Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 70

Araararaa ia Iesu te mata o te hoê matapo mai to ’na fanauraa mai

Araararaa ia Iesu te mata o te hoê matapo mai to ’na fanauraa mai

IOANE 9:1-18

  • ARAARARAA TE MATA O TE HOÊ TAATA TAPARU E MATAPO MAI TO ’NA FANAURAA MAI

Tei Ierusalema â Iesu i te Sabati. A haere ai o ’na e ta ’na mau pǐpǐ na te oire, ite a‘era ratou i te hoê taata taparu e matapo mai to ’na fanauraa mai. Ui maira te mau pǐpǐ ia Iesu: “Rabi, o vai tei hara, teie taata aore ra to ’na na metua, i fanau-matapo-hia mai ai oia?”—Ioane 9:2.

Te uiui ra paha te mau pǐpǐ e hara anei te hoê pêpe i roto i te opu o to ’na mama. Pahono atura Iesu: “Aita teie taata i hara, aita atoa to ’na na metua, na roto râ ia ’na e itehia ’i te mau ohipa a te Atua.” (Ioane 9:3) Aita ïa teie taata, aita atoa to ’na na metua i rave i te tahi hapa aore ra hara i matapo ai teie taata. No te hara râ a Adamu i fanauhia ’i pauroa te taata i roto i te hara e i roohia ’i i te ma‘i, mai te matapo. E faaohipa râ Iesu i te matapo o taua taata ra ei ravea e itehia ’i te mau ohipa a te Atua, mai ta ’na i rave na a faaora ’i oia i te ma‘i.

Haapapu atura Iesu e mea ru ia rave i teie mau ohipa: “Ia rave tatou i te mau ohipa a tei tono mai ia ’u e tia ’i e te ao noa ra. Ua fatata hoi i te po, aore roa e taata e tia ia rave i te ohipa. A vai noa ’i au i roto i teie nei ao, o vau te maramarama o teie nei ao.” (Ioane 9:4, 5) Fatata hoi Iesu i te pohe, a vai atu ai oia i roto i te poiri o te apoo, aita e ohipa i reira. A tiai noa ’i i taua taime ra, o ’na te tumu o te maramarama no to te ao.

E faaaraara anei râ Iesu i te mata o taua taata ra? Mai te peu e e, e nafea oia? Tutuha ihora oia i raro, ôi ihora i te repo e te huare, parai atura i nia i te mata o taua taata ra e na ô atura: “A haere a horoi i to mata i te pape hopu o Siloama.” (Ioane 9:7) Na reira ihora taua taata ra, e nehenehe ihora e ite! Eita e ore e ua oaoa oia a tahi ra hoi oia a ite ai!

Maere ihora te feia tapiri e te tahi atu tei ite e e matapo o ’na. Ui a‘era ratou: “E ere anei teie te taata tei parahi noa na a taparu haere ai?” Pahono maira vetahi: “O ’na iho â.” Aita râ te tahi atu i tiaturi e na ô maira: “E ere, hoho‘a râ raua.” Na ô maira te taata taparu: “O vau iho â.”—Ioane 9:8, 9.

Ui maira ratou: “Mea nafea ïa to oe mata i te araararaa?” Pahono ihora oia: “Ua ôi te taata o Iesu te i‘oa i te repo e te huare, ua parai maira i nia i to ’u mata e ua na ô maira: ‘A haere i Siloama e horoi i to mata.’ Haere atura vau, horoi ihora i to ’u mata e ite a‘era vau.” Ui maira ratou: “Teihea tena taata?” Pahono ihora oia: “Aita vau i ite.”—Ioane 9:10-12.

Arataihia ’tura taua taata ra i te mau Pharisea ra, tei hinaaro atoa e ite mea nafea to ’na iteraa. Na ô atura oia ia ratou: “Ua parai oia i nia i to ’u mata i te repo e te huare ôihia, horoi ihora vau i to ’u mata e ite a‘era vau.” Mea tano iho  â ia oaoa te mau Pharisea no taua taata taparu ra. Aita râ, faaino a‘era vetahi ia Iesu: “E ere tena taata no te Atua, no te mea aita oia e faatura ra i te Sabati.” Parau a‘era râ te tahi atu: “E nafea e tia ’i i te hoê taata rave hara ia rave i te semeio mai tera te huru?” (Ioane 9:15, 16) Amahamaha a‘era ïa ratou.

No te tu ore o to ratou mau mana‘o, fariu a‘era ratou i te taata ua araara to ’na mata e ui maira: “Eaha ta oe e parau no ’na, na ’na hoi i faaaraara i to oe mata?” Mea papu to ’na mana‘o no nia ia Iesu e pahono ihora oia: “E peropheta oia.”—Ioane 9:17.

Aita te ati Iuda i hinaaro e tiaturi i taua parau ra. Ua mana‘o paha ratou e ua opua Iesu e teie taata e haavare i te taata. Mana‘o a‘era ratou e ui i na metua o te taata taparu e matapo iho â anei o ’na na mua ’‘e.