Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 37

Faatiaraa mai Iesu i te tamaiti a te hoê vahine ivi

Faatiaraa mai Iesu i te tamaiti a te hoê vahine ivi

LUKA 7:11-17

  • TIA-FAAHOU-RAA I NAINA

I muri iho i to Iesu faaoraraa i te ma‘i o te tavini a te raatira faehau, faarue ihora oia i Kaperenaumi no te haere e 32 kilometera i te pae apatoa tooa o te râ i te oire o Naina. E ere o ’na ana‘e, ua apee atoa mai ta ’na mau pǐpǐ e te hoê nahoa. E au ra e i te ahiahi to ratou tapiriraa ’tu i Naina. Farerei a‘era ratou e rave rahi ati Iuda o te haere ra i te hoê hunaraa. Te amohia ra te tino pohe o te hoê taurearea i rapae i te oire no te hunaraa.

E oto rahi to te metua vahine o te taurearea. E vahine ivi oia, e no pohe noa iho nei ta ’na ana‘e tamaiti. I te poheraa ta ’na tane, te vai ra â ta ’na tamaiti here ia ’na ra. Mea piri roa ïa raua, ua tiaturi hoi oia i ta ’na tamaiti no te haapao ia ’na. Ua pohe atoa râ oia. O vai atura ïa te faaea i pihai iho ia ’na e te aupuru atu?

I te iteraa Iesu i te oto rahi o taua vahine ra e to ’na peapea, putapû roa ihora to ’na aau. Ma te mahanahana e te tiaturi papu, na ô atura oia ia ’na: “Eiaha e ta‘i faahou.” Tapiri atura oia e tapea ’tura i te ro‘i to nia iho te tino pohe. (Luka 7:13, 14) No to ’na huru e ta ’na raveraa, tia noa ihora to te oire e oto ra. ‘Eaha oia i na reira ’i i te parau, e eaha ta ’na e rave?’ ta e rave rahi paha i mana‘o.

E te feia ïa e ratere ra e o Iesu tei ite ia ’na ia faatupu i te mau ohipa mana a faaora ’i e rave rahi ma‘i? E au ra e aita ratou i ite a‘enei ia Iesu ia faatia mai i te hoê taata pohe. Noa ’tu ua tupu te tahi mau tia-faahou-raa i tahito ra, e nehenehe anei Iesu e na reira? (Te mau arii 1, 17:17-23; Te mau arii 2, 4:32-37) Faaue atura Iesu: “Taurearea, te parau atu nei au ia oe: A tia mai!” (Luka 7:14) Tia maira iho â te taurearea e haamata ’tura i te paraparau! Tuu atura Iesu ia ’na i to ’na metua vahine ra tei maere roa e tei oaoa roa râ. E ere faahou ïa o ’na ana‘e.

I te iteraa te taata e te ora mau ra te taurearea, faahanahana ’tura ratou ia Iehova te Tumu  o te ora, e na ô a‘era vetahi: “Ua tia mai te hoê peropheta rahi i rotopu ia tatou.” Ua taa i te tahi atu te auraa o ta Iesu ohipa faahiahia i rave a na ô ai: “Ua haamana‘o mai te Atua i to ’na nunaa.” (Luka 7:16) Atutu atura teie parau faahiahia ati a‘e taua fenua ra. E au ra e ua tae roa teie parau i Nazareta te oire o Iesu 10 kilometera i te atea, e tae roa i te pae apatoa i Iudea.

Tei roto noa â Ioane Bapetizo i te fare tapearaa, e mea anaanatae roa na ’na ta Iesu e nehenehe e faatupu. Faatia ’tura ta ’na mau pǐpǐ ia ’na i teie mau semeio. Ua aha ’tura oia?