Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 64

Faufaaraa ia faaore i te hara

Faufaaraa ia faaore i te hara

MATAIO 18:21-35

  • FAAORE I TE HARA E HITU TAIME?

  • FAAHOHO‘ARAA O TE TAVINI AITA I AROHA I TO ’NA HOA TAVINI

Ua faaroo Petero i ta Iesu a‘oraa e ia faaafaro e piti taeae i to raua fifi o raua ana‘e. E au ra râ te hinaaro ra oia e ite ehia taime ia tutava ’i te hoê taeae i te na reira.

Ui maira Petero: “E te Fatu, ehia taime e tia ’i i to ’u taeae ia hara mai ia ’u e ia faaore au i ta ’na hara? E hitu anei taime?” E toru taime ia au i te tahi mau aratai haapaoraa. Ua mana‘o paha ïa Petero e mea maitai a‘e o ’na ia faaore oia i te hara a to ’na taeae e hitu taime.—Mataio 18:21.

Aita râ te tapaopaoraa i te rahiraa taime i hapa mai ai te tahi taata e tuati ra e ta Iesu haapiiraa. Pahono atura oia ia Petero: “Te parau atu nei au ia oe: Eiaha e hitu taime, e 77 râ.” (Mataio 18:22) Te auraa, pauroa te taime. Eiaha Petero e taotia i te rahiraa taime e faaore ai oia i te hara a to ’na taeae.

Faataa maitai atura Iesu ia Petero e te tahi atu i te faufaaraa ia faaore i te hara na roto i te faahoho‘araa o te hoê tavini tei ore i pee i te huru aroha hamani maitai o to ’na fatu. Ua hinaaro te arii ia aufau ta ’na mau tavini i ta ratou tarahu. Arataihia maira te hoê tavini tei tarahu ia ’na 10 000 taleni [e 60 000 000 denari]. Aita râ e moni ta ’na no te aufau i ta ’na tarahu. Faaue ihora ïa te arii ia hoohia te tavini, ta ’na vahine e ta ’na mau tamarii e pee ai ta ’na tarahu. Tuturi ihora te tavini i te pae avae o to ’na fatu e taparu maira: “Tiai rii na oe, e faaho‘i pauroa ’tu iho â vau i ta oe moni.”—Mataio 18:26.

Aroha ihora te arii i te tavini e faaore noa ’tura i ta ’na tarahu iti rahi. I muri iho, haere atura teie tavini e ite ihora i te hoê hoa tavini tei tarahu ia ’na 100 denari. Haru ihora oia ia ’na e uumi atura i to ’na arapoa, a na ô ai: “Faaho‘i pauroa mai i ta ’u moni.” Tuturi ihora te hoa tavini i to ’na pae avae e taparu maira: “Tiai rii na oe, e faaho‘i atu iho â vau i ta oe moni.” (Mataio 18:28,  29) Aita râ te tavini ua faaorehia ta ’na tarahu e te arii i pee i te hi‘oraa o to ’na fatu. Ua faaue râ oia ia hurihia to ’na hoa tavini, mea iti a‘e ta ’na moni e faaho‘i, i roto i te fare tapearaa e ia pee noa ’tu ta ’na tarahu.

Faatia ’tura Iesu e ua haere te tahi atu mau tavini e faaite i te fatu e aita tera tavini i aroha i to ’na hoa tavini. Riri ihora te arii, faaue atura e tii i taua tavini ra e na ô atura: “Tavini ino, ua faaore pauroa vau i ta oe tarahu i to oe taparuraa mai. Eiaha anei ïa oe e aroha atoa i to hoa tavini, mai ia ’u i aroha ia oe?” Tuu atura te arii tei riri roa i taua tavini ra i te mau tiai fare tapearaa e ia pee noa ’tu ta ’na tarahu. Na ô atura Iesu: “E na reira atoa to ’u Metua i te ra‘i ia outou ia ore outou tataitahi e faaore i te hapa a to ’na hoa ma te aau atoa.”—Mataio 18:32-35.

Tera te haapiiraa faufaa no nia i te faaoreraa i te hara. Mea rahi ta tatou tarahu, aore ra hara, ta te Atua i faaore. Noa ’tu eaha te hapa a te hoê taeae ia tatou, mea iti ïa. E faaore atoa Iehova i ta tatou mau hara, eiaha hoê noa taime, e rave rahi râ taime. Eita anei ïa ta tatou e nehenehe e faaore noa ’tu i te hapa a to tatou taeae, ia hapa noa mai oia? Mai ta Iesu i haapii i roto i ta ’na A‘oraa i nia i te mou‘a, e faaore te Atua i ta tatou mau tarahu, mai ia tatou atoa i faaore i ta vetahi ê.—Mataio 6:12.