Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 44

Haamamûraa Iesu i te vero

Haamamûraa Iesu i te vero

MATAIO 8:18, 23-27 MAREKO 4:35-41 LUKA 8:22-25

  • MǍRÛRAA TE VERO IA IESU I TE MITI O GALILEA

Mea rahi ta Iesu i rave i taua mahana taatoa ra, eita e ore e ua rohirohi oia. I te ahiahi, parau atura oia i ta ’na mau pǐpǐ: “Mai fano ana‘e i tera ’tu pae,” mai Kaperenaumi atu.—Mareko 4:35.

I hitia o te râ o te pae miti o Galilea, o te tuhaa fenua ïa o Geregasa, parau-atoa-hia Dekapoli. O na oire o Dekapoli te pu o te ta‘ere Heleni, noa ’tu e mea rahi atoa te ati Iuda e faaea ra i reira.

Ua ite mai te taata i to Iesu faarueraa i Kaperenaumi. Te vai ra te tahi atu mau poti o te haamata ra i te fano i tera ’tu pae. (Mareko 4:36) E ere mea atea e tapae ai i ǒ atu. E au te miti o Galilea i te hoê roto pape rahi e 21 kilometera te roa, 12 kilometera te aano, e mea hohonu.

E taata tia roa Iesu. Noa ’tu râ, ua rohirohi oia no ta ’na taviniraa rahi. No reira, i muri a‘e i to ratou revaraa, tarava ihora oia i muri i te poti e varea ’tura i te taoto te upoo i nia i te turua.

E ihitai aravihi e rave rahi o te mau aposetolo, e û râ ratou i te fifi i taua tere ra. E mou‘a te haaati ra i te miti o Galilea, e pinepine mea huru mahanahana te iriatai. I te tahi taime, e farara mai te mata‘i to‘eto‘e na nia mai i te mou‘a i nia i te iriatai mahanahana, a tupu taue atu ai te vero puai i nia i te miti. Te ohipa ïa i tupu. Aita i maoro, fati maira te are i nia i te poti. “Î a‘era to ratou poti i te pape e fatata ’tura i te tomo.” (Luka 8:23) O Iesu râ, te taoto noa ra ïa!

Te rohi ra te mau ihitai i te faatere i te poti a faaû ai i te vero, ua na reira a‘ena hoi ratou. I tera râ taime, aita i haere faahou. No te riaria ia pohe ratou, faaara a‘era ratou ia Iesu e parau maira: “E te Fatu, a faaora ia tatou, a pohe tatou!” (Mataio 8:25) Te riaria ra te mau pǐpǐ ia paremo ratou!

Ara maira Iesu e na ô atura i te mau aposetolo: “Eaha outou e mǎta‘u roa ’i, feia mea iti te faaroo?” (Mataio 8:26) Faaue ihora Iesu i te mata‘i e te miti: “A faaea! Mamû!” (Mareko 4:39) Pohe ihora te mata‘i rahi e mania ’tura te miti. (Te faatia ra Mareko raua Luka i teie ohipa maere i tupu, ma te haapapu na mua e ua mǎrû semeio te vero ia Iesu. I muri iho to raua faahitiraa i te ereraa te mau pǐpǐ i te faaroo.)

Eaha râ te huru o te mau pǐpǐ? No ite noa mai nei ratou i te mǎrûraa te vero puai e te maniaraa te miti. Mǎta‘u roa ihora ratou, a na ô ai te tahi i te tahi: “O vai hoi teie taata? E faaroo atoa te mata‘i e te miti ia ’na.” Tapae maitai atura ratou i tera ’tu pae o te miti (Mareko 4:41–5:1) Peneia‘e ua nehenehe te tahi atu mau poti tei fano atoa mai e ho‘i i uta i te pae tooa o te râ.

Mea mahanahana mau â ia ite e e mana to te Tamaiti a te Atua i nia i te mata‘i e te miti! Ia tae i te mahana e haapao roa mai ai oia i to tatou fenua ia faatere mai oia ei Arii, e parahi hau noa te taata atoa, aita hoi e ati natura riaria faahou!