Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 48

Noa ’tu te semeio, faahapahia oia i Nazareta

Noa ’tu te semeio, faahapahia oia i Nazareta

MATAIO 9:27-34; 13:54-58 MAREKO 6:1-6

  • ARAARARAA TE MATA O TE MATAPO E PARAPARAURAA TE VAVA

  • FAAHAPARAA TO NAZARETA IA IESU

Mea rahi te ohipa ta Iesu i rave i taua mahana ra. I to ’na taeraa mai na Dekapoli mai, ua ora ia ’na te tapahi o te hoê vahine e ua faatia mai oia i te tamahine a Iaeiro. Aita â râ i oti atura. A faarue ai Iesu i te fare o Iaeiro, pee maira e piti matapo ia ’na, a pii noa ’i: “Aroha mai ia mâua, Tamaiti a Davida.”—Mataio 9:27.

I to raua piiraa ia Iesu “Tamaiti a Davida,” te faaite ra raua i to raua tiaturi e o Iesu te fatu i te terono o Davida e o ’na te Mesia. E au ra e aita Iesu i tâu‘a ’tu, no te hi‘o paha e e onoono anei raua. Ta raua iho â i rave. A tomo ai Iesu i roto i te tahi fare, tomo atoa maira raua. Ui atura Iesu: “Tiaturi anei orua e e araara to orua mata ia ’u?” Pahono maira raua ma te tiaturi papu: “E, e te Fatu.” Tapea ihora Iesu i to raua mata e parau atura: “Mai ta orua i tiaturi, ia tupu ïa.”—Mataio 9:28, 29.

I reira iho, araara a‘era to raua mata! Faaue atura Iesu eiaha e faaite i ta ’na i rave, mai ta ’na i na reira na. No to raua râ oaoa rahi, paraparau haere a‘era raua no Iesu i muri iho.

Te haere atu ra teie nau tane, i arataihia mai ai te hoê tane tei vavahia no te mea ua uruhia oia e te demoni. Tiavaru ihora Iesu i te demoni, e paraparau ihora taua tane ra. Maere roa ihora te nahoa, a na ô ai: “Aita teie huru ohipa i tupu a‘enei i Iseraela.” E Pharisea atoa to reira. Eita ta ratou e nehenehe e parau e aita te semeio i tupu. Faahapa faahou maira ïa ratou ia Iesu no nia i te tumu o ta ’na mau ohipa: “I te mana hoi o te raatira o te mau demoni e tiavaru ai oia i te mau demoni.”—Mataio 9:33, 34.

I muri iho, ho‘i atura Iesu i to ’na oire o Nazareta, apeehia e ta ’na mau pǐpǐ. Piri i te hoê matahiti na mua ’tu, i haapii na oia i to reira mau taata i roto i te sunago. I maere na te taata i ta ’na mau haapiiraa, i muri iho râ, ua inoino ïa e ua imi i te haapohe ia ’na. I to ’na ho‘iraa ’tu, tamata faahou atura Iesu i te tauturu i te feia o to ’na oire.

I te Sabati, ho‘i atura oia i te sunago no te haapii i te taata. Mea rahi tei maere, a ui atoa ’i: “Nohea mai te paari o teie taata e to ’na puai no te faatupu i teie mau ohipa mana? E ere anei teie i te tamaiti a te tamuta? E ere anei o Maria te i‘oa o to ’na metua vahine, e o Iakobo, Iosepha, Simona e Iuda to ’na mau taeae? E ere anei e tei ǒ tatou nei atoa to ’na mau tuahine? Nohea mai ïa te paari o teie taata e to ’na puai no te faatupu i teie mau ohipa mana?”—Mataio 13:54-56.

No ratou, e tane noa Iesu no Nazareta, a mana‘o ai, ‘Ua ite matou ia ’na i te paariraa mai, e nafea ïa o ’na te Mesia?’ Faahapa maira ïa ratou ia ’na noa ’tu te mau haapapuraa atoa e vai ra, e te paari rahi o Iesu e ta ’na mau ohipa mana. To ’na atoa utuafare, tei matau maitai hoi ia ’na, aita i tiaturi ia ’na, a parau roa ’tu ai Iesu: “E faaturahia te hoê peropheta i te mau vahi atoa, area i to ’na iho fenua e i roto i to ’na iho utuafare, eita ïa.”—Mataio 13:57.

Maere roa ihora Iesu i to ratou ereraa i te faaroo. Aita ’tura oia i faatupu i te semeio i reira, maori râ te tuuraa i to ’na rima i nia vetahi feia ma‘i e te faaoraraa i to ratou ma‘i.—Mareko 6:5, 6.