Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 74

Haapiiraa no nia i te farii-maitai-raa e te pure

Haapiiraa no nia i te farii-maitai-raa e te pure

LUKA 10:38–11:13

  • HAERERAA IESU I Ǒ MARETA E MARIA

  • MEA FAUFAA ROA IA TAMAU I TE PURE

Te tia ra te oire rii o Betania i te pae hitia o te râ o te mou‘a Oliveta, e 3 kilometera i te atea i Ierusalema. (Ioane 11:18) I reira Iesu i te haereraa i ǒ Mareta e Maria, e piti tuahine. E hoa ratou to raua taeae o Lazaro no Iesu, e ua farii maitai raua ia ’na.

E haamaitairaa ia tere mai te Mesia i te fare. Hinaaro ihora Mareta e farii maitai ia Iesu, e haamata ’tura i te faaineine e rave rau huru maa. A raverave ai Mareta, te parahi ra to ’na tuahine o Maria i te pae avae o Iesu a faaroo noa ’i i ta ’na mau haapiiraa. I te hoê taime, parau maira Mareta ia Iesu: “E te Fatu, aita oe e ite ra e o vau ana‘e teie e rave nei i te ohipa? A parau na i to ’u tuahine ia tauturu mai ia ’u.”—Luka 10:40.

Aita Iesu i faahapa ia Maria, ua a‘o râ ia Mareta no to ’na haapeapea rahi no te maa: “Mareta, Mareta, te haapeapea roa nei oe no te mea e rave rahi. Mea iti hoi te hinaaro-mau-hia, hoê noa paha. Ua maiti Maria i te mea faufaa, e ore te reira e rave-ê-hia ia ’na.” (Luka 10:41, 42) Oia mau, te faataa maitai ra Iesu e aita e faufaa ia pau rahi te taime no te faaineine e rave rahi maa. Hoê noa, ua ravai.

E mana‘o maitai to Mareta, ua hinaaro hoi oia e farii maitai ia Iesu. A haapeapea rahi ai râ oia no te maa, te ere ra oia i te haapiiraa faufaa roa a te Tamaiti iho a te Atua! Haapapu atura Iesu e e faaotiraa paari ta Maria, o te riro ei maitai vai tamau no ’na e ei haapiiraa ia haamana‘o tatou pauroa.

I te tahi atu taime, ua horoa Iesu i te tahi atu haapiiraa faufaa atoa. Ua ui mai te hoê pǐpǐ: “E te Fatu, haapii na oe ia matou ia pure, mai ta Ioane atoa i haapii i ta ’na mau pǐpǐ.” (Luka 11:1) Piri i te hoê matahiti e te afa na mua ’tu, ua haapii Iesu e nafea ia pure i roto i ta ’na A‘oraa i nia i te mou‘a. (Mataio 6:9-13) Aita râ paha teie pǐpǐ i reira, faahiti faahou atura ïa Iesu i te mau mana‘o faufaa. Horoa ’tura oia i te hoê faahoho‘araa o te haamana‘o ra i te faufaaraa ia tamau i te pure:

“Ahani e hoa to te hoê o outou e haere atura oia ia ’na ra i te tuiraa po e na ô atura: ‘To ’u hoa, horoa mai na e toru faraoa, no tae noa maira hoi hoê o to ’u mau hoa mai to ’na tere mai e aita ta ’u e maa e horoa na ’na.’ Pahono maira râ te hoa na roto mai i te fare: ‘Faaea na i te haapeapea ia ’u. Ua ponao-ê-hia na te opani e tei nia vau i te ro‘i e ta ’u mau tamarii rii. Eita ta ’u e nehenehe e tia i nia, a horoa ’tu ai i te faraoa na oe.’ Te parau atu nei au: E tia mai iho â oia i nia, a horoa ’tu ai i ta to ’na hoa e hinaaro, e ere no te mea e hoa no ’na, no to ’na râ onoono rahi.”—Luka 11:5-8.

Aita Iesu e na ô ra e aita Iehova e hinaaro ra e pahono i ta tatou mau aniraa, mai te hoa o te faahoho‘araa. Mai te peu râ e pahono te hoê hoa horoa atâ no te onoono rahi, hau atu â ïa to tatou Metua î i te here i te ra‘i i te pahono i te mau aniraa aau tae mau a ta ’na mau tavini taiva ore! Na ô faahou atura Iesu: “Te parau atu nei au: A tamau i te ani, e horoahia mai. A tamau i te imi, e itehia mai. A tamau i te patoto, e iritihia mai. Te taata hoi e ani, e noaa ïa ta ’na. Te taata hoi e imi, e itehia ïa ia ’na. Te taata e patoto, e iritihia mai ïa.”—Luka 11:9, 10.

Haapapu atura Iesu i ta ’na haapiiraa ma te faahiti i te parau o te metua: “O vai ïa metua e horoa ’tu i te ophi ia ani mai ta ’na tamaiti i te i‘a? Aore ra e horoa ’tu i te pata patia ia ani atoa mai ta ’na tamaiti i te huero moa? No reira, noa ’tu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa te Metua i te ra‘i i te horoa i te varua mo‘a na te feia e ani atu ia ’na!” (Luka 11:11-13) Mea mahanahana ia ite e te hinaaro ra iho â to tatou Metua e faaroo ia tatou e e haamâha i to tatou mau hinaaro mau!