Eaha to roto?

Tapura tumu parau

 PENE 51

Taata tei pohe i te hoê oroa fanauraa

Taata tei pohe i te hoê oroa fanauraa

MATAIO 14:1-12 MAREKO 6:14-29 LUKA 9:7-9

  • FAAUERAA HERODA IA TÂPÛHIA TE UPOO O IOANE BAPETIZO

A rave ai te mau aposetolo a Iesu i ta ratou taviniraa i Galilea, to roto noa â Ioane Bapetizo, tei parau e o Iesu te Arenio a te Atua, i te fare tapearaa fatata e piti matahiti.

I parau roa na hoi Ioane e aita i tano to te arii Heroda Anitipa raveraa ia Herodia, te vahine faaipoipo a Philipa to ’na taeae, ei vahine na ’na. I faataa na Heroda ia raua ta ’na vahine matamua no te faaipoipo ia Herodia. Ia au i te ture a Mose, ta Heroda e faahua haapao ra, e faaipoiporaa faaturi teie tei opanihia e te ture. No te au ore i te faahaparaa a Ioane, faaue ihora Heroda ia tapeahia Ioane, mea onoonohia paha e Herodia.

Aita Heroda i ite e nahea o ’na ia Ioane, te mana‘o ra hoi te taata e e peropheta Ioane. (Mataio 14:5) O Herodia râ, ua ite maitai ïa eaha ta ’na e rave. E inoino rahi to ’na ia Ioane, e te imi noa ra oia i te ravea no te haapohe ia Ioane. (Mareko 6:19) Tae maira te taime e tupu ai ta ’na opuaraa.

Na mua ’‘e i te Pasa 32, faatupu ihora Heroda i te hoê oroa rahi no to ’na mahana fanauraa. Ua tae mai ta ’na mau tia faatere, raatira nuu, e te feia tiaraa teitei no Galilea. I taua oroa ra, tonohia maira Salome, te tamahine a Herodia i ta ’na tane faaipoipo matamua o Philipa, e ori no te mau manihini. Ua au roa Heroda e ta ’na mau manihini.

No to ’na mauruuru rahi i te tamahine a ta ’na vahine, na ô atura Heroda: “A ani mai i ta oe e hinaaro, e horoa ’tu vau.” Horeo atoa ’tura oia: “Ta oe e ani mai, e horoa ’tu vau, tae noa ’tu i te afaraa o ta ’u faatereraa.” Hou Salome a pahono ai, haere ihora oia i rapaeau e ui atura i to ’na metua vahine: “Eaha ta ’u e ani?”—Mareko 6:22-24.

Teie te taime ta Herodia i tiai noa na! Pahono oioi maira oia: “Te upoo o Ioane Bapetizo.” Ho‘i ru ihora Salome ia Heroda ra e na ô maira: “Te hinaaro nei au ia horoa mai oe i teie nei i te upoo o Ioane Bapetizo i roto i te hoê farii maa.”—Mareko 6:24, 25.

Peapea roa ihora Heroda, ua faaroo hoi ta ’na mau manihini i ta ’na i horeo ia Salome. Eita ta ’na e nehenehe e otohe, noa ’tu e e pohe te hoê taata aita e hara ta ’na. Tono ihora ïa Heroda i te hoê faehau i te fare tapearaa ma te faaue e hopoi mai i te upoo o Ioane. Ho‘i oioi maira te faehau e te upoo o Ioane i roto i te hoê farii maa, e horoa maira ia Salome ra, o tei afai atu i to ’na metua vahine.

I to te mau pǐpǐ a Ioane faarooraa i te ohipa i tupu, haere maira ratou e tii i to ’na tino, huna a‘era e haere atura e faaite ia Iesu.

I muri a‘e, i to Heroda Anitipa faarooraa i to Iesu faaoraraa i te ma‘i e tiavaruraa i te demoni, horuhoru ihora oia. Ua uiui oia e ere anei o Ioane Bapetizo tei “tia faahou . . . mai te pohe mai” te taata ra o Iesu e rave ra i teie mau ohipa. (Luka 9:7) Hinaaro roa ’tura oia e ite ia Iesu, e ere iho â ïa no te faaroo i ta ’na pororaa, no te ite papu râ e ua tano anei oia i te haapeapearaa aore ra aita.