Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 77

A‘oraa a Iesu no nia i te mau tao‘a rahi

A‘oraa a Iesu no nia i te mau tao‘a rahi

LUKA 12:1-34

  • FAAHOHO‘ARAA O TE TAATA TAO‘A RAHI

  • FAAHITIRAA IESU I TE OREBA E TE LILI

  • E “NǍNǍ ITI” TE Ô I ROTO I TE FAATERERAA ARII

A tamaa ’i Iesu i te fare o te Pharisea, e tausani taata tei ruru i rapaeau mai a tiai noa ’i ia ’na. Ua ruru atoa te nahoa a vai ai oia i Galilea. (Mareko 1:33; 2:2; 3:9) I Iudea nei, mea rahi tei hinaaro e ite e e faaroo ia ’na. E ere ïa ratou mai te mau Pharisea i tamaa e o Iesu.

Mea faufaa roa no ta Iesu mau pǐpǐ ta ’na i parau na mua: “A ara i te hopue a te mau Pharisea, oia hoi te haavarevare.” Ua horoa a‘ena Iesu i teie faaararaa, no ta ’na râ i ite i te tamaaraa, mea ru mau â ia horoa i teie a‘oraa. (Luka 12:1; Mareko 8:15) Ua tamata paha te mau Pharisea i te huna i to ratou ino ma te faahua haamori i te Atua. E fifi râ te taata ia ratou e mea titauhia ia faaite-roa-hia te reira. Faataa ’tura Iesu: “Aita . . . e mea i tapo‘i-maitai-hia e ore e faaitehia, e aita e mea huna e ore e itehia.”—Luka 12:2.

No Iudea paha e rave rahi tei ruru ati a‘e ia Iesu e aita ratou i faaroo a‘enei ia ’na ia haapii i te taata i Galilea. Faahiti faahou atura ïa Iesu i te mau mana‘o faufaa roa ta ’na i parau na mua ’tu. A‘o atura oia i te feia atoa e faaroo ra: “Eiaha e mǎta‘u i te feia e haapohe ia outou. Ia pohe hoi outou, aita ’tu â ta ratou e nehenehe e rave i nia ia outou.” (Luka 12:4) Mai ta ’na i rave na mua ’‘e, ua haapapu oia e ia tiaturi ta ’na mau pǐpǐ e e aupuru te Atua ia ratou, ia farii atoa i te Tamaiti a te taata e ia taa e e tauturu te Atua ia ratou.—Mataio 10:19, 20, 26-33; 12:31, 32.

Faaite maira te hoê tane i rotopu i te nahoa i te mea e haapeapea ra ia ’na: “Orometua, parau na oe i to ’u tuaana ia tufa oia i ta to mâua metua tane i vaiiho mai na mâua.” (Luka 12:13) Ia au i te ture a Mose, e fana‘o te tamaiti matahiapo e piti tuhaa o te faufaa, eita ïa te peapea e tupu. (Deuteronomi 21:17) E au ra râ te hinaaro ra teie tane hau a‘e i tei horoahia na ’na. Ma te paari, aita Iesu i faaô atu ia ’na i roto. Ui atura oia: “Na vai i faatoroa ia ’u ei haava ia orua aore ra ei arai i rotopu ia orua?”—Luka 12:14.

Horoa ’tura Iesu i teie a‘oraa ia ratou pauroa: “A ara e eiaha e nounou i ta vetahi ê tao‘a, no te mea noa ’tu e mea rahi te tao‘a a te hoê taata, eita oia e ora i te reira.” (Luka 12:15) Noa ’tu te rahi o te faufaa a te hoê taata, eita anei oia e pohe i te hoê mahana, a vaiiho mai ai i ta ’na faufaa atoa? Haapapu atura Iesu i taua parau ra ma te hoê faahoho‘araa eita e mo‘ehia o te faaite atoa ra e mea faufaa te i‘oa maitai no te Atua:

“Ua tupu maitai te faaapu a te hoê taata tao‘a rahi. Feruri ihora ïa oia: ‘E nafea râ vau, ua apǐ pauroa hoi ta ’u mau fare haapueraa maa?’ Na ô a‘era oia: ‘Teie ta ’u e rave: E vavahi au i ta ’u mau fare vairaa maa, a hamani atu ai i te mau fare rahi a‘e, i reira hoi au e haapue ai i ta ’u mau sitona atoa e ta ’u mau tao‘a atoa, a na ô atu ai au ia ’u iho: “Mea rahi ta ’u tao‘a i haapue no te matahiti e rave rahi. E faafaaea ïa vau, e tamaa, e inu, a oaoa ’i.”’ Na ô atura râ te Atua ia ’na: ‘Neneva, i teie po e ravehia ’i to oe ora. Tena mau tao‘a ta oe i haapue, e riro ïa ia vai?’ Tera ïa te tupu i nia i te taata o te haapue i te tao‘a na ’na iho, mea veve râ oia i te aro o te Atua.”—Luka 12:16-21.

E nehenehe te mau pǐpǐ a Iesu e te tahi atu e faaroo ra ia ’na e topa i roto i te marei e haapue i te faufaa. E nehenehe atoa te mau haapeapearaa o te oraraa e haafifi i ta ratou taviniraa ia Iehova. Faahiti faahou atura ïa Iesu i teie a‘oraa maitai roa ta ’na i horoa i roto i te A‘oraa i nia i te mou‘a piri i te hoê matahiti e te afa na mua ’tu:

“A faaea i te haapeapea no to outou ora eaha ta outou e amu, aore ra no to outou tino eaha ta outou e oomo. . . . A hi‘o na i te oreba. Eita  teie mau manu e ueue i te huero, e ooti e aita ta ratou e fare vairaa maa. Teie râ, te faaamu ra te Atua ia ratou. E ere anei mea faufaa a‘e outou i tera mau manu? . . . A hi‘o i te mau lili: Eita teie mau tiare e rave i te ohipa, eita atoa e hamani i te ahu. Te parau atu nei râ vau e aita te ahu o te arii Solomona, noa ’tu to ’na unauna rahi, i hau a‘e i te nehenehe i to te hoê o teie mau tiare. . . . A faaea ïa i te haapeapea no ta outou e amu e no ta outou e inu e a faaea i te ahoaho . . . Ua ite . . . to outou Metua e e hinaaro iho â outou i teie mau mea. . . . A tamau i te imi i ta ’na Faatereraa arii, e e horoahia mai teie mau mea na outou.”—Luka 12:22-31; Mataio 6:25-33.

O vai ma te imi i te Faatereraa arii a te Atua? Ua faaite Iesu e mea iti te taata haapao maitai te na reira, e “nǎnǎ iti” ratou. Ua faaitehia to ratou numera i muri a‘e, 144 000 noa. Eaha te tiai mai ra ia ratou? Ua haapapu atu Iesu: “Ua faaoti hoi to outou Metua i te horoa ’tu i te Faatereraa arii na outou.” Aita to ratou feruriraa i nia i te haapueraa i te tao‘a rahi i te fenua nei, e nehenehe e eiâhia. To nia râ to ratou aau i te tao‘a pau ore i te ra‘i, i reira ratou e faatere ai e te Mesia.—Luka 12:32-34.