Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 69

O Aberahama anei to ratou metua aore ra te Diabolo?

O Aberahama anei to ratou metua aore ra te Diabolo?

IOANE 8:37-59

  • PARAURAA TE ATI IUDA O ABERAHAMA TO RATOU METUA

  • I VAI NA IESU HOU ABERAHAMA

I Ierusalema â no te Oroa patiaraa tiahapa, ua haapii noa Iesu i te taata i te pue parau mau faufaa roa. No parau mai nei vetahi ati Iuda ia ’na: “E tamarii matou na Aberahama e aore roa matou i riro a‘enei ei tîtî.” Pahono atura Iesu: “Ua ite au e e tamarii outou na Aberahama, te imi nei râ outou i te haapohe ia ’u, no te mea aita outou e farii ra i ta ’u parau. Te mau mea ta ’u i ite a ora ’i au i pihai iho i to ’u Metua ra, o ta ’u ïa e parau. Outou râ, te rave nei ïa i te mau mea ta outou i faaroo i to outou metua.”—Ioane 8:33, 37, 38.

Mea ohie ia taa i ta Iesu haapiiraa: E ere hoê â Metua to ’na e to ratou. No te taa ore i ta Iesu parau, na ô faahou maira te ati Iuda: “O Aberahama to matou metua.” (Ioane 8:39; Isaia 41:8) E huaai iho â ratou no Aberahama. No reira ratou i mana‘o ai e hoê â Atua to ratou e to Aberahama, te hoa o te Atua.

Horoa ’tura râ Iesu i teie pahonoraa maere mau: “E tamarii outou na Aberahama, a rave ïa i te mau ohipa a Aberahama.” E pee iho â te hoê tamaiti i te huru o to ’na metua tane. Na ô faahou atura Iesu: “Teie râ te imi nei outou i te haapohe ia ’u, tei faaite atu i te parau mau ta ’u i faaroo i te Atua. Aita Aberahama i na reira.” Parau atura Iesu i te hoê parau mea fifi no ratou ia taa: “Te rave nei outou i te mau ohipa a to outou metua.”—Ioane 8:39-41.

Aita â i taa ’tura i te ati Iuda o vai ta Iesu e parau ra. Parau maira ratou e e tamarii tiamâ ratou, a na ô ai: “Aita matou i fanauhia i roto i te peu tia ore. Hoê ana‘e to matou Metua, o te Atua.” O te Atua iho â anei râ to ratou Metua? Parau atura Iesu: “Ahiri o te Atua to outou Metua, e here ïa outou ia ’u, na te Atua hoi i tono mai ia ’u i ǒ nei. Aita vau i haere mai na nia noa i to ’u mana‘o, na ’na râ i tono mai ia ’u.” Na ô atura oia: “Aita outou e hinaaro ra e farii i ta ’u parau, no reira outou e ore ai e taa i ta ’u e parau nei.”—Ioane 8:41-43.

Ua tamata Iesu i te faaite eaha te mau faahopearaa ia ore ratou e farii ia ’na. Na ô roa ’tura râ oia: “O te Diabolo to outou metua e te hinaaro ra outou e rave i te hinaaro o to outou metua.” Mai te aha te huru o to ratou metua? Parau roa ’tura Iesu: “E taparahi taata oia i to ’na haamataraa, e aita oia i mau papu i roto i te parau mau.” Na ô faahou atura oia: “Te taata no te Atua ra, e faaroo ïa i te mau parau a te Atua. Outou râ, aita ïa e faaroo ra, no te mea e ere outou i te taata no te Atua.”—Ioane 8:44, 47.

Riri ihora te ati Iuda e pahono maira: “Ua tano iho â ïa to matou parauraa e e taata Samaria oe e e demoni to oe, e ere anei?” Te vahavaha ra ratou ia Iesu ma te parau e “e taata Samaria” o ’na. Aita râ Iesu i tâu‘a i ta ratou parau faaino. Pahono atura oia: “Aita e demoni to ’u, te faatura nei râ vau i to ’u Metua, e te faaino nei outou ia ’u.” Mea ino mau ia faaino ia Iesu, ua faahiti hoi oia i teie parau fafau maere: “O te haapao i ta ’u parau, e ore roa ïa e pohe.” Aita oia e parau ra e e ore roa te mau aposetolo e te tahi atu o te pee ra ia ’na e pohe. E ore roa râ ratou e roohia i te haamouraa mure ore, “te piti o te pohe,” aita e tiaturiraa o te tia-faahou-raa.—Ioane 8:48-51; Apokalupo 21:8.

Aita râ i taa i te ati Iuda e e auraa parau ta Iesu. Na ô maira ratou: “I teie nei, ua papu atura ia matou e e demoni to oe. Ua pohe Aberahama e te mau peropheta atoa, e te parau nei oe: ‘O te haapao i ta ’u parau, e ore roa ïa e pohe.’ Mea faufaa a‘e oe i to matou metua o Aberahama tei pohe? . . . O vai hoi oe?”—Ioane 8:52, 53.

Mea papu e te haapii atu ra Iesu e o ’na te Mesia. Aita râ oia i pahono roa ’tu i ta ratou uiraa  o vai o ’na. Na ô atura oia: “Ia faahanahana vau ia ’u iho, e hanahana faufaa ore ïa to ’u. Na to ’u Metua e faahanahana ra ia ’u, o ’na ta outou e parau ra to outou Atua. Teie râ aita outou i ite o vai o ’na. O vau râ, ua ite ïa o vai o ’na. Ahiri au i parau e aita vau i ite o vai o ’na, e haavare ïa vau mai ia outou.”—Ioane 8:54, 55.

Faahiti faahou atura Iesu i te hi‘oraa o to ratou tupuna haapao maitai: “Ua oaoa roa Aberahama to outou metua i te tiaturiraa e ite i to ’u mahana. Ua ite oia e ua oaoa.” Oia mau, no to ’na tiaturi i ta te Atua i fafau, ua tiai ru Aberahama i te Mesia. Na ô maira te ati Iuda aita e tiaturi ra i ta ’na i parau: “Aita â to oe i 50 matahiti atura, e ua ite ïa oe ia Aberahama?” Pahono atura Iesu: “E parau mau ta ’u e parau atu: Aita â Aberahama i fanauhia ’tura, i vai na vau.” Te parau ra oia i to ’na oraraa na mua ’‘e i nia i te ra‘i ei varua puai.—Ioane 8:56-58.

Riri ihora te ati Iuda no ta Iesu parau e i ora na oia hou Aberahama, e ohi a‘era i te ofai no te pehi ia ’na. Tapuni atura râ Iesu aita i pepe a‘e.