Ua ineine te mau tavini, a tiai noa ’i i to ratou fatu ia ho‘i mai. Faataa ’tura Iesu: “Ia haere mai [te fatu] i te piti o te araraa [mai te area hora iva i te po e tae atu i te tuiraa po], i te toru atoa [mai te tuiraa po e tae atu i te area hora toru i te aahiata], a ite atu ai e te ara ra ratou, e oaoa ïa ratou!”—Luka 12:38.

Aita noa Iesu e a‘o atu ra ia rohi te mau tavini fare, aore ra rave ohipa. Mea maramarama maitai te reira i to Iesu, te Tamaiti a te taata, faahitiraa ia ’na iho i roto i te faahoho‘araa. Ua parau oia i ta ’na mau pǐpǐ: “Outou atoa, ia ineine noa ïa, no te mea i te hora mana‘o-ore-hia e outou e haere mai ai te Tamaiti a te taata.” (Luka 12:40) E haere mai iho â Iesu. Te hinaaro ra oia ia ineine ta ’na mau pǐpǐ, hau atu â te “nǎnǎ iti.”

Hinaaro ihora Petero e taa maitai i ta Iesu parau. Ui maira oia: “E te Fatu, no matou anei teie faahoho‘araa ta oe e parau ra aore ra no te taata atoa?” Aita Iesu i pahono roa ’tu i ta Petero uiraa, ua horoa ’tu râ i te hoê â huru faahoho‘araa: “O vai hoi te tiaau haapao maitai e te paari ta to ’na fatu e faatoroa i nia i ta ’na mau tavini atoa no te horoa noa na ratou i te maa e navai i te taime tano? E oaoa taua tavini ra ia tae mai to ’na fatu a ite atu ai e te na reira ra oia! Oia mau ta ’u e parau atu: E faatoroa oia ia ’na ei tiaau i ta ’na mau faufaa atoa.”—Luka 12:41-44.

Papu maitai o Iesu, te Tamaiti a te taata, “te fatu” o te faahoho‘araa matamua. E “te tiaau haapao maitai,” o te mau tane ïa o te “nǎnǎ iti” o te horoahia ’tu te Faatereraa arii. (Luka 12:32) Te parau ra Iesu i ǒ nei e na te tahi mau mero o teie pǔpǔ e horoa na “ta ’na mau tavini atoa” i ta ratou “maa e navai i te taime tano.” E nehenehe ïa Petero e te tahi atu mau pǐpǐ ta Iesu e haapii ra e e faatamaa ra i te pae varua e taa e te vai ra te hoê tau e haere mai ai te Tamaiti a te taata. E i taua tau ra, e ravehia te hoê faanahoraa no te faatamaa i te pae varua i te mau pǐpǐ a Iesu, te “mau tavini atoa” a te Fatu.

Ua haapapu â Iesu e ia vai ara ta ’na mau pǐpǐ e ia haapao maitai i to ratou huru feruriraa e haerea. E nehenehe hoi te tahi e riro ei mea tâu‘a ore, a patoi atoa ’tu ai i to ’na mau taeae e tuahine: “Ia parau noa ’tu râ taua tavini ra i roto i to ’na aau: ‘Ua maoro to ’u fatu,’ a rutu atu ai i te mau tavini tane e te mau tavini vahine, a tamaa, a inu e a taero atu ai, e haere mai te fatu o taua tavini ra i te mahana mana‘o-ore-hia e ana e i te hora aita oia i ite, e e faautua ia ’na i te utua ino mau, a amui atu ai ia ’na i te feia taiva.”—Luka 12:45, 46.

Ua parau Iesu e ua haere mai oia “e tutui i te auahi i nia i te fenua.” Ua na reira iho â oia ma te faahiti i te tahi mau parau o te faatupu i te aimârôraa u‘ana e au i te auahi, a ite-maitai-hia  ’tu ai eaha te mau haapiiraa hape e te mau tutuu tano ore. E faataa ê atoa te reira i te mau taata tei mana‘ohia e vai hoê noa ratou, a “patoi [atu ai] te metua tane i te tamaiti e te tamaiti i te metua tane, te metua vahine i te tamahine e te tamahine i te metua vahine, te metua hoovai vahine i te hunoa vahine e te hunoa vahine i te metua hoovai vahine.”—Luka 12:49, 53.

Te paraparau ra Iesu i ta ’na mau pǐpǐ. Fariu atura oia i te nahoa, aita te rahiraa i farii no to ratou aau etaeta i te haapapuraa e o ’na te Mesia. Na ô atura oia: “Ia ite outou i te hoê ata ia hiti mai i tooa o te râ, e parau outou: ‘Ua fatata te vero,’ e tera iho â. E ia farara mai te mata‘i no apatoa mai, e na ô outou: ‘E mahana veavea roa ïa,’ e tera iho â. Haavarevare ma, ua ite outou eaha te huru o te mahana ia hi‘o outou i te fenua e te ra‘i, no te aha râ outou i ore ai i ite i te auraa o te mau mea e tupu nei i teie tau?” (Luka 12:54-56) Aita iho â ratou i ineine.