Eaha to roto?

Tapura tumu parau

 PENE 59

O vai te Tamaiti a te taata?

O vai te Tamaiti a te taata?

MATAIO 16:13-27 MAREKO 8:22-38 LUKA 9:18-26

  • ARAARARAA TE MATA O TE HOÊ MATAPO IA IESU

  • HOROARAAHIA IA PETERO NA TAVIRI O TE FAATERERAA ARII

  • TOHURAA IESU I TO ’NA POHE E TIA-FAAHOU-RAA

Tapae atura Iesu e ta ’na mau pǐpǐ i Betesaida. Aratai maira te taata i te hoê tane matapo ia Iesu e taparu maira ia tapea ia ’na ia ora to ’na ma‘i.

Aratai atura Iesu i taua tane ra i rapaeau i te oire rii ma te rave i to ’na rima. Parai atura oia i te huare i nia i to ’na na mata, e ui atura: “Eaha ta oe e ite ra?” Pahono maira te tane: “Te ite nei au i te taata, e au hoi i te tumu raau, te hahaere nei râ ratou.” (Mareko 8:23, 24) Tuu ihora Iesu i to ’na na rima i nia i to ’na na mata, e ite maitai ihora oia. Faaho‘i atura oia i teie tane i to ’na fare a parau maitai ai ia ’na eiaha e ho‘i i te oire rii.

I muri iho, pauma ’tura Iesu e ta ’na mau pǐpǐ i Kaisarea Philipi e 40 kilometera i te atea i te pae apatoerau. Tei te hoê teitei e 350 metera teie oire, e i te pae apatoerau hitia o te râ te tia ra te mou‘a Heremona ua tapo‘ihia te tupuai i te hiona. E piti mahana aore ra hau atu no teie tere.

I te hoê vahi, haere atura Iesu e pure o ’na ana‘e. E iva aore ra ahuru noa ava‘e te toe ra hou oia a pohe ai, e te haapeapea ra oia no ta ’na mau pǐpǐ. Ua faaea a‘enei e rave rahi i te pee ia ’na. Area te tahi atu, ua huru ê ïa aore ra aita i tiaturi faahou ia ’na. Te uiui ra paha ratou no te aha oia i ore ai i farii ia faaarii te taata ia ’na, aore ra i ore ai i horoa i te hoê tapao o te haapapu maitai o vai mau â o ’na.

I to te mau pǐpǐ tapiriraa mai ia Iesu e pure ra, ui atura oia: “O vai te Tamaiti a te taata nei i ta te taata parauraa?” Pahono maira ratou: “O Ioane Bapetizo ta vetahi, o Elia ta te tahi pae, o Ieremia aore ra hoê o te mau peropheta ta te tahi atu.” Ua mana‘o iho â vetahi e o Iesu hoê o taua mau taata ra tei tia mai te pohe mai. No te ite i to ratou mana‘o, ui atura Iesu i ta ’na mau pǐpǐ: “Outou râ, o vai au i ta outou parauraa?” Pahono oioi maira Petero: “O te Mesia oe, te Tamaiti a te Atua ora.”—Mataio 16:13-16.

Parau atura Iesu ia Petero e ia oaoa oia i ta te Atua i faaite ia ’na, a na ô faahou ai: “E parau atoa ’tu vau ia oe: O Petero oe. E patu vau i ta ’u amuiraa i nia i teie pǎpǎ, e e ore te uputa o te Apoo e upootia i nia i te reira.” Te parau ra Iesu e o ’na iho te patu i te hoê amuiraa, e aita to te Apoo e mana i nia i to ’na mau mero ia tapea ratou i to ratou haapao maitai i te fenua. Fafau atura oia ia Petero: “E horoa ’tu vau ia oe i te mau taviri o te Faatereraa arii o te ra‘i.”—Mataio 16:18, 19.

Aita Iesu i faateitei ia Petero i nia ’‘e i te mau aposetolo, aita atoa i faariro ia ’na ei niu no te amuiraa. O Iesu iho te Pǎpǎ i nia iho e patuhia ’i te amuiraa. (Korinetia 1, 3:11; Ephesia 2:20) E horoahia râ ia Petero e toru taviri. Tei ia ’na ra te haamaitairaa e iriti, ei auraa parau, i te ravea e ô ai te tahi mau pǔpǔ taata i roto i te Faatereraa arii o te ra‘i.

E faaohipa Petero i te taviri matamua i te Penetekose  33, a faaite ai i te ati Iuda e te feia o tei farii i te haapaoraa ati Iuda tei tatarahapa eaha te rave ia ora ratou. E faaohipa oia i te piti o te taviri no te iriti i te ravea e ô ai to Samaria e tiaturi ra ia Iesu i roto i te Faatereraa arii a te Atua. E i 36, e faaohipa Petero i te toru o te taviri ia fana‘o atoa to te mau nunaa ěê peritome-ore-hia, mai ia Korenelio e te tahi atu, i taua ravea ra.—Ohipa 2:37, 38; 8:14-17; 10:44-48.

A aparau ai ratou, ua horuhoru te mau aposetolo i to Iesu tohuraa i te mau mauiui e te pohe ta ’na e fatata i te faaruru i Ierusalema. No to ’na taa ore e e faatiahia Iesu no te ora i te ra‘i, aratai rii ê ihora Petero ia ’na e tama‘i atura: “E te Fatu, eiaha oe e na reira i te parau, e ore roa oe e roohia i teie mau mea.” Huri tua maira râ Iesu, e na ô ihora ia Petero: “Haere na muri mai ia ’u, Satani! E turoriraa oe no ’u, no te mea e ere to oe mana‘o i to te Atua, to te taata râ.”—Mataio 16:22, 23.

Pii atura Iesu i ta ’na mau aposetolo e te tahi atu, e faataa ’tura e e ere mea ohie ia riro ei pǐpǐ na ’na. Ua parau oia: “Te taata e hinaaro e pee mai ia ’u, ia haapae ïa ia ’na iho e ia rave i ta ’na pou haamauiuiraa, a pee noa mai ai ia ’u. O tei tapea hoi i to ’na ora, e ere ïa oia i te reira. O tei ere râ i to ’na ora no ’u nei e no te parau apî oaoa, e noaa faahou mai ïa ia ’na te reira.”—Mareko 8:34, 35.

No reira, ia fana‘o te mau pǐpǐ a Iesu i ta ’na farii maitai, ia itoito ïa ratou e ia ora i te hoê oraraa haapae e tia ’i. Parau atura Iesu: “Te taata hoi o te haama ia ’u e i ta ’u mau parau i roto i teie nei u‘i faaturi e te hara, e haama atoa ïa te Tamaiti a te taata nei ia ’na ia haere mai oia ma te hanahana o to ’na Metua e te mau melahi mo‘a.” (Mareko 8:38) Ia haere mai Iesu, “i reira oia e faautua ’i aore ra e haamaitai ai i te taata atoa ia au i ta ratou i rave.”—Mataio 16:27.