Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 22

E maha pǐpǐ tei riro ei ravaai taata

E maha pǐpǐ tei riro ei ravaai taata

MATAIO 4:13-22 MAREKO 1:16-20 LUKA 5:1-11

  • TITAURAA IESU I TA ’NA MAU PǏPǏ IA PEE TAMAU IA ’NA

  • RIRORAA VETAHI RAVAAI EI RAVAAI TAATA

I muri a‘e i to vetahi no Nazareta tamataraa i te haapohe ia Iesu, haere atura Iesu i te oire o Kaperenaumi, i pihai iho i te miti o Galilea tei parau-atoa-hia te “roto o Genesareta.” (Luka 5:1) Ua tupu ïa te parau tohu a te buka a Isaia e parau ra e e ite to Galilea e parahi ra i tahatai i te hoê maramarama rahi.—Isaia 9:1, 2.

Ua tamau Iesu i te faaite ati a‘e Galilea e “ua fatata mai hoi te Faatereraa arii o te ra‘i.” (Mataio 4:17) Itea maira ia Iesu e maha o ta ’na mau pǐpǐ. I pee atoa na ratou ia Iesu, i to ratou râ ho‘iraa e o Iesu na Iudea mai, rave faahou atura ïa ratou i ta ratou ohipa ravaai. (Ioane 1:35-42) Ua tae râ i te taime e pee tamau ai ratou ia Iesu ia faaineine hoi oia ia ratou ia rave noa i te taviniraa ua reva ana‘e oia.

Ia Iesu i haere na tatahi, ite ihora oia ia Simona Petero, to ’na taeae Anederea e te tahi mau hoa to raua e tamâ ra i te upe‘a. Tapiri atura Iesu, pauma ’tura i nia i te poti o Petero, e ani atura ia ’na ia faaatea i tai. Ua atea rii raua, parahi ihora Iesu, e haapii atura i te nahoa tei ruru i tatahi i te pue parau mau no nia i te Faatereraa arii.

Parau atura Iesu ia Petero: “A hôe atu i te vahi hohonu, e a tuu i ta outou mau upe‘a.” Pahono maira Petero: “Orometua, ua tai‘a matou e ao noa ’tura e aita hoê a‘e i‘a, no ta oe râ parau, e tuu vau i te upe‘a.”—Luka 5:4, 5.

Tuu atura ratou i te upe‘a, e roaa maira e rave rahi i‘a, a mutumutu atu ai ta ratou mau upe‘a! Tarape ihora ratou i to ratou mau hoa ravaai i roto i te tahi atu poti i pihai iho atu ia haere mai e tauturu ia ratou. Fatata roa ’tura na poti i te tomo, ua î roa hoi i te i‘a e ua teiaha roa. I te iteraa Petero i te reira, tuturi ihora oia i mua ia Iesu e parau maira: “E te Fatu, eiaha e tapiri mai ia ’u, e taata hara hoi au.” Pahono atura Iesu: “Eiaha e mǎta‘u faahou. Mai teie atu nei, te taata te noaa mai ia outou.”—Luka 5:8, 10.

Parau atura Iesu ia Petero raua Anederea: “A pee mai ia ’u, e faariro vau ia orua ei ravaai taata.” (Mataio 4:19) E piti â ravaai ta ’na i titau, o Iakobo raua Ioane, na tamaiti a Zebedaio. Aita atoa raua i feaa noa ’‘e i te pee ia ’na. Faarue atura ratou e maha i ta ratou ohipa ravaai e riro maira ei pǐpǐ matamua o te pee tamau ia Iesu.