Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 50

Faaineinehia no te poro noa ’tu te hamani-ino-raa

Faaineinehia no te poro noa ’tu te hamani-ino-raa

MATAIO 10:16–11:1 MAREKO 6:12, 13 LUKA 9:6

  • FAAINEINERAA E TONORAA IESU I TE MAU APOSETOLO

E faaueraa maitai roa ta Iesu i horoa i ta ’na mau aposetolo e nafea ia poro a tono tataipiti ai ia ratou. E ere râ tera ana‘e. Ua faaara atoa oia ma te here e e patoi mai vetahi: “Inaha, te tono nei au ia outou mai te mau mamoe i rotopu i te mau luko. . . . A ara i te taata, e tuu hoi ratou ia outou i te haavaraa e e hui ia outou i roto i ta ratou mau sunago. E aratohia outou i mua i te mau tavana e te mau arii no ’u nei.”—Mataio 10:16-18.

Oia mau, e hamani-ino-roa-hia ta Iesu mau pǐpǐ. Fafau atura râ oia ia ratou ei tamahanahanaraa: “Ia tapeahia . . . outou, eiaha e haapeapea eaha ta outou e parau aore ra e nafea, no te mea e faaitehia ’tu ta outou e parau i taua hora ra, e ere hoi o outou ana‘e te parau, o te varua râ o to outou Metua te parau na roto ia outou.” Parau faahou atura oia: “E tuu te taata i to ’na taeae aore ra te metua i ta ’na tamarii ia pohe e e orure hau te tamarii i te metua, a tuu atu ai i to ratou mau metua ia pohe. E hae te taata atoa ia outou no to ’u nei i‘oa. Te taata râ tei faaoromai tamau e tae noa ’tu i te hopea, e ora ïa.”—Mataio 10:19-22.

No te mea e ohipa faufaa roa te pororaa, faataa maitai ihora Iesu i ta ’na mau pǐpǐ ia vai ara noa ia nehenehe hoi ratou e poro ma te fifi ore. Ua parau oia: “Ia hamani ino ratou ia outou i te hoê oire, a horo ïa i te tahi atu oire. Oia mau hoi ta ’u e parau atu: E ore e ati te mau oire o Iseraela ia outou e tae mai ai te Tamaiti a te taata.”—Mataio 10:23.

E faaueraa, faaararaa e faaitoitoraa tano maitai ta Iesu i horoa i ta ’na na 12 aposetolo! Ua taa noa iho â râ ia oe e e tano atoa teie mau parau no te feia e poro i muri a‘e i to Iesu poheraa e tia-faahou-raa. Ua parau hoi oia e o te taata atoa, eiaha noa râ te feia ta te mau aposetolo i tonohia e poro, te hae i ta ’na mau pǐpǐ. Aita atoa i papaihia e ua aratohia te mau aposetolo i mua i te mau tavana e te mau arii i te roaraa o teie tere pororaa poto noa i Galilea, aore ra ua tuuhia e to ratou utuafare ia pohe.

Papu maitai, i to Iesu parauraa i teie mau parau i te mau aposetolo, te mana‘o ra oia i te tau no a muri a‘e. Ua parau hoi oia e e ore e oti to ratou tere pororaa “e tae mai ai te Tamaiti a te taata.” Te faaite ra ïa Iesu e eita te pororaa i te Faatereraa arii a te Atua e oti i ta ’na mau pǐpǐ hou te Arii faahanahanahia o Iesu Mesia e tae mai ai ei haava na te Atua.

A poro ai ratou, eiaha te mau aposetolo e maere ia hamani-ino-hia ratou, ua parau hoi Iesu: “Aita te hoê pǐpǐ i hau a‘e i ta ’na orometua, aita atoa te hoê tavini i hau a‘e i to ’na fatu.”  Mea maramarama ta Iesu parau. Ua rave-ino-hia e ua hamani-ino-hia oia no te pororaa i te Faatereraa arii a te Atua. E na reira-atoa-hia mai ratou. A‘o atura râ Iesu: “Eiaha e mǎta‘u i te feia e haapohe ia outou, e ore râ e tia ia faaore i te ora. A mǎta‘u râ i te Atua, e tia hoi ia ’na ia faaore roa i te ora e te tino i Gehena.”—Mataio 10:24, 28.

Ua vaiiho mai Iesu i te hi‘oraa. Ma te mǎta‘u ore, ua farii oia e pohe eiaha râ e taiva i te Mana hope ra o Iehova. O te Atua Mana hope te nehenehe e faaore i te “ora” o te hoê taata (to ’na tiaturiraa e ora a muri a‘e) aore ra e faatia mai ia ’na no te ora e a muri noa ’tu. Eita e ore e ua mahanahana te aau o te mau aposetolo!

Faataa ihora Iesu e e aupuru te Atua ma te here i ta ’na mau pǐpǐ: “E piti manu rii te hoohia i te hoê noa moni veo, e ere anei? Ia mairi noa ’tu râ hoê o ratou i raro, e ite iho â to outou Metua i te reira. . . . Eiaha ïa e mǎta‘u. Mea faufaa a‘e outou i te manu rii e rave rahi.”—Mataio 10:29, 31.

E amahamaha te mau utuafare no te poroi ta te mau pǐpǐ a Iesu e poro. E farii te tahi mau mero utuafare, te tahi atu râ, eita ïa. Ua faataa Iesu: “Eiaha e mana‘o e i haere mai au e hopoi i te hau i te fenua nei.” E titauhia te itoito ia farii te hoê mero utuafare i te parau mau Bibilia. Ua parau Iesu: “Te taata mea here a‘e na ’na i to ’na metua tane aore ra metua vahine ia ’u nei, e ore ïa e tia ia ’na ia riro ei pǐpǐ na ’u, e te taata mea here a‘e na ’na i ta ’na tamaiti aore ra tamahine ia ’u nei, e ore ïa e tia ia ’na ia riro ei pǐpǐ na ’u.”—Mataio 10:34, 37.

E farii maitai râ vetahi i ta ’na mau pǐpǐ. Ua parau oia: “O tei horoa i te tahi noa au‘a pape to‘eto‘e na te hoê o teie feia rii no te mea e pǐpǐ oia na ’u, oia mau ta ’u e parau atu: E fana‘o iho â oia i ta ’na haamaitairaa.”—Mataio 10:42.

Ma te faaineine-maitai-hia e Iesu maoti ta ’na mau faaueraa, faaararaa e faaitoitoraa, haere atura te mau aposetolo “na te mau oire rii atoa e faaite haere i te parau apî oaoa e e faaora i te ma‘i.”—Luka 9:6.