Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 40

Haapiiraa no nia i te faaoreraa i te hara

Haapiiraa no nia i te faaoreraa i te hara

LUKA 7:36-50

  • NINIIRAA TE HOÊ VAHINE RAVE HARA I TE MONO‘I I NIA I TO IESU AVAE

  • FAAHOHO‘ARAA NO NIA I TE FAAORERAA HARA

Tei te huru o to ratou aau i farii ai te taata i ta Iesu i parau e i rave aore ra aita. Ua ite-maitai-hia te reira i te fare o te hoê Pharisea o Simona te i‘oa i Galilea. Ua titau manihini oia ia Iesu e tamaa i ǒ ’na, peneia‘e no te farerei roa ’tu i tei faatupu i te mau ohipa faahiahia. Ua farii Iesu, a mana‘o ai e e ravea teie no te poro i te mau manihini. Ua na reira atoa hoi oia i to ’na titauraahia e tamaa e te mau titau tute e te feia rave hara.

Tera râ, aita Iesu i farii-maitai-hia mai te hoê manihini. No te mea e repo roa e e ahu te avae mea fatafata hoi te tiaa i te haereraa na nia i te mau purumu i Paretetina, e peu matauhia ia horoi i te avae o te hoê manihini i te pape no te farii maitai ia ’na. Aita i na reirahia no Iesu. Aita atoa oia i apahia mai tei matauhia. E peu atoa ia ninii maa mono‘i i nia i te rouru o te manihini no te hamani maitai e te farii maitai atu. Aita atoa te reira i ravehia no Iesu. Aita iho â oia i farii-maitai-hia.

Haamata a‘era te mau manihini e tarava ra i te amuraa maa i te tamaa. A tamaa ’i ratou, tomo omo‘e maira te hoê vahine aita i titau-manihini-hia i roto i te piha tamaaraa. Ua “matauhia [oia] na te oire ei vahine rave hara.” (Luka 7:37) Pauroa te taata, mea hara ana‘e. E au ra râ e i rave na teie vahine i te peu taotoraa tia ore, te peu taiata paha. Ua faaroo paha oia i te mau haapiiraa a Iesu, oia atoa ta ’na titauraa i te feia atoa e teimaha ra ia haere mai ia ’na ra ia tamahanahanahia ratou. (Mataio 11:28, 29) E au ra e no to ’na putapû i ta Iesu i parau e i rave, imi maira oia ia ’na.

Tapiri maira oia ia Iesu e tuturi ihora i to ’na pae avae. Rari ihora to Iesu avae i to ’na roimata, e tamǎrô atura i to ’na rouru. Apa maira oia i to ’na avae, a ninii atu ai i nia iho maa mono‘i no‘ano‘a ta ’na i afai mai. Hi‘o noa maira Simona ma te au ore, a feruri ai: “Ahiri e peropheta teie taata, e ite ïa o ’na o vai e eaha teie vahine e tapea nei i to ’na avae, e vahine rave hara.”—Luka 7:39.

Ua taa ia Iesu to Simona mana‘o. Na ô atura oia: “Simona, e parau ta ’u ia oe.” Na ô maira Simona: “A parau mai Orometua!” Na ô atura Iesu: “E piti taata tei tarahu i te moni i te tahi atu taata, e 500 denari tarahu ta te tahi, e 50 ta te tahi atu. No te mea râ e aita ta raua e moni no te faaho‘i, faaore noa maira taua taata ra i ta raua tarahu. O vai ïa o raua te here atu â ia ’na?” Pahono maira Simona ma te mauruuru ore paha: “I to ’u mana‘o, o te taata ïa mea rahi a‘e ta ’na tarahu.”—Luka 7:40-43.

Te mana‘o atoa ïa o Iesu. Hi‘o atura oia i te vahine e na ô atura ia Simona: “Te ite ra oe i teie vahine? Ua tomo vau i roto i to oe fare, aita râ oe i horoa mai i te pape no to ’u avae. Teie râ vahine, ua horoi ïa i to ’u avae i to ’na roimata e ua tamǎrô i to ’na rouru. Aita oe i apa mai ia ’u, teie râ vahine, aita ïa i faaea i te apa i to ’u avae mai to ’u iho â tomoraa mai. Aita oe i ninii i te mono‘i i nia i to ’u upoo, teie râ vahine, ua ninii ïa i te mono‘i no‘ano‘a i nia iho i to ’u avae.” Ua taa ia Iesu e te faaite ra teie vahine i te tatarahapa mau no te raveraa i te peu taotoraa tia ore. Na ô atura Iesu: “Teie ïa ta ’u e parau atu, noa ’tu te rahi o te hara a teie vahine, ua faaorehia ïa. E faaite atu â ïa oia i te here. Te taata râ mea iti ta ’na hara i faaorehia, mea iti atoa ïa te here ta ’na e faaite.”—Luka 7:44-47.

Aita Iesu e tapo ra i te mata i nia i te peu taotoraa tia ore. Aita, te faatupu noa ra oia i te aumihi i nia i te feia tei rave i te hara rahi, o te faaite  ra râ i to ratou tatarahapa, a fariu atu ai i te Mesia ia tamǎrûhia ratou. Eita e ore e ua topa roa te hau o teie vahine i to Iesu parauraa ’tu: “Ua faaorehia ta oe mau hara. . . . Ua ora oe i to oe faaroo. A haere, eiaha oe e haapeapea.”—Luka 7:48, 50.