Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 36

Faaiteraa te hoê raatira faehau i te faaroo rahi

Faaiteraa te hoê raatira faehau i te faaroo rahi

MATAIO 8:5-13 LUKA 7:1-10

  • FAAORARAAHIA TE MA‘I O TE TAVINI A TE HOÊ RAATIRA FAEHAU

  • HAAMAITAIHIA TE FEIA E FAAROO TO RATOU

I muri iho i to Iesu horoaraa i ta ’na A‘oraa i nia i te mou‘a, haere atura oia i Kaperenaumi, e tapiri maira te tahi mau aratai ati Iuda ia ’na. Ua tonohia mai ratou e te hoê taata ê tiaraa teitei, e raatira hanere o te nuu Roma.

E ma‘i ino mau to te tavini here a taua raatira faehau ra, e fatata oia i te pohe. Noa ’tu e ere te raatira faehau i te ati Iuda, te taparuparu ra oia ia Iesu i te tauturu. Ua faaite te mau ati Iuda ia Iesu e “te tarava noa ra” te tavini a taua raatira ra “i te fare e hapepa oia e te pohe roa ra oia i te mauiui.” (Mataio 8:6) Haapapu maira te mau aratai ati Iuda ia Iesu e mea tano ia tauturu i teie raatira faehau, a na ô mai ai: “Mea here hoi na ’na to tatou nunaa e ua faatia oia iho i ta matou sunago.”—Luka 7:4, 5.

Faarue ihora Iesu i te mau aratai ati Iuda no te haere i ǒ te raatira faehau. A piri atu ai oia, tono maira te raatira faehau i te tahi mau hoa, tei na ô mai: “E te Fatu, eiaha e faaohipa rahi ia oe, eita hoi e tano ia ’u ia farii ia oe i to ’u fare. No reira vau i ore ai i haere atu ia oe ra.” (Luka 7:6, 7) Tera te haehaa mau no te hoê taata ua matau i te faaue i te faehau! Te ite-atoa-hia ra e mea taa ê roa oia i te tahi atu no Roma o te rave ino i ta ratou mau tîtî.—Mataio 8:9.

Papu ua ite taua raatira faehau ra e eita te mau ati Iuda e amuimui i te taata ěê. (Ohipa 10:28) Ua haamana‘o paha oia i te reira i to ’na aniraa i to ’na mau hoa e taparuparu ia Iesu: “A parau noa . . . i te tahi parau, e ia ora te ma‘i o ta ’u tavini.”—Luka 7:7.

Maere ihora Iesu i ta ’na i faaroo mai, e na ô atura: “E parau atu vau: Aita vau i ite a‘enei i te faaroo rahi mai teie i Iseraela.” (Luka 7:9) I to te mau hoa o te raatira faehau ho‘iraa i ǒ ’na, ite a‘era ratou e ua ora roa te ma‘i ino mau o ta ’na tavini.

Ia Iesu i faaora i te ma‘i o teie tavini, haapapu ihora oia e e fana‘o te feia ěê e faaroo to ratou i te tahi mau haamaitairaa, a parau ai oia: “E rave rahi no hitia o te râ e no tooa o te râ o te haere mai, a tarava ’tu ai i te amuraa maa e o Aberahama, Isaaka e Iakoba i roto i te Faatereraa arii o te ra‘i.” E te mau ati Iuda ïa aita e faaroo to ratou? Ua parau Iesu e “e hurihia ïa i roto i te poiri i rapae. I reira ratou e ta‘i ai e to ratou niho e ma‘u‘u ai i te ahoaho.”—Mataio 8:11, 12.

No reira, e faaruehia e te Atua te nunaa ati Iuda tei ore i farii i te haamaitairaa i pûpûhia ia ratou na mua e apiti i te Mesia i roto i te Faatereraa arii. E fariihia râ te feia e ere i te ati Iuda ia tarava i ta ’na amuraa maa, ei auraa parau, “i roto i te Faatereraa arii o te ra‘i.”