Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 53

Hoê faatere e mana to ’na i nia i te mata‘i e te miti

Hoê faatere e mana to ’na i nia i te mata‘i e te miti

MATAIO 14:22-36 MAREKO 6:45-56 IOANE 6:14-25

  • HINAARORAA TE TAATA E FAAARII IA IESU

  • HAERERAA IESU NA NIA I TE MITI, POHERAA TE MATA‘I IA ’NA

Putapû roa ihora te nahoa i to Iesu faatamaa-semeio-raa e tausani taata. Parau a‘era ratou e “teie mau â te peropheta o te haere mai i roto i te ao nei,” te Mesia, e nehenehe iho â o ’na e riro ei faatere hinaaro-mau-hia. (Ioane 6:14; Deuteronomi 18:18) Opua a‘era te nahoa e haru ia Iesu no te faaarii ia ’na.

Taa ihora râ ia Iesu ta ratou opuaraa. Tuu atura oia i te nahoa ia ho‘i e faaue atura i ta ’na mau pǐpǐ ia ho‘i i nia i to ratou poti. No te fano ihea? I Betesaida e i Kaperenaumi i muri iho. O Iesu râ, haere atura ïa i nia i te mou‘a e pure o ’na ana‘e i taua po ra.

I te aahiata te marama noa ra te ava‘e, ite ihora Iesu i te poti i tai. Mea mataare te miti no te mata‘i puai, e “ua rohirohi” te mau aposetolo “i te hôeraa no te mata‘i e na mua mai ra.” (Mareko 6:48) Pou atura Iesu mai nia mai i te mou‘a e haere atura ia ratou ra na nia i te miti. “Ua hôe ratou fatata e pae aore ra e ono kilometera i te atea.” (Ioane 6:19) Ite maira te mau pǐpǐ ia Iesu mai te huru ra e e hemo ratou ia ’na, e tuô a‘era ratou ma te mehameha: “E orama!”—Mareko 6:49.

Tamǎrû atura Iesu ia ratou: “Ia itoito outou! O vau teie, eiaha e mǎta‘u.” Na ô maira râ Petero: “E te Fatu, i te mea e o oe teie, a faaue mai na ia ’u ia haere atu ia oe ra na nia i te miti.” Parau maira Iesu: “Haere mai!” Pou ihora Petero, e haere tia ’tura ia Iesu ra na nia i te miti. I to ’na râ hi‘oraa i te mata‘i rahi, mǎta‘u ihora Petero e haamata ’tura i te mure i raro i te miti. Pii atura oia: “E te Fatu, faaora mai ia ’u!” Toro oioi atura Iesu i to ’na rima, haru ihora ia Petero e na ô atura: “Taata faaroo tapetepete, eaha oe i feaa ’i?”—Mataio 14:27-31.

Haere atura Petero e Iesu i nia i te poti, e pohe a‘era te mata‘i. Maere ihora te mau pǐpǐ. Mea tano anei râ? Ahani ratou i taa i “te auraa o na faraoa ta Iesu i opere” a‘enei no te faatamaa semeio e tausani taata, eita ïa ratou e maere ia haere Iesu na nia i te miti e ia tamǎrû i te mata‘i. Tahopu maira ratou ia ’na, e na ô maira: “E Tamaiti mau â oe na te Atua.”—Mareko 6:52; Mataio 14:33.

Tapae atura ratou i te fenua ruperupe e te hotu maitai o Genesareta, i te pae apatoa i Kaperenaumi. Tutau ihora ratou, e pou maira i tatahi. Ite a‘era te taata e o Iesu tera, e afai maira ratou e te tahi atu ati a‘e taua fenua ra i to ratou mau taata ma‘i. I to ratou tapearaa i te hiti ahu o Iesu, ora roa ihora to ratou ma‘i.

I tera taime, taa ihora i te nahoa o tei ite mata i to Iesu faatamaa-semeio-raa e tausani taata e ua reva Iesu. No reira, i te tapaeraa mai te tahi mau poti na Tiberia mai, haere a‘era te taata na nia i te mau poti no te fano i Kaperenaumi e imi ia Iesu. I to ratou iteraa ia Iesu, ani atura ratou: “Rabi, inafea oe i te taeraa mai i ǒ nei?” (Ioane 6:25) Tama‘i ihora Iesu ia ratou. E tumu i na reira ’i oia, ta tatou ïa e ite mai.