Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 28

No te aha te mau pǐpǐ a Iesu i ore ai i haapae i te maa?

No te aha te mau pǐpǐ a Iesu i ore ai i haapae i te maa?

MATAIO 9:14-17 MAREKO 2:18-22 LUKA 5:33-39

  • UIRAA TE MAU PǏPǏ A IOANE IA IESU NO NIA I TE HAAPAERAA MAA

I tapeahia na Ioane Bapetizo i muri a‘e i to Iesu haereraa i te Pasa 30. Ua hinaaro Ioane ia riro mai ta ’na mau pǐpǐ ei pǐpǐ na Iesu, e ere râ pauroa tei na reira i te mau ava‘e i muri mai i to Ioane tapearaahia.

A piri mai ai te Pasa 31, haere maira vetahi o ta Ioane mau pǐpǐ ia Iesu ra e ui maira: “E peu matauhia e matou e te mau Pharisea ia haapae i te maa, no te aha ïa ta oe mau pǐpǐ e ore ai e na reira atoa?” (Mataio 9:14) I haapae na te mau Pharisea i te maa ei peu faaroo. I muri a‘e, ua faahiti Iesu i te faahoho‘araa o te hoê Pharisea faahua parau-tia e pure ra: “E te Atua e, te haamauruuru atu nei au ia oe i te mea e ere au mai te tahi atu mau taata . . . E haapae au i te maa e piti taime i te hebedoma.” (Luka 18:11, 12) Ei peu faaroo i haapae atoa ’i paha te mau pǐpǐ a Ioane i te maa. Aore ra te na reira ra ratou no to ratou oto i to Ioane tapearaahia. Ui atoa a‘era te mau pǐpǐ a Ioane no te aha te mau pǐpǐ a Iesu i ore ai i haapae i te maa, peneia‘e ei faaiteraa i to ratou atoa oto i to Ioane tapearaahia.

Pahono atura Iesu na roto i te hoê hi‘oraa: “Aita e tumu e oto ai te mau hoa o te tane faaipoipo a vai noa mai ai oia i rotopu ia ratou, e ere anei? E tae mai râ te mau mahana e hopoi-ê-hia ’i te tane faaipoipo, i reira ïa ratou e haapae ai i te maa.”—Mataio 9:15.

Na Ioane iho i faahiti ia Iesu mai te tane faaipoipo. (Ioane 3:28, 29) A vai mai ai Iesu i ta ’na mau pǐpǐ ra, aita ta ’na mau pǐpǐ i haapae i te maa. I muri a‘e, i to Iesu poheraa, ua oto ta ’na mau pǐpǐ e aita i hinaaro e tamaa. I to ’na râ faatia-faahou-raahia mai, aita e tumu faahou e oto ai ratou, a haapae atu ai i te maa. Ua oaoa roa râ ratou.

Horoa ’tura Iesu i teie na faahoho‘araa: “Aita e taata e tafai i te ahu apî i nia i te ahu tahito, e tô hoi te ahu apî i nia i te ahu tahito, a rahi atu ai te mutu. Aita atoa e taata e tuu i te uaina apî i roto i te mau pute uaina tahito. Ia na reira ratou, e mahae te mau pute uaina, e tahe te uaina, e ino atoa te mau pute uaina. E tuu râ te taata i te uaina apî i roto i te mau pute uaina apî.” (Mataio 9:16, 17) Eaha ta Iesu e hinaaro ra e parau?

Te tauturu ra Iesu i te mau pǐpǐ a Ioane Bapetizo ia taa e eiaha roa ’tu te taata e mana‘o e e pee te mau pǐpǐ a Iesu i te mau peu tahito a te haapaoraa ati Iuda, mai te haapaeraa maa. Aita oia i haere mai no te tafai e no te faaherehere i te hoê huru haamoriraa tahito aita e faufaa faahou, te hoê faanahoraa haamoriraa taatoa fatata i te faaorehia. Te haamoriraa ta Iesu e faaitoito ra i te taata ia pee, e ere ïa te haapaoraa ati Iuda o to ratou tau e ta ’na mau tutuu a te taata. E ere, aita oia e tamata ra i te tafai i te hoê ahu apî i nia i te hoê ahu tahito, aore ra i te tuu i te uaina apî i roto i te hoê pute uaina tahito etaeta.