Eaha to roto?

Tapura tumu parau

 PENE 76

Tamaaraa e te hoê Pharisea

Tamaaraa e te hoê Pharisea

LUKA 11:37-54

  • FAAHAPARAA IESU I TE MAU PHARISEA HAAVAREVARE

I Iudea, ua farii Iesu i te titau-manihini-raa a te hoê Pharisea e tamaa i ǒ ’na. E avatea taua taime ra, e ere te po. (Luka 11:37, 38) Hou a tamaa ’i, e horoi na te mau Pharisea i to ratou rima e tae roa i te poro rima. Aita râ Iesu i na reira. (Mataio 15:1, 2) Eita te horoiraa i te rima mai tera e ofati i te ture a te Atua ia Mose. Aita atoa râ te Atua i titau i te reira.

Maere ihora te Pharisea i ore ai Iesu i pee i teie tutuu. Ua taa ia Iesu te reira e na ô atura: “Te tamâ nei outou te mau Pharisea i te rapaeau o te au‘a e o te farii maa, o roto râ, ua î ïa outou i te nounou e te ino. Neneva ma! Na te Atua i hamani i te rapaeauraa, i te rotoraa atoa ïa, e ere anei?”—Luka 11:39, 40.

E ere te horoiraa i te rima hou a tamaa ’i te fifi, o te huru haavarevare râ i te pae faaroo. Aita te mau Pharisea e te tahi atu o te horoi ra i to ratou rima ia au i te mau peu a te ati Iuda, i tamâ i to ratou aau i te ino. A‘o atura ïa Iesu: “A horoa . . . i te ô aroha hamani maitai ma to outou aau atoa, e inaha e mâ roa outou.” (Luka 11:41) E parau mau iho â! Ia horoa tatou ma te aau î i te here, eiaha râ no te hinaaro ia faahiahia vetahi ê i te hoê huru parau-tia haavarevare.

E ere te auraa e aita teie mau tane e horoa ra. Ua parau Iesu: “Te horoa nei outou i te tuhaa ahuru o te mineta, o te pegano e o te tahi atu mau raau tupu atoa no te faano‘ano‘a i te maa, te haapae nei râ i te parau-tia a te Atua e te faaueraa e here ia ’na! Ia horoa iho â outou i te tuhaa ahuru e tia ’i, eiaha râ e haapae i te parau-tia a te Atua e te faaueraa e here ia ’na.” (Luka 11:42) I titau na te ture a te Atua ia Mose ia horoa i te tuhaa ahuru o te maa i tanuhia. (Deuteronomi 14:22) Oia atoa te mineta, te pegano, e te mau raau tupu no te faano‘ano‘a i te maa. I horoa na iho â te mau Pharisea i te reira. Ua aha râ ratou i te mau titauraa faufaa a‘e o te ture a Mose, mai te raveraa i te parau-tia e te haereraa ma te haehaa i te aro o te Atua?—Mika 6:8.

Na ô faahou atura Iesu: “Ua ati outou te mau Pharisea, no te mea mea au na outou e parahi i mua roa i roto i te mau sunago e ia arohahia outou ma te faatura na te mahora! Ua ati outou, no te mea e au outou i tera mau menema eita e ite-maitai-hia, a taataahi atu ai te taata na nia iho ma te ite ore!” (Luka 11:43, 44) Oia, e nehenehe te avae o te taata e tote i nia iho i taua mau menema ra, a viivii atu ai ratou. Ua faahiti Iesu i te reira no te haapapu e eita te viivii o te mau Pharisea e ite-maitai-hia.—Mataio 23:27.

Pari maira te hoê tane mea ite i te ture a Mose: “Orometua, a na reira ’i oe i te parau, o matou atoa ïa ta oe e faaino nei.” Mea titauhia hoi ia taa i teie mau tane e aita ratou e tauturu ra i te taata. Na ô atura Iesu: “Ua ati atoa outou mea ite i te ture a Mose, no te mea te tuu nei outou i te mau hopoia teimaha ia amo i nia i te taata. Outou râ, e ore ïa hoê o to outou mau manimani rima e tapea i taua mau hopoia ra! Ua ati outou, no te mea te patu nei outou i te mau menema no te mau peropheta, ua taparahi pohe râ to outou mau tupuna ia ratou!”—Luka 11:45-47.

Te mau hopoia ta Iesu e parau ra, o te mau parau tutuu ïa e te tatararaa a te mau Pharisea i te ture a Mose, o te faateimaha ra i te oraraa o te taata. Te onoono ra hoi ratou ia amo te taata atoa i te mau hopoia ta ratou i faateimaha. Ua haapohe to ratou mau tupuna i te mau peropheta a te Atua, mai ia Abela mai â. Te pee ra ïa ratou, o te faahua faatura ra i te mau peropheta ma te patu i te menema no ratou, i te haerea o to ratou mau tupuna e ta ratou mau ohipa. Te imi atoa ra ratou i te haapohe i te Peropheta Rahi a te Atua. Ua parau Iesu e e faautua te Atua i teie  nei u‘i. Ua tupu te reira piri i te 38 matahiti i muri a‘e, i 70.

Na ô atura Iesu: “Outou mea ite i te ture a Mose, ua ati outou, no te mea ua hopoi ê outou i te taviri e noaa ’i te ite. Aita outou iho i tomo atu, e ua tapea outou i te feia i hinaaro e tomo atu!” (Luka 11:52) Ua hopoi ê teie mau tane, na ratou hoi e faataa i te auraa o te Parau a te Atua, i te ravea e ite ai te taata i te Parau a te Atua, a taa ’tu ai i te reira.

Eaha ta te mau Pharisea e papai parau i rave? A haere atu ai Iesu i rapae, mârô maira ratou ia ’na ma te riri e onoono maira i te uiui ia ’na. E ere no te faaroo i ta ’na haapiiraa, no te râmâ râ ia ’na i ta ’na mau parau a tapeahia ’tu ai oia.