Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 46

Oraraa te ma‘i i te tapearaa i to Iesu ahu

Oraraa te ma‘i i te tapearaa i to Iesu ahu

MATAIO 9:18-22 MAREKO 5:21-34 LUKA 8:40-48

  • ORARAA TE MA‘I O TE HOÊ VAHINE I TO ’NA TAPEARAA I TE AHU O IESU

Atutu ihora te parau o te ho‘iraa mai o Iesu na Dekapoli mai i rotopu i te mau ati Iuda e faaea ra i te pae apatoerau tooa o te râ i te hiti miti o Galilea. Eita e ore e mea rahi tei faaroo e ua pohe te mata‘i e ua mania te miti ia Iesu i te tupuraa a‘enei te vero. Ua ite atoa paha vetahi e ua tiavaru oia i te demoni i rapae i na tane tei uruhia. No reira, ruru maira “te hoê nahoa rahi” i tatahi, i Kaperenaumi, no te farii maitai ia Iesu. (Mareko 5:21) A pou ai Iesu mai nia mai i te poti, te tiai ru ra ratou i te ite i ta ’na e rave.

O Iaeiro, aratai o te sunago, hoê o te feia e tiai ru ra i te farerei ia Iesu. Tuturi ihora oia i te pae avae o Iesu e taparuparu maira: “E ma‘i rahi to ta ’u tamahine iti. Haere mai na e tuu i to rima i nia ia ’na ia ora oia.” (Mareko 5:23) Eaha ta Iesu i rave i to Iaeiro taparuparuraa ia ’na ia faaora i te ma‘i o ta ’na tamahine hoê roa, 12 noa matahiti e mea here roa na ’na?—Luka 8:42.

A haere ai Iesu i te fare o Iaeiro, farerei ihora oia i te tahi atu tupuraa o te haaputapû mai. Mea rahi o te feia e apee ra ia ’na te uiui ra e e ite anei ratou ia ’na ia faatupu i te tahi atu semeio. Hoê râ vahine i rotopu i te nahoa, te haapeapea ra ïa no to ’na ma‘i iti rahi.

I mauiui na teie vahine ati Iuda no te ma‘i tapahi 12 matahiti. Ua haere oia e hi‘o e rave rahi taote, a pau roa ’tu ai ta ’na moni i ta ratou mau rapaauraa. Aita râ hoê a‘e apî. “Ua rahi roa ’tu” to ’na ma‘i.—Mareko 5:26.

Ua taa noa iho â ia oe e mea haama no ’na tera huru ma‘i, o te haaparuparu atoa ia ’na. Eita te hoê vahine e faaite hanoa e tera to ’na ma‘i. Hau atu â, i raro a‘e i te ture a Mose, mea viivii te hoê vahine e ma‘i ava‘e to ’na. Te taata e tapea ia ’na aore ra i to ’na ahu tei tafeta i te toto, ia tamâ ïa ia ’na, a vai viivii noa ’tu ai e ahiahi noa ’tu.—Levitiko 15:25-27.

Ua faaroo teie vahine “i te mau mea no nia ia Iesu,” e imi ihora ia ’na. No to ’na viivii, na roto ihora oia i te nahoa i te haere-omo‘e-raa, a na ô noa ’i: “Ia tapea noa ’tu vau i to ’na ahu, e ora ïa to ’u ma‘i.” I to ’na tapearaa i te hiti ahu o Iesu, taa ihora ia ’na e ua mau to ’na tapahi! “Ua ora to ’na ma‘i ino.”—Mareko 5:27-29.

Parau a‘era Iesu: “Na vai i tapea ia ’u?” I to oe mana‘o, eaha te huru o te vahine i to ’na faarooraa i tera uiraa? Tama‘i maira Petero ia Iesu mai te huru ra aita i tano ta Iesu uiraa, a na ô ai: “Te haaati nei te taata ia oe e ua piri roa mai ratou.” No te aha ïa Iesu i ui ai, “Na vai i tapea ia ’u?” Faataa ’tura Iesu: “E taata tei tapea ia ’u, ua ite hoi au e e mana tei haere i rapae ia ’u.”—Luka 8:45, 46.

A taa ’i i taua vahine ra e ua itehia e na ’na i tapea ia Iesu, tuturi ihora oia i mua ia Iesu ma te mǎta‘u e te rûrû. I mua i te taata atoa, faaite ihora oia i te parau mau no nia i to ’na ma‘i e no ora mai nei to ’na ma‘i. Tamahanahana ’tura Iesu ia ’na ma te mǎrû: “Ta ’u tamahine, no to oe faaroo i ora ’i oe. A haere, eiaha oe e haapeapea, e ia ora mai oe i to oe ma‘i ino.”—Mareko 5:34.

Papu maitai, te Arii ta te Atua i maiti no te faatere i te fenua, ua î ïa i te here e te aumihi e te haapeapea ra oia no te taata e e mana atoa to ’na no te tauturu ia ratou!