Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 56

Eaha mau te haaviivii i te taata?

Eaha mau te haaviivii i te taata?

MATAIO 15:1-20 MAREKO 7:1-23 IOANE 7:1

  • FAAHAPARAA IESU I TE TUTUU A TE TAATA

A piri mai ai te Pasa 32, mea rahi ta Iesu ohipa i te haapiiraa i te taata i Galilea. Haere atura oia i Ierusalema no te Pasa mai tei titauhia e te ture a te Atua ia Mose. Ua haapao maitai râ Iesu, te imi ra hoi te ati Iuda i te haapohe ia ’na. (Ioane 7:1) I muri iho, ho‘i maira oia i Galilea.

Eita e ore tei Kaperenaumi Iesu i te haereraa mai te mau Pharisea e papai parau ia ’na ra na Ierusalema mai. Eaha ratou i haere roa mai ai? No te imi i te tumu e pari ai ia Iesu i te hararaa i te pae faaroo. Ui maira ratou: “No te aha ta oe mau pǐpǐ e ofati ai i te tutuu a te feia no tahito ra? Eita ratou e horoi i to ratou rima ia tamaa ratou.” (Mataio 15:2) Aita te Atua i parau a‘enei i to ’na nunaa ia haapao i te tutuu e “horoi i to ratou na rima e tae roa ’tu i te poro rima.” (Mareko 7:3) No te mau Pharisea râ, e hara ia ore ia na reira.

Aita Iesu i pahono tia ’tu i teie pariraa, ua faaite râ oia e te ofati roa ra ratou i te ture a te Atua ia Mose: “No te aha outou e ofati ai i te mau faaueraa a te Atua no ta outou tutuu? Ua parau te Atua: ‘A faatura i to metua tane e to metua vahine,’ e ‘O tei faaino i to ’na metua tane aore ra metua vahine, ia haapohehia ïa.’ Outou râ, te na ô nei ïa: ‘Ia parau te hoê taata i to ’na metua tane aore ra metua vahine: “E ô pûpûhia i te Atua ta ’u mau mea atoa o ta ’u e nehenehe e faaohipa no te tauturu ia oe,” aita ïa e faufaa ia faatura oia i to ’na metua tane.’”—Mataio 15:3-6; Exodo 20:12; 21:17.

No te mau Pharisea, te moni, te faufaa aore ra te mau mea atoa i pûpûhia i te Atua, no te hiero ïa, e ere râ no te tahi atu ohipa. Te tanoraa râ, na te taata noa â te mea ta ’na i pûpû. Ei hi‘oraa, e nehenehe te hoê tamaiti e parau e e “korebana” ta ’na moni aore ra faufaa, oia hoi e ô pûpûhia i te Atua aore ra i te hiero, mai te huru ra e o te hiero te fana‘o i tera ô. E nehenehe noa oia e faaohipa i te reira no ’na iho, eiaha râ no te tauturu i to ’na na metua paari e te veve. Na reira ïa oia e matara ’i i ta ’na hopoia e aupuru ia raua.—Mareko 7:11.

Ua tano ïa Iesu i te ririraa i te taviriraahia te ture a te Atua ia Mose, e parau atura oia: “Ua haafaufaa ore ïa outou i te parau a te Atua na roto i ta outou tutuu. Haavarevare ma, ua tano Isaia i te tohuraa no nia ia outou, i to ’na parauraa: ‘Te faatura nei te vaha o teie mau taata ia ’u, tei te atea ê râ to ratou aau ia ’u. Mea faufaa ore to ratou haamori-noa-raa mai ia ’u, te haapii nei hoi ratou ia vetahi ê i te mau faaueraa a te taata.’” Aita i roaa i te mau Pharisea ia pahono i ta Iesu faahaparaa e ere mea faaherehere. Pii ihora Iesu i te nahoa ia tapiri mai, e na ô atura: “A faaroo mai e ia taa ia outou te auraa: E ere no ta te hoê taata e amu e viivii ai oia, no te mea râ e na roto mai i to ’na vaha e viivii ai oia.”—Mataio 15:6-11; Isaia 29:13.

I muri iho i roto i te hoê fare, ui maira te mau pǐpǐ ia Iesu: “Ua ite anei oe e ua inoino te mau Pharisea no ta oe i parau?” Pahono atura oia: “Te mau raau atoa e ere na to ’u Metua i te ra‘i i tanu, e iriti-tumu-hia ïa. Vaiiho noa ’tu ia ratou. E aratai matapo ratou. Ia aratai te hoê matapo i te tahi matapo, e topa ïa raua toopiti i roto i te apoo.”—Mataio 15:12-14.

E au ra e ua maere Iesu i te aniraa mai Petero no te mau pǐpǐ atoa i te haamaramaramaraa no nia i te mea e viivii ai te hoê taata. Pahono atura Iesu: “Aita outou i ite e te mau mea atoa e ô i roto i te vaha, e na roto atu ïa i te opu a faaruehia ’tu ai i te haumitiraa? Te mau mea râ e na roto mai i te vaha, no roto mai ïa i te aau, no taua mau mea ra e viivii ai te hoê taata. No roto mai hoi i te aau te mana‘o ino, te taparahi-pohe-raa, te faaturi, te mau peu taotoraa tia ore, te  eiâ, te parau haavare, te faaino. No teie mau mea e viivii ai te hoê taata. E ere râ no te tamaaraa ma te ore e horoi i te rima e viivii ai oia.”—Mataio 15:17-20.

Aita Iesu e parau ra e ere mea faufaa ia vai mâ noa, aore ra ia horoi i te rima hou a faaineine ai i te maa aore ra a tamaa ’i. Te faahapa ra râ oia i te huru haavarevare o te mau aratai haapaoraa o te imi ra i te na nia ’‘e i te mau ture parau-tia a te Atua na roto i te mau tutuu a te taata. Te parau mau râ, no roto mai i te aau te mau ohipa iino o te haaviivii i te hoê taata.