Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 65

Haapiiraa a haere ai i Ierusalema

Haapiiraa a haere ai i Ierusalema

MATAIO 8:19-22 LUKA 9:51-62 IOANE 7:2-10

  • TE MANA‘O O TE MAU TEINA O IESU IA ’NA

  • EAHA TE FAUFAARAA O TE TAVINIRAA NO TE FAATERERAA ARII?

Mea huru maoro to Iesu raveraa i ta ’na taviniraa i Galilea, mea farii a‘e te taata i reira i to Iudea. A vai atoa ’i oia i Ierusalema e i to ’na faaoraraa i te ma‘i o te hoê tane i te Sabati, “rahi roa ’tura to te ati Iuda imiraa i te ravea no te haapohe ia ’na.”—Ioane 5:18; 7:1.

E Tetepa aore ra Atopa taua ava‘e ra i 32, e te fatata mai ra te Oroa patiaraa tiahapa e hitu mahana, e te hoê oroa mo‘a i te va‘u o te mahana. Na teie oroa e opani i te matahiti o te tarena faaapu. E taime oaoaraa rahi e te haamauruururaa.

Parau onoono maira to Iesu mau teina, Iakobo, Simona, Iosepha e Iuda, ia ’na: “A faarue i teie vahi e a haere i Iudea.” O Ierusalema te pu o te haamoriraa i Iudea. Mea taata na reira i na oroa matahiti e toru. Na ô maira to Iesu mau teina: “Aore roa hoi e taata e rave huna i te tahi mea ia hinaaro oia ia itehia o ’na e te taata. Te rave ra oe i teie mau mea, a rave ïa i mua i te taata.”—Ioane 7:3, 4.

“Aita” hoi teie na teina “e faatupu ra i te faaroo ia ’na,” te Mesia. To ratou hinaaro, ia ite te feia i ruru mai no te oroa ia ’na ia faatupu i te tahi mau ohipa mana. Mea atâta hoi te reira, ta Iesu ïa i taa a parau atu ai: “Aita e tumu e hae ai teie nei ao ia outou, te hae nei râ ia ’u no te mea te faaite nei au e mea ino ta ratou mau ohipa. A pauma outou i te oroa. Eita vau e haere i taua oroa ra i teie nei, no te mea aita â to ’u taime i tae maira.”—Ioane 7:5-8.

Tau mahana i muri iho i to Iesu mau teina revaraa e te tahi atu mau ratere, reva huna ’tura Iesu e ta ’na mau pǐpǐ, ma te ore e itehia mai e te taata. Ua pou tia ’tu ratou na Samaria, eiaha râ na te hiti anavai Ioridana tei matauhia a‘e. Ia noaa mai te nohoraa e te maa i Samaria no Iesu e ta ’na mau pǐpǐ, tono ihora oia i te tahi mau vea na mua ia ratou i te hoê oire no te faaineine i te mau mea. No te mea te haere ra Iesu i Ierusalema no te oroa a te ati Iuda, aita to reira mau taata i farii ia ratou, a ore atu ai ratou e nehenehe e faaea i ǒ. Ui maira Iakobo raua Ioane ma te riri: “E te Fatu, hinaaro anei oe ia faaue mâua i te auahi ia mairi mai te ra‘i mai ia mou ratou?” (Luka 9:54) Tama‘i ihora Iesu ia raua no to raua mana‘oraa i te reira, e reva ’tura ratou.

A haere noa ’i ratou, na ô maira te hoê papai parau ia Iesu: “Orometua, e pee au ia oe i te mau vahi atoa ta oe e haere.” Parau atura Iesu: “E apoo to te urî oviri e e ofaaraa to te manu o te reva. Te Tamaiti râ a te taata nei, aita ïa to ’na e vahi taotoraa.” (Mataio 8:19, 20) Te faaite  ra oia i te papai parau e e faaruru oia i te fifi ia riro mai oia ei pǐpǐ na Iesu. E au ra mea teoteo roa te papai parau no te farii i teie huru oraraa. E o tatou, ua ineine anei tatou i te pee ia Iesu?

Na ô atura Iesu i te tahi atu taata: “A pee mai ia ’u.” Parau maira taua taata ra: “E te Fatu, a tuu na oe ia ’u ia haere na mua e huna i to ’u metua tane.” Ua ite râ Iesu i to ’na tupuraa, e na ô atura: “A vaiiho na tei pohe e huna i tei pohe. O oe râ, a haere e faaite na te mau vahi atoa i te Faatereraa arii a te Atua.” (Luka 9:59, 60) Aita â te metua tane i pohe atura. Ahiri oia, aita ïa ta ’na tamaiti ia Iesu ra e paraparau ra ia ’na. Aita teie tamaiti i ineine i te tuu i te Faatereraa arii a te Atua i te parahiraa matamua o to ’na oraraa.

A pou ai ratou na te e‘a e tae atu ai i Ierusalema, na ô maira te tahi atu taata ia Iesu: “E te Fatu, e pee au ia oe, na mua râ vaiiho na oe ia ’u ia haere e aroha i to ’u utuafare.” Na ô atura Iesu: “Te taata e tuu i to ’na rima i nia iho i te arote, a hi‘o ai i muri, e ore ïa e tano ia ’na ia ô i roto i te Faatereraa arii a te Atua.”—Luka 9:61, 62.

Mea titauhia ia tiatonu te feia e hinaaro e riro ei pǐpǐ mau na Iesu i te taviniraa no te Faatereraa arii. Ia ore te taata arote e hi‘o noa i mua, e fefe ïa ta ’na reni aroteraa. Ia faaea oia i te arote no te hi‘o eaha to muri, e taere te ohipa. Oia atoa no te taata e hi‘o i muri i teie faanahoraa tahito o te ao nei, e hahi ê oia i te e‘a e tae atu ai i te ora mure ore.