Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 57

Oraraa te ma‘i o te hoê tamahine e te tari‘a turi o te hoê tane

Oraraa te ma‘i o te hoê tamahine e te tari‘a turi o te hoê tane

MATAIO 15:21-31 MAREKO 7:24-37

  • FAAORARAA IESU I TE MA‘I O TE TAMAHINE A TE HOÊ VAHINE NO PHENIKIA

  • FAAORARAA OIA I TE TARI‘A TURI O TE HOÊ TANE MEA FIFI ATOA NO ’NA IA PARAPARAU

I muri a‘e i to ’na faahaparaa i te mau Pharisea no te haapaoraa i ta ratou iho mau tutuu, reva ’tura Iesu e ta ’na mau pǐpǐ na Turia e Sidona i Phenikia e rave rahi kilometera i te pae apatoerau tooa o te râ.

Itea maira ia Iesu te hoê fare i reira e faaea ’i, aita râ i hinaaro ia ite te taata e to reira oia. Ua itehia râ oia. Farerei maira te hoê vahine Heleni tei fanauhia i taua fenua ra ia Iesu e taparu maira: “Aroha mai ia ’u, e te Fatu, Tamaiti a Davida. Ua uruhia ta ’u tamahine e te demoni o te haamauiui nei ia ’na.”—Mataio 15:22; Mareko 7:26.

I muri iho, na ô maira te mau pǐpǐ ia Iesu: “A parau ia ’na ia haere, te pii noa mai ra hoi oia.” Faataa ’tura Iesu i te tumu i ore ai oia i tâu‘a i teie vahine: “Aita vau i tonohia i te mau taata atoa, i te mau mamoe ana‘e râ tei mo‘e o te utuafare o Iseraela.” Aita râ te vahine i tuu. Tapiri maira oia e tahopu ihora ia Iesu a taparu ai: “E te Fatu, a tauturu mai ia ’u!”—Mataio 15:23-25.

E au ra e no te tamata i to ’na faaroo, faahiti atura Iesu i te mana‘o tano ore o te ati Iuda i te feia nunaa ê: “E ere mea maitai ia rave i te faraoa a te mau tamarii, a horoa ’tu ai na te mau fanau‘a urî.” (Mataio 15:26) Ma te parau “fanau‘a urî,” te faaite ra Iesu i to ’na here i te feia e ere i te ati Iuda. Eita e ore e ua ite-atoa-hia te reira i nia i to ’na hoho‘a mata e na roto i te mǎrû o to ’na reo.

Aita te vahine i huru ê. Faahiti faahou atura râ oia i te mana‘o tano ore o te ati Iuda i te feia nunaa ê a parau ai ma te haehaa: “Oia mau e te Fatu, e amu atoa râ te mau fanau‘a urî i te mau hu‘ahu‘a faraoa e topa mai nia mai i te amuraa maa a to ratou fatu.” Taa ihora ia Iesu te maitai o to ’na aau e pahono atura: “E faaroo rahi to oe. Ta oe e hinaaro, ia tupu ïa.” (Mataio 15:27, 28) Ua tupu iho â ta ’na i hinaaro, noa ’tu aita te tamahine i pihai iho mai. I to te vahine ho‘iraa i ǒ ’na, ite ihora oia i ta ’na tamahine e tarava ra i nia i te ro‘i, ua ora roa, inaha “ua reva te demoni.”—Mareko 7:30.

Mai Phenikia ’tu, reva ’tura Iesu e ta ’na mau pǐpǐ e tae roa i te anavai Ioridana. E au ra e ua haere ratou i te tahi atu pae o Ioridana i te pae apatoerau roa o te miti o Galilea e tae atura i Dekapoli. Pauma a‘era ratou i nia i te hoê mou‘a, itehia maira râ ratou e te nahoa. Afai maira te taata ia Iesu ra i te pirioi, te huma mero, te matapo e te vava. Tuu maira ratou i teie feia ma‘i i te pae avae o Iesu, e faaora ihora oia i to ratou mau ma‘i. Maere ihora te taata, e faahanahana a‘era i te Atua o Iseraela.

Ua haapao iho â râ Iesu i te hoê tane tari‘a turi mea fifi atoa no ’na ia paraparau. Ua taa noa iho â ia oe to ’na huru i rotopu i te hoê nahoa rahi. No to Iesu paha iteraa i to ’na taiâ, faaatea ê atura oia ia ’na. O raua ana‘e, faaite atura Iesu eaha ta ’na e rave no ’na. Tuu atura Iesu i to ’na na manimani rima i roto i na tari‘a o te tane, tutuha ihora e tapea ’tura i to ’na arero. A hi‘o ai Iesu i nia i te ra‘i, na ô atura oia: “‘Ephata,’ teie te auraa ‘Ia matara oe.’” Faaroo ihora te tari‘a o te tane, e afaro atura ta ’na paraparau. Aita Iesu i hinaaro ia faaitehia te reira, mea au a‘e hoi na ’na ia tiaturi te taata ia ’na no ta ratou iho i ite e i faaroo.—Mareko 7:32-36.

“Maere roa ihora” te taata i to ratou iteraa i te mana o Iesu e faaora i tera mau ma‘i. Parau atura ratou: “E ohipa faahiahia ana‘e ta ’na i rave, ia ’na hoi e faaroo ai te tari‘a turi e e paraparau ai te vava.”—Mareko 7:37.