Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 41

Semeio maoti to vai mana?

Semeio maoti to vai mana?

MATAIO 12:22-32 MAREKO 3:19-30 LUKA 8:1-3

  • HAAMATARAA TE PITI O TE TERE PORORAA O IESU

  • TIAVARURAA I TE DEMONI

  • FAAARARAA NO NIA I TE HARA EITA E FAAOREHIA

I muri iho i to Iesu faataaraa i te faaoreraa hara i te fare o Simona te Pharisea, haamata ihora oia i te tahi atu tere pororaa na Galilea. O te piti ïa o te matahiti o ta ’na taviniraa. E ere o ’na ana‘e te ratere ra, ua apee atoa mai na 12 aposetolo e vetahi mau vahine ta ’na “i tiavaru i te mau varua ino e i faaora i te ma‘i.” (Luka 8:2) I rotopu ia ratou, te vai ra Maria no Magadala, Susana, Ioana te vahine a te hoê tiaau a te arii Heroda Anitipa.

A rahi noa ’tu ai te taata tei faaroo i ta Iesu ohipa, ua u‘ana ’tu â te mârôraa. Ua ite-maitai-hia te reira i te afairaahia mai ia Iesu ra te hoê tane tei uruhia e te demoni, e matapo hoi e te vava, e to Iesu faaoraraa i to ’na ma‘i e tiavaruraa i te demoni. Aita ïa te tane i raro a‘e faahou i te mana o te demoni, e e nehenehe ta ’na e ite e e paraparau. Maere ihora te nahoa taata, a na ô ai: “E ere anei o te Tamaiti a Davida teie?”—Mataio 12:23.

No te rahi o te nahoa i ruru mai ati a‘e te fare to reira Iesu, aita ’tura i tia ia ’na e ta ’na mau pǐpǐ ia tamaa. E ere râ ratou pauroa te mana‘o ra e o Iesu te “Tamaiti a Davida” fafauhia. Ua haere mai te tahi mau papai parau e Pharisea na Ierusalema roa mai, e ere râ no te faaroo i te haapiiraa a Iesu aore ra no te turu ia ’na. Te parau ra hoi ratou i te taata e “ua uruhia oia e Belezebuba” e te ohipa ra ïa oia e “te raatira o te mau demoni.” (Mareko 3:22) I to te fetii o Iesu faarooraa i te huehue, haere maira ratou no te haru ia Iesu. No te aha hoi?

I taua taime ra, aita to Iesu mau teina e tiaturi ra e e Tamaiti oia na te Atua. (Ioane 7:5) E au ra e o Iesu te faahuehue ra, e ere ïa o ’na mai ta ratou i matau a paari mai ai ratou paatoa i Nazareta.  Mana‘o a‘era ratou e ua inohia to ’na upoo, a na ô ai: “Ua maamaahia oia.”—Mareko 3:21.

Tera iho â anei? Ua faaora mai nei Iesu i te ma‘i o te hoê tane tei uruhia e te demoni, a nehenehe atu ai oia e ite e e paraparau. Aita hoê a‘e taata e tia ia parau e aita te reira i tupu. Faaino a‘era te mau papai parau e te mau Pharisea ia ’na i teie pariraa haavare: “I te mana noa o Belezebuba, te raatira o te mau demoni, e tiavaru ai tena taata i te mau demoni.”—Mataio 12:24.

Ua ite Iesu i te mana‘o o te mau papai parau e te mau Pharisea. Parau atura oia: “Ia amahamaha te hoê faatereraa, e mou te reira, e ia amahamaha te hoê oire aore ra te hoê utuafare, e taa ê te tahi i te tahi. Oia atoa, ia tiavaru Satani ia Satani, ua amahamaha ïa oia, e nafea ïa ta ’na faatereraa e mau ai?”—Mataio 12:25, 26.

E haaferuriraa tano roa teie! Ua ite te mau Pharisea e te tiavaru ra te tahi mau ati Iuda i te demoni. (Ohipa 19:13) Ui atura ïa Iesu: “Mai te peu e i te mana o Belezebuba e tiavaru ai au i te mau demoni, i to vai ïa mana e tiavaru ai ta outou mau tamarii i te mau demoni?” Te auraa, no ratou atoa ta ratou pariraa. Haaferuri faahou atura Iesu ia ratou: “Mai te peu râ e i te varua o te Atua e tiavaru ai au i te mau demoni, ua roohia ïa outou e te Faatereraa arii a te Atua ma te mana‘o-ore-hia.”—Mataio 12:27, 28.

Faataa ’tura Iesu e to ’na tiavaruraa i te mau demoni, e haapapuraa ïa e e mana to ’na i nia ia Satani, a na ô ai: “E nafea . . . te hoê taata e tomo ai i roto i te fare o te hoê taata puai a rave atu ai i ta ’na mau tao‘a? E taamuamu ïa oia na mua i taua taata puai ra, a eiâ ’tu ai i ta ’na mau tao‘a. Te taata o te ore e turu mai ia ’u, te patoi mai nei ïa ia ’u, e o te ore e haaputu mai i te taata e o vau atoa nei, te haapurara nei ïa.” (Mataio 12:29, 30) Papu maitai, te patoi ra te mau papai parau e te mau Pharisea ia Iesu, a faaite maitai atu ai e e tia ratou no Satani. Te haapurara nei ratou i te taata ia atea ê i te Tamaiti a te Atua, o te ohipa nei maoti te turu a te Atua.

Faaara ’tura oia i teie mau tia patoi o Satani: “E faaorehia te mau hara atoa ta te taata e rave e ta ratou mau parau faaino atoa. Tera râ, e ore roa e faaorehia te hara a te taata o te faaino i te varua mo‘a, e hara mure ore ta ’na.” (Mareko 3:28, 29) A feruri na i te auraa o te reira no te feia e parau ra e i te mana o Satani i ravehia ’i te mau mea atoa i tupu maoti te varua o te Atua!