Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 52

Maa faraoa e maa i‘a ua tamaa e tausani taata

Maa faraoa e maa i‘a ua tamaa e tausani taata

Oaoa ihora na 12 aposetolo i to ratou tere pororaa na Galilea, e faatia maira ia Iesu i “te mau mea atoa ta ratou i rave e i haapii atu.” Ua rohirohi iho â ïa ratou. No te rahi râ o te taata tei haere mai e tei ho‘i atu, aita ’tura e taime to ratou no te tamaa. Na ô atura Iesu: “Mai haere ana‘e i te hoê vahi mo‘emo‘e e faafaaea rii.”—Mareko 6:30, 31.

Haere atura ratou i nia i te hoê poti, eita e ore i pihai iho i Kaperenaumi, e fano atura i te hoê vahi mo‘emo‘e i te pae hitia o te râ o te anavai Ioridana i ǒ roa ’tu i Betesaida. Mea rahi râ te taata tei ite ia ratou i te revaraa, e ua faarooroo te tahi atu. Horo a‘era ratou pauroa na tatahi e na mua ’tura ratou i te tae a tapae mai ai te poti.

I to Iesu pouraa mai, ite atura oia i te nahoa e aroha ihora ia ratou, e au hoi i te mau mamoe aita e tiai. “Haapii atura oia ia ratou e rave rahi parau mau” no nia i te Faatereraa arii. (Mareko 6:34) E faaora ’tura oia i “te feia ma‘i.” (Luka 9:11) I te ahiahi, na ô maira te mau pǐpǐ ia ’na: “E vahi mo‘emo‘e teie e ua ahiahi ê na. A tuu na i te nahoa ia haere na te mau oire rii e hoo mai i te maa na ratou.”—Mataio 14:15.

Parau atura Iesu: “Aita e faufaa ia haere ratou, na outou e horoa i te maa na ratou.” (Mataio 14:16) Ua ite ê na Iesu eaha ta ’na e rave. Noa ’tu râ, tamata ihora oia ia Philipa a ui ai: “Ihea tatou e hoo mai ai i te faraoa no te faatamaa i teie mau taata?” O Philipa iho â te tano ia uihia, no Betesaida hoi oia i pihai iho mai. E ere te hooraa mai i te faraoa te ravea. Te vai ra hoi piri i te 5 000 tane. E tataipiti te numera ia taio-atoa-hia te vahine e te tamarii! Pahono maira Philipa: “Eita e navai e 200 denari faraoa e noaa ’i ta te taata tataitahi maa faraoa iti.”—Ioane 6:5-7. *

Peneia‘e no te faaite e eita e haere ia faatamaa ia ratou pauroa, parau maira Anederea: “To ǒ nei te hoê tamaiti iti e pae faraoa kerite ta ’na e e piti i‘a rii. E nafea ïa e navai ai no teie rahiraa taata?”—Ioane 6:9.

E Mati aore ra Eperera taua ava‘e ra, hou rii te Pasa 32, e mea matie roa na taua vahi ra. Parau atura Iesu i ta ’na mau pǐpǐ ia haaparahi i te nahoa e 50 te tahi pǔpǔ e 100 te tahi atu. Rave ihora oia i na faraoa e pae e na i‘a e piti e haamauruuru a‘era i te Atua. Ofati ihora oia i te faraoa, vahi ihora i te i‘a e tuu atura i te mau pǐpǐ, o tei opere na te nahoa. Tamaa a‘era ratou pauroa e paia ’tura! Auê te maere e!

Parau atura Iesu i ta ’na mau pǐpǐ: “A haaputu mai i te toea faraoa ia ore ia mâu‘a.” (Ioane 6:12) Haaputu a‘era ratou i te toea faraoa i roto 12 farii!

^ par. 4 Hoê denari te moni no hoê mahana ohipa.