Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 49

Pororaa i Galilea e faaineineraa i te mau aposetolo

Pororaa i Galilea e faaineineraa i te mau aposetolo

MATAIO 9:35–10:15 MAREKO 6:6-11 LUKA 9:1-5

  • PORO-FAAHOU-RAA IESU NA GALILEA

  • TONORAA OIA I TE MAU APOSETOLO E PORO

Piri i te piti matahiti to Iesu rohiraa i roto i te pororaa. Ua tae anei i te taime no te faafaaea? Aita, ua rohi atu â Iesu i te poro “na roto i te mau oire rahi e oire rii [i Galilea], i te haapiiraa i roto i te mau sunago, te pororaa i te parau apî oaoa o te Faatereraa arii e te faaoraraa i te mau huru ma‘i atoa.” (Mataio 9:35) No ta ’na i ite, papu roa ia ’na e mea faufaa ia poro atu â. Mea nafea râ oia i te na reiraraa?

I roto i to ’na mau tere, ua ite Iesu i te taata tei hinaaro mau â i te tauturu e te tamahanahanaraa i te pae varua. Mea rave-ino-hia ratou e te tâu‘a-ore-hia mai te mau mamoe aore e tiai. Aroha ’tura oia ia ratou e parau atura i ta ’na mau pǐpǐ: “Te rahi mau nei te auhune, mea iti râ te rave ohipa. A taparu ïa i te Fatu o te auhune ia tono mai i te rave ohipa no te ootiraa.”—Mataio 9:37, 38.

Ua ite Iesu eaha te tauturu mai. Titau ihora oia i ta ’na na 12 aposetolo e faanaho tataipiti atura ia ratou no te pororaa. Horoa ’tura oia i teie mau faaueraa maramarama: “Eiaha e haere i ǒ te feia o te mau nunaa ěê e eiaha e tomo atu i te mau oire no Samaria, a haere noa râ i ǒ te mau mamoe tei mo‘e o te utuafare o Iseraela. A poro haere ai outou, a na ô atu: ‘Ua fatata mai te Faatereraa arii o te ra‘i.’”—Mataio 10:5-7.

I roto i te pure ta Iesu i haapii i ta ’na mau pǐpǐ, ua faahiti oia i te Faatereraa arii ta ratou e poro e tia ’i. “Ua fatata mai te Faatereraa arii” i roto i te auraa e to rotopu ia ratou te Arii ta  te Atua i maiti, o Iesu Mesia. E tia ta ’na mau pǐpǐ no teie Faatereraa arii. Na te aha e haapapu ra? Ua horoa Iesu i te mana ia ratou no te faaora i te ma‘i e no te faatia mai i te feia pohe, ma te tamoni ore. Mea nafea râ te mau aposetolo i haamâha ’i i to ratou mau hinaaro mau, mai te noaaraa mai te maa i te mahana hoê?

Ua parau Iesu i ta ’na mau pǐpǐ eiaha e faaineine i to ratou otaa no teie tere pororaa. Eiaha ei auro, ario aore ra veo i roto i ta ratou pute. Eiaha atoa ei pute maa, ei taipiti ahu, e tiaa. No te aha? Haapapu atura Iesu: “E fana‘o iho â te rave ohipa i ta ’na maa.” (Mataio 10:10) Na te feia ta ratou e farerei o te farii i ta ratou poroi e horoa ’tu i ta ratou e hinaaro mau â. Na ô atura Iesu: “I te mau vahi atoa e tomo ai outou i roto i te hoê fare, a faaea i reira e reva noa ’tu outou.”—Mareko 6:10.

Horoa atoa ’tura Iesu i te faaueraa e nafea ia paraparau i te taata i te poroi o te Faatereraa arii: “Ia tomo outou i roto i te fare, a aroha ’tu i te utuafare. Ia farii ratou ia outou, ia vai mai ïa to outou hau i nia ia ratou. Ia ore râ ratou e farii mai, ia ho‘i ïa to outou hau i nia ia outou. I te mau vahi atoa e ore ai te taata e farii ia outou aore ra e faaroo i ta outou parau, a haere mai i rapaeau i tera fare aore ra oire, e a tûtû i te repo o to outou avae.”—Mataio 10:12-14.

Ia ore to te hoê oire aore ra oire iti taatoa e farii i ta ratou poroi, eaha ïa te tupu? Te faautuaraa rahi. Ua faataa Iesu: “Oia mau ta ’u e parau atu: Mea mâmâ a‘e te utua a te fenua o Sodoma e Gomora i ta taua oire ra i te Mahana Haavaraa.”—Mataio 10:15.