Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 45

Mana i nia e rave rahi demoni

Mana i nia e rave rahi demoni

MATAIO 8:28-34 MAREKO 5:1-20 LUKA 8:26-39

  • TIAVARURAA I TE DEMONI O TE TOMO I ROTO I TE PUAA

A tapae ai te mau pǐpǐ i uta i muri iho i to ratou faaûraa i te vero, ua horuhoru roa ratou. Haere maira e piti tane taehae ua uruhia e te demoni na roto mai i te vahi hunaraa i pihai iho noa mai, e horo tia maira ia Iesu ra! Hoê noa o raua tei faahitihia, peneia‘e mea ino a‘e o ’na e mea maoro a‘e to ’na ururaahia e te demoni.

I haere hanoa na teie tane mea aroha hoi ma te ahu ore. I te po e te ao, “na te vahi hunaraa e te mau mou‘a, i tutuô noa na oia, o tei mutumutu hanoa ia ’na iho i te ofai.” (Mareko 5:5) No to ’na taehae, i riaria na te taata i te haere na taua e‘a ra. Ua tamata vetahi i te taamu ia ’na, ua mutu râ te fifi ia ’na e ua hu‘ahu‘a roa te auri i nia i to ’na avae. Aita i mau i te taata ia tapea ia ’na.

A tapiri mai ai teie tane ia Iesu e a tuturi ai i to ’na pae avae, rave a‘era te mau demoni i roto ia ’na e ia tuô oia: “Eaha ta oe ohipa i ǒ nei, Iesu, Tamaiti a te Atua Teitei? Ia horeo mai oe i te i‘oa o te Atua e e ore oe e haamauiui ia ’u.” Faaite ihora Iesu e e mana to ’na i nia i te mau demoni, a faaue ai: “Haere i rapae i tera taata, oe te varua viivii.”—Mareko 5:7, 8.

Mea rahi hoi te demoni i roto i teie tane. I to Iesu uiraa, “O vai to oe i‘oa?” pahono maira te demoni: “O Nuu, mea rahi hoi matou.” (Mareko 5:9) Hoê nuu Roma, ua tausani ïa faehau. Mea rahi ïa te demoni i roto i teie tane e ua au roa ratou e haamauiui ia ’na. Taparu maira ratou ia Iesu “eiaha e faaue ia ratou ia haere i roto i te abuso.” E au ra e ua taa ia ratou eaha te tiai mai ra ia ratou e to ratou aratai o Satani.—Luka 8:31.

Piri i te 2 000 puaa te amu ra i te maa na pihai iho mai. E animara viivii teie ia au i te ture a Mose e eiaha roa ’tu te ati Iuda e faaamu. Na ô maira te mau demoni: “A tuu ia matou i roto i te mau puaa.” (Mareko 5:12) Parau atura Iesu ia ratou ia haere, e tomo a‘era ratou i roto i te mau puaa. Horo atura na 2 000 puaa, topa ’tura i roto i te miti na nia mai i te pari e paremo a‘era.

A ite ai te mau tiai puaa i te reira, horo a‘era  ratou e faatia na te oire e na te mataeinaa i te ohipa i tupu, e haere maira te taata e hi‘o. A tae mai ai ratou, ite a‘era ratou i te tane ua haere te mau demoni i rapae, mea maitai e ua afaro te feruriraa. E ahu to ’na e te parahi ra oia i te pae avae o Iesu!

Mǎta‘u roa ihora te feia tei faaroo i te ohipa i tupu aore ra tei ite i taua tane ra. Aita ratou e taa ra eaha te tupu i nia ia ratou. Parau onoono maira ratou ia Iesu ia faarue mai i to ratou fenua. A haere ai Iesu i nia i te poti e fatata ra i te reva, taparu maira te tane tei uruhia na i te demoni ia pee oia ia ’na. Parau atura râ Iesu: “A ho‘i i to oe fare, i to oe mau fetii, e a faatia ’tu i te mau mea atoa ta Iehova i rave no oe e i to ’na aroharaa ia oe.”—Mareko 5:19.

I faaue na Iesu i te feia ta ’na i faaora te ma‘i eiaha e faaite i te reira. Aita hoi oia i hinaaro ia ite te taata o vai o ’na na nia noa i te mau mea faahiahia roa ta ratou i faaroo. No te tane râ tei uruhia na i te demoni, o ’na te haapapuraa ora o to Iesu mana, a faaite haere atu ai oia i ta Iesu i rave i te feia eita Iesu e farerei roa ’tu. E nehenehe atoa ta ’na haapapuraa e faahapa i te mau parau tano ore no nia i te mau puaa tei paremo. Haere atura ïa te tane e faaite ati a‘e Dekapoli i ta Iesu i rave no ’na.