Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 39

Ua ati te hoê u‘i tâu‘a ore

Ua ati te hoê u‘i tâu‘a ore

MATAIO 11:16-30 LUKA 7:31-35

  • FAAHAPARAA IESU I TE TAHI MAU OIRE

  • PÛPÛRAA OIA I TE TAMǍRÛRAA E TE TAMAHANAHANARAA

Mea faatura roa Iesu ia Ioane Bapetizo. Eaha râ te mana‘o o te rahiraa ia Ioane? Te na ô ra Iesu: “E faaau vau i teie nei u‘i ia vai? E au ratou i te mau tamarii rii e parahi ra na te mahora e e pii ra i te tahi atu mau tamarii, a na ô ai: ‘Ua faata‘i matou i te vivo no outou, aita râ outou i ori. Ua himene matou ma te oto, aita râ outou i tupaipai i to outou ouma.’”—Mataio 11:16, 17.

Eaha te auraa o ta Iesu mau parau? Faataa maitai ihora oia: “Ua haere mai Ioane e aita i tamaa e i inu i te uaina, ua parau râ te taata: ‘E demoni to ’na.’ Ua haere mai te Tamaiti a te taata nei e ua tamaa e ua inu, ua parau râ te taata: ‘Inaha, mea tamaa roa teie taata ma te haapuupuu, mea inu i te uaina, e hoa no te feia titau tute e te feia rave hara.’” (Mataio 11:18, 19) E oraraa haihai noa to Ioane te hoê Nazira, a ore ai i inu i te uaina. Ua parau râ teie nei u‘i e e demoni to ’na. (Numera 6:2, 3; Luka 1:15) O Iesu râ, i ora na oia mai te tahi atu mau taata. I tamaa na oia e i inu atoa na ma te au noa. Ua parihia râ oia i te tamaa rahi e i te inu hua. Eita iho â te taata e mauruuru hanoa.

Ua faaau Iesu i te u‘i i te mau tamarii rii na te mau mahora aita i hinaaro e ori a faata‘i ai te tahi atu mau tamarii i te vivo, aita atoa i oto a auê ai te tahi atu. Na ô ihora Iesu: “Na te mau ohipa parau-tia ta te hoê taata e rave e haapapu e e taata paari oia.” (Mataio 11:16, 19) Oia mau, na te mau “ohipa,” oia hoi te haapapuraa a Ioane e a Iesu, e faaite mai e mea hape te mau parau i parihia ’i raua.

I muri iho i to Iesu faataaraa i te u‘i ei u‘i tâu‘a ore, faahapa ihora oia i na oire o Korazina, Betesaida e Kaperenaumi, i reira hoi to ’na raveraa i te mau ohipa mana. Ua parau Iesu e ahiri oia i rave i taua mau ohipa mana ra i Turia e Sidona i Phenikia, ua tatarahapa ïa to taua na oire ra. Ua faahiti atoa oia ia Kaperenaumi, i reira hoi oia i te raveraa i ta ’na taviniraa. I reira atoa, aita te rahiraa o te taata i tâu‘a mai. Na ô ihora oia no taua oire ra: “Mea mâmâ a‘e te utua a te fenua o Sodoma i ta outou i te Mahana Haavaraa.”—Mataio 11:24.

Arue ihora Iesu i to ’na Metua, o te huna i te pue parau mau pae varua faufaa roa “i te feia paari e te maramarama,” o te faaite râ i te reira i te feia haehaa e au i te tamarii rii. (Mataio 11:25) Faatae ihora oia i teie titau-manihini-raa au mau i taua feia haehaa ra: “A haere mai ia ’u nei outou atoa e rohirohi e e teimaha nei, na ’u e tamahanahana ia outou. A rave mai i ta ’u zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa. Mea mǎrû hoi ta ’u zugo, e mea mâmâ ta ’u hopoia.”—Mataio 11:28-30.

Mea nafea Iesu i horoa ’i i te tamahanahanaraa? Ua faateimaha te mau aratai haapaoraa i te taata i te mau tutuu, mai te mau faatureraa etaeta roa no nia i te Sabati. Ua tamahanahana râ Iesu i taua mau taata ra ma te haapii atu i te parau mau no nia i te Atua, aita roa ’tu taua mau tutuu ra i roto. Ua faaite atoa oia e nafea te feia e haavîhia ra e te faatereraa a te mau tia poritita e te feia atoa e teimaha ra no te hara, e fana‘o ai i te tamǎrûraa. Ua faaite roa ’tu Iesu e nafea ta ratou mau hara e faaorehia ’i e e nafea ratou e faahau ai e te Atua.

Te feia atoa e farii i te zugo mǎrû a Iesu, e nehenehe ïa e pûpû ia ratou i te Atua, to tatou Metua aumihi e te aroha hamani maitai i te ra‘i, a tavini atu ai ia ’na. E ere i te hopoia teimaha, e ere roa ’tu hoi mea teimaha te mau titauraa a te Atua.—Ioane 1, 5:3.