Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 27

Titauraahia Mataio

Titauraahia Mataio

MATAIO 9:9-13 MAREKO 2:13-17 LUKA 5:27-32

  • TITAURAA IESU IA MATAIO TE TITAU TUTE

  • AMUIRAA TE MESIA I TE FEIA RAVE HARA NO TE TAUTURU IA RATOU

I muri iho i to ’na faaoraraa i te ma‘i o te hapepa, faaea ihora Iesu na Kaperenaumi i te pae miti o Galilea. Haere faahou maira te nahoa ia ’na ra, e haapii atura oia ia ratou. A haere noa ’i oia, ite ihora oia ia Mataio, pii-atoa-hia Levi, e parahi ra i te fare aufauraa tute. Faatae atura Iesu i teie titauraa faahiahia mau ia Mataio: “A pee mai ia ’u.”—Mataio 9:9.

Eita e ore e ua ite ê na Mataio i te mau haapiiraa a Iesu e te mau ohipa mana ta ’na i rave na Kaperenaumi, mai ia Petero, Anederea, Iakobo e Ioane atoa. Farii ihora Mataio i taua titauraa ra, mai ia ratou. Ua faataa Mataio i te reira i roto i ta ’na Evanelia, a na ô ai: “Tia a‘era taua taata ra [o Mataio iho ïa] e pee maira” ia Iesu. (Mataio 9:9) Vaiiho atura ïa Mataio i ta ’na mau hopoia titau tute e riro maira ei pǐpǐ na Iesu.

Peneia‘e no te faaite i to ’na mauruuru no taua titauraa taa ê ra a Iesu, faatupu ihora Mataio i te hoê tamaaraa rahi i to ’na fare. Ua titau-manihini-hia Iesu e ta ’na mau pǐpǐ. O vai ma atoa? Vetahi ïa mau titau tute, hoê â ohipa ta ratou Mataio ma na mua ’‘e. Na ratou e titau i te tute no te faatereraa Roma mea riri-roa-hia e te taata, tae noa ’tu te mau tute i nia i te mau pahi e tapae mai i te uahu, i nia i te feia hoohoo ratere na te mau purumu rahi, e i nia i te mau tao‘a no rapae mai. Eaha te mana‘o o te rahiraa o te ati Iuda i taua mau titau tute ra? Mea hae na te taata ia ratou, no te mea pinepine ratou i te faaaufau i te tute hau a‘e i tei titauhia. E feia rave hara atoa to te tamaaraa, ua matauhia ratou ei taata e rave i te ohipa ino.—Luka 7:37-39.

A hi‘opoa ’i te mau Pharisea faahua parau-tia ia Iesu e tamaa ra e taua mau taata ra, ui maira ratou i ta Iesu mau pǐpǐ: “Eaha ta outou orometua e tamaa ’i e te feia titau tute e te feia rave hara?” (Mataio 9:11) I to Iesu faarooraa i ta ratou parau, na ô atura oia: “E ere te taote no te feia oraora maitai, no te feia ma‘i râ. A haere na ïa a haapii i te auraa o teie parau: ‘O te aroha hamani maitai ta ’u e hinaaro eiaha te tusia.’ Ua haere mai hoi au e titau i te feia rave hara ia tatarahapa, eiaha râ te feia parau-tia.” (Mataio 9:12, 13; Hosea 6:6) Noa ’tu e ua faahiti te mau Pharisea ia Iesu ei “orometua,” aita ratou i tiaturi e e orometua iho â oia. Aita ratou i hinaaro ia haapii Iesu ia ratou i te mea tia.

E au ra e ua titau manihini Mataio i te mau titau tute e te feia rave hara i to ’na fare ia nehenehe ratou e faaroo i ta Iesu haapiiraa, a maitai mai ai ratou i te pae varua. “Mea rahi [hoi] o ratou tei pee ia ’na.” (Mareko 2:15) Ua hinaaro Iesu e tauturu ia ratou ia faahoa ’tu i te Atua. Aita Iesu i hi‘o ino ia ratou, mai te mau Pharisea faahua parau-tia. Ma te aumihi e te aroha hamani maitai, e nehenehe o ’na e riro ei taote pae varua no te feia atoa e ma‘ihia ra i te pae varua.

Ua aroha hamani maitai Iesu i te mau titau tute e te feia rave hara, eiaha no te tapo i to ’na mata i nia i ta ratou mau hara, no te faaite râ i to ’na aumihi mai ta ’na i na reira i nia i te feia ma‘i. A haamana‘o na i to ’na tapearaa i te tane lepera ma te aumihi, a na ô atu ai: “E tia ia ’u. Ia mâ oe.” (Mataio 8:3) Eiaha anei ïa tatou e faatupu atoa i taua aroha hamani maitai ra i nia i te feia e hinaaro ra i te tauturu i te pae varua?