Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 24

Ta ’na taviniraa ati a‘e Galilea

Ta ’na taviniraa ati a‘e Galilea

MATAIO 4:23-25 MAREKO 1:35-39 LUKA 4:42, 43

  • TERERAA IESU NA GALILEA E TA ’NA E MAHA PǏPǏ

  • ATUTURAA TE PARAU O TA ’NA PORORAA E OHIPA MANA

Mea rahi ta Iesu ohipa i rave i Kaperenaumi, apeehia e ta ’na e maha pǐpǐ. I te ahiahi, afai maira to Kaperenaumi i to ratou feia ma‘i ia ’na ra ia ora to ratou ma‘i. Aita rea e taime to Iesu no te pure i to ’na Metua o ’na ana‘e.

E aahiata a‘era, te poiri noa ra. Tia a‘era Iesu e haere atura i rapae. Ite atura oia i te hoê vahi mo‘emo‘e no te pure i to ’na Metua o ’na ana‘e. Aita râ i maoro, ite a‘era “Simona ma” e aita oia, e paimi maira ia ’na. O Simona paha, pii-atoa-hia Petero, na mua tei paimi ia ’na no te mea no ǒ Iesu i ǒ ’na ra.—Mareko 1:36; Luka 4:38.

Ia ratou i ite mai ia Iesu, parau maira Petero: “Te imi nei te taata atoa ia oe.” (Mareko 1:37) Ua hinaaro iho â to Kaperenaumi ia faaea mai Iesu. Ua au roa hoi ratou i ta ’na i rave, taparuparu a‘era ïa ratou ia ’na “ia faaea mai.” (Luka 4:42) Tera râ, ua haere mai anei Iesu i te fenua na mua roa no te faaora semeio i te ma‘i? I tera noa anei oire e rave ai oia i ta ’na ohipa? Eaha ta ’na i parau?

Pahono atura Iesu i ta ’na mau pǐpǐ: “Mai haere ana‘e i te tahi atu vahi, i roto i te mau oire tapiri, ia poro atoa vau i ǒ, no reira hoi au i haere mai ai.” Ua parau atoa Iesu i te feia e hinaaro ra ia faaea mai oia: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ’i, no reira hoi au i tonohia mai ai.”—Mareko 1:38; Luka 4:43.

Oia mau, te hoê tumu faufaa i haere mai ai Iesu i te fenua, no te poro ïa i te Faatereraa arii a te Atua. Na roto i teie Faatereraa arii e mo‘a ’i te i‘oa o to ’na Metua e e afaro ai te mau fifi atoa o te taata e a muri noa ’tu. A faaora semeio ai oia i te ma‘i, ua haapapu Iesu e na te Atua i tono mai ia ’na. Na reira atoa i tahito ra, ua rave Mose i te mau ohipa mana no te haapapu e na te Atua i tono ia ’na.—Exodo 4:1-9, 30, 31.

Faarue atura Iesu i Kaperenaumi no te poro i te tahi atu mau oire. Apee atoa maira ta ’na e maha pǐpǐ ia ’na, o Petero raua to ’na taeae Anederea, e o Ioane raua to ’na taeae Iakobo. Te hebedoma na mua ’tu, ua titauhia ratou ia riro ei hoa ohipa matamua no Iesu o te ratere e o ’na.

Ua manuïa mau to Iesu tere pororaa e ta ’na e maha pǐpǐ ati a‘e Galilea! Ua atutu hoi te parau o Iesu na tera e tera vahi. “Faaroo a‘era to Suria atoa i ta ’na i rave,” i te tuhaa fenua no na oire hoê ahuru piihia Dekapoli e na tera ’tu pae o te anavai Ioridana. (Mataio 4:24, 25) E nahoa rahi no tera mau pae fenua, oia atoa no Iudea, tei pee ia Iesu e ta ’na mau pǐpǐ. Arataihia maira ia Iesu ra e rave rahi taata ia ora to ratou ma‘i. Aita ratou i tatarahapa, ua faaora hoi Iesu i to ratou mau ma‘i e ua tiavaru i te mau varua ino o te feia tei uruhia e te demoni.