Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 35

Te a‘oraa i nia i te mou‘a matau-maitai-hia

Te a‘oraa i nia i te mou‘a matau-maitai-hia

MATAIO 5:1–7:29 LUKA 6:17-49

  • A‘ORAA I NIA I TE MOU‘A

Eita e ore e ua rohirohi Iesu i muri iho i to ’na pureraa i te Atua hoê po taatoa e to ’na maitiraa ananahi a‘e 12 pǐpǐ ei aposetolo na ’na. Te itoito noa ra â oia e te hinaaro ra â e tauturu i te taata. Ta ’na ïa i rave i nia i te hoê mou‘a i Galilea, e ere paha mea atea i Kaperenaumi, i reira to ’na raveraa i ta ’na taviniraa.

Haere maira te taata e rave rahi ia ’na no te mau vahi atea. No apatoa mai vetahi, no Ierusalema e te tahi atu mau vahi i Iudea. No apatoerau tooa o te râ mai te tahi atu, no Turia e no Sidona na oire i te hiti miti Mediteranea. Eaha ratou i haere mai ai e hi‘o ia Iesu? No te “faaroo ia ’na e ia ora to ratou mau ma‘i.” Tera iho â tei tupu, ua faaora Iesu i to ratou ma‘i. A feruri na! Ua ora paatoa to ratou ma‘i. Ua tauturu atoa Iesu i “te feia tei haamauiuihia e te mau varua viivii,” oia hoi te feia tei hautihia e te mau melahi ino a Satani.—Luka 6:17-19.

Itehia maira e Iesu te hoê vahi papu i nia i te mou‘a, e ruru maira te nahoa ati a‘e ia ’na. Eita e ore e to pihai iho roa ta ’na mau pǐpǐ, na 12 aposetolo iho â râ, ia ’na. Hinaaro rahi to ratou pauroa e faaroo i te haapiiraa a teie orometua o te nehenehe e rave i taua mau ohipa mana ra. Horoa ’tura Iesu i te hoê a‘oraa, aore ra oreroraa parau, e faufaa-mau-hia te feia e faaroo ra ia ’na, e e rave rahi atu â i muri mai. O tatou atoa te nehenehe, mea ohie hoi ia taa e mea maramarama te pue parau mau hohonu i vauvauhia. Ua faahiti Iesu i te mau tupuraa o te oraraa e ta te taata i matau. E taa ohie noa i te feia atoa e imi ra i te oraraa maitai a‘e ta te Atua e au, to ’na mau mana‘o. Eaha te mau mana‘o faufaa roa o ta Iesu a‘oraa?

O VAI TE OAOA MAU?

Pauroa te taata te hinaaro e oaoa. Haamata ihora Iesu i ta ’na oreroraa parau ma te faataa o vai te oaoa mau. Ua anaanatae roa te feia e faaroo ra ia ’na, ua maere râ i te tahi o ta ’na mau parau.

Na ô ihora Iesu: “E oaoa te feia e hiaai ra i te mau mea pae varua, no ratou hoi te Faatereraa arii o te ra‘i. E oaoa te feia e oto nei, no te mea e tamahanahanahia ratou. . . . E oaoa te feia e poia e poihâ ra i te parau-tia, e mâha hoi to ratou poia e poihâ. . . . E oaoa te feia tei hamani-ino-hia no te parau-tia, no ratou hoi te Faatereraa arii o te ra‘i. E oaoa outou ia faahapa, ia hamani ino e ia pari haavare te taata ia outou i te mau mea ino atoa no ’u nei. A oaoa e ia oaoa roa outou.”—Mataio 5:3-12.

Eaha tera “oaoa” ta Iesu e parau ra? E ere i te huru rearea aore ra ataata ia arearea ana‘e te taata. Mea hohonu atu â te oaoa mau, oia hoi te mauruuru mau e e auraa to te oraraa.

Te feia e oaoa mau ra ta Iesu e parau ra, o te feia ïa e hiaai ra i te mau mea pae varua, e oto ra no to ratou tiaraa taata hara, e tei ite o vai te Atua, a tavini atu ai ia ’na. Noa ’tu e mea hae na te taata ia ratou, aore ra te hamani-ino-hia ra ratou no te raveraa i te hinaaro o te Atua, te oaoa ra ratou no te mea ua ite ratou e te mauruuru ra Iehova ia ratou, e e haamaitai oia ia ratou i te ora mure ore.

 Mea rahi râ te mana‘o ra e e oaoa te taata i te tao‘a rahi e te mau mea navenave. Ua faahiti râ Iesu i te hoê parau taa ê roa o te haaferuri e rave rahi e faaroo ra ia ’na: “Ua ati . . . outou te feia tao‘a rahi, ta outou hoi e fana‘o nei, tera noa ïa te noaa ia outou. Ua ati outou tei paia, e poia hoi outou. Ua ati outou e ata nei, e oto e e ta‘i hoi outou. Ua ati outou ia arue te taata ia outou, ua na reira hoi to ratou mau tupuna i te mau peropheta haavare.”—Luka 6:24-26.

No te aha te feia e tao‘a rahi ta ratou, e ata ra e e aruehia ra e vetahi ê e roohia ’i i te ati? Te feia e fana‘o ra i teie mau mea e o te haafaufaa ra i te reira, eita ïa e tâu‘a roa i te taviniraa i te Atua, a ore atu ai e oaoa mau. Aita Iesu e parau ra e oaoa te hoê taata no to ’na veve aore ra to ’na poia. Pinepine râ, o te feia riirii te farii i ta Iesu mau haapiiraa, a oaoa mau atu ai.

Na ô atura Iesu: “O outou te miti o te fenua.” (Mataio 5:13) O ta ’na mau pǐpǐ ta ’na e mana‘o ra. Parau mau, e ere ratou i te miti. E faaohipahia râ te miti no te rapaau i te maa. I haapue-noa-hia na te miti i pihai iho i te fata i te hiero o te Atua no te tamiti i te mau tusia. E taipe atoa te reira o te oreraa e ino aore ra e pê. (Levitiko 2:13; Ezekiela 43:23, 24) E “miti o te fenua” te mau pǐpǐ a Iesu i roto i te auraa e e rapaau, aore ra e paruru, ta ratou pororaa i te taata ia ore ia mutu to ratou taairaa e o Iehova e ia ore to ratou haerea ia ino. E paruru iho â ta ratou poroi i te ora o te feia atoa e farii i te reira.

Na ô atoa ’tura Iesu i ta ’na mau pǐpǐ: “O outou te maramarama o teie nei ao.” Eita te hoê mori e tuuhia i raro a‘e i te hoê farii, i nia râ i to ’na vairaa e maramarama ’i te hoê vahi. Parau onoono atura Iesu: “Ia anaana atoa ïa to outou maramarama i mua i te taata, ia ite hoi ratou i ta outou mau ohipa maitatai, a faahanahana ’tu ai i to outou Metua i te ra‘i.”—Mataio 5:14-16.

TURE AVEIA FAUFAA NO TA ’NA MAU PǏPǏ

No te mau aratai haapaoraa ati Iuda, ua ofati Iesu i te ture a te Atua ia Mose e i opua a‘enei ratou e haapohe ia ’na. No reira Iesu i parau roa ’tu ai: “Eiaha outou e mana‘o e ua haere mai au e faaore i te ture a Mose e te mau papai a te mau  peropheta. Aita vau i haere mai no te faaore, ia tupu mau râ te reira.”—Mataio 5:17.

Mea faatura roa iho â Iesu i te ture a te Atua ia Mose e ua parau onoono oia ia vetahi ê ia na reira atoa. Ua na ô hoi oia: “No reira, te taata o te ore e auraro i te hoê parau iti haihai roa o teie mau faaueraa e o te haapii ia vetahi ê ia na reira atoa, e ore ïa e tia ia ’na ia ô i roto i te Faatereraa arii o te ra‘i. Area o te haapao i te reira e o te haapii i te taata ia na reira atoa, e ô ïa i roto i te Faatereraa arii o te ra‘i.”—Mataio 5:19.

Faahapa ’tura Iesu i te mau haerea e ofati ai te hoê taata i te ture a te Atua ia Mose. Faahiti ihora oia i ta te ture a Mose e parau ra “eiaha roa oe e taparahi pohe i te taata,” e na ô atura: “Te taata atoa o te riri tamau i to ’na taeae, e haavahia ïa.” (Mataio 5:21, 22) Mea ino roa ia riri tamau te hoê taata i te tahi atu, a tae roa ’i paha i te taparahi pohe ia ’na. Faataa ihora ïa Iesu i te faufaaraa ia faatupu i te hau: “No reira, ia hopoi oe i ta oe ô i te fata e haamana‘o ihora oe e ua inoino to taeae ia oe, a vaiiho i ta oe ô i mua i te fata e a haere e farerei i to taeae. Ia hau orua na mua e ho‘i mai ai oe e pûpû i ta oe ô.”—Mataio 5:23, 24.

Te opani ra te tahi atu faaueraa o te ture a Mose i te faaturi. Na ô ihora Iesu: “Ua ite outou e i parauhia na: ‘Eiaha roa oe e faaturi.’ Te parau atu nei râ vau e te taata atoa o te hi‘o noa i te hoê vahine a hinaaro atu ai ia ’na, ua faaturi ïa ia ’na i roto i to ’na aau.” (Mataio 5:27, 28) Aita Iesu e faahiti ra i te tahi noa mana‘o tia ore e puta mai. Tera râ, te faataa ra oia e mea ino roa ia “hi‘o noa” i te tahi taata, a hinaaro atu ai ia ’na. E ia tae i te hoê taime, e faaturi to muri mai. E nafea te hoê taata e paruru ai ia ’na? E titauhia ia haavî oia ia ’na iho. Ua parau Iesu: “No reira, te hapa ra oe no to oe mata atau, a paaro i to oe mata atau e a faarue atu. . . . Ia hapa atoa oe no to oe rima atau, a tâpû ê i te reira e a faarue atu.”—Mataio 5:29, 30.

Ia ora mai ratou, ua farii vetahi ia tâpûhia to ratou rima aore ra avae tei haapê. No reira Iesu i parau ai e mea titauhia ia “faarue” te hoê taata i te mau mea atoa noa ’tu e mea faufaa roa, mai te mata aore ra te rima, ia ore oia ia mana‘o noa i te mau peu taotoraa tia ore, a faaturi atu ai. Te faataa ra Iesu: “Mea maitai a‘e ia ere oe i te hoê mero o to oe tino i te hurihia to oe tino taatoa i Gehena” (te hoê vahi taninaraa pehu i rapaeau mai i te mau patu o Ierusalema), oia hoi te haamouraa mure ore.

Horoa atoa ihora Iesu i te a‘oraa e nafea tatou ia hapa mai e ia faaino mai vetahi ê. “Eiaha e aro i te taata ino,” ta ’na ïa e parau ra, “i tei poara mai râ i to papari‘a atau, a fariu atoa ’tu i te tahi atu papari‘a.” (Mataio 5:39) Aita e parauhia ra e eiaha te hoê taata e paruru ia ’na iho aore ra i to ’na utuafare ia rave-ino-hia ratou. Te faahiti ra Iesu i te hoê taata o te poara i te tahi atu, e ere  no te haamauiui aore ra no te haapohe atu, no te tuhi râ. Te parau ra Iesu e ia tamata te hoê taata i te imi hara aore ra i te mârô mai, ma te poara aore ra ma te tuhi mai, eiaha e faaho‘i atu.

Te tuati ra taua a‘oraa ra e te ture a te Atua e here i te taata tupu. No reira, a‘o ihora Iesu i te feia e faaroo ra ia ’na: “A here noa i to outou mau enemi e a pure noa no tei hamani ino ia outou.” Faataa ’tura oia eaha te tumu faufaa: “A riro atu ai outou ei tamarii na to outou Metua i te ra‘i, e faahiti hoi oia i to ’na mahana i nia i te feia ino e te feia maitai atoa.”—Mataio 5:44, 45.

Haapoto ihora Iesu i teie tuhaa o ta ’na oreroraa parau: “Ia tia roa hoi outou mai to outou Metua tia roa i te ra‘i.” (Mataio 5:48) Aita oia e parau ra e e nehenehe te taata e riro ei mea tia roa mai te Atua. Ma te pee râ i te hi‘oraa o te Atua, e nehenehe tatou e here atoa i to tatou mau enemi. Teie hoi tei parauhia: “A aroha hamani maitai noa, mai to outou Metua aroha hamani maitai.”—Luka 6:36.

PURE E TIATURI I TE ATUA

A tamau ai Iesu i te orero, faaitoito ihora oia i te feia e faaroo ra ia ’na: “A ara o te rave outou i te parau-tia i mua i te taata ia itehia mai outou.” Te faahapa ra Iesu i te feia e faahua tavini ra i te Atua, a na ô atoa ’i: “Ia horoa oe i te ô aroha hamani maitai, eiaha e faaoto na mua i te pu mai ta te feia haavarevare e rave nei.” (Mataio 6:1, 2) Mea maitai a‘e ia horoa i te ô aroha hamani maitai ma te ore e faaiteite.

Parau atura Iesu: “Ia pure atoa outou, eiaha mai ta te feia haavarevare. Mea au hoi na ratou e pure tia noa i roto i te mau sunago e i te mau maaraa purumu ia itehia mai ratou.” Na ô ihora oia: “Ia pure râ oe, a tomo i roto i to oe piha, a tapiri i te opani e a pure i to Metua i te ra‘i.” (Mataio 6:5, 6) Aita Iesu e faahapa ra pauroa te pure i mua i te taata, o ’na iho hoi tei na reira. Te faahapa ra oia i te mau pure ia faahiahia te taata e faaroo ra e ia haapopou mai ratou.

A‘o atura oia i te nahoa: “Ia pure oe, eiaha e tahana i te parau mai ta te feia o te mau nunaa ěê.” (Mataio 6:7) Aita Iesu e parau ra e eita e tano ia pure tamau no taua noa mea nei. Ta ’na e ore e farii, te tahanaraa ïa i te parau tei tamau-aau-hia. Faaite atura oia i te hoê hoho‘a pure e hitu aniraa to roto. Na aniraa matamua e toru, no nia ïa i te fariiraa i te tiaraa o te Atua e faatere e ta ’na mau opuaraa, oia hoi ia mo‘a to ’na i‘oa, ia tae mai ta ’na Faatereraa arii e ia tupu to ’na hinaaro. I muri iho noa tatou e ani ai i ta tatou maa i te mahana hoê e ia faaorehia ta tatou mau hara, oia atoa ia ore tatou ia tamatahia hau a‘e i ta tatou e nehenehe e faaruru e ia faaorahia tatou i te varua ino.

Eaha te faufaaraa o ta tatou mau tao‘a no tatou? Teie te a‘oraa a Iesu i te nahoa: “A faaea i  te haapue i te tao‘a na outou i te fenua nei, e pau hoi te reira i te manumanu, e pê i te tutae auri e e haruhia e te eiâ.” E a‘oraa tano roa teie. E nehenehe te mau tao‘a materia e mou, e e mou iho â. No te Atua, mea faufaa ore ia haapue i te reira. Na ô atura ïa Iesu: “A haapue râ i te tao‘a na outou i te ra‘i.” E na reira tatou ma te tuu i te taviniraa i te Atua i te parahiraa matamua o to tatou oraraa. Aita hoê a‘e taata e nehenehe e faaere ia tatou i to tatou roo maitai i te aro o te Atua, aore ra ta ’na haamaitairaa o te ora mure ore. E parau mau ïa ta Iesu: “Te vahi hoi to reira ta oe tao‘a, to reira atoa to oe aau.”—Mataio 6:19-21.

No te faataa maitai i teie mana‘o, horoa ’tura Iesu i te hoê faahoho‘araa: “Te mori o te tino, o te mata ïa. Ia hi‘o to oe mata i te hoê noa mea, e maramarama ïa to oe tino taatoa. Ia nounou râ to oe mata, e poiri ïa to oe tino taatoa.” (Mataio 6:22, 23) Mea maitai ana‘e to tatou mata, e au ïa te reira i te mori e turama ia tatou. Mea titauhia râ ia hi‘o to tatou mata i te hoê noa mea. Ia ore ana‘e, e nehenehe ta tatou huru hi‘oraa i te oraraa e hape. Te tiatonuraa i te mau tao‘a materia, eiaha râ i te taviniraa i te Atua, “e poiri ïa to [tatou] tino taatoa,” a hinaaro atu ai paha tatou i te mau mea tano ore aore ra ino mau.

Horoa ’tura Iesu i te hoê hi‘oraa puai mau: “E ore e tia i te hoê taata ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.”—Mataio 6:24.

Ua haapeapea paha vetahi e faaroo ra ia Iesu no ta ratou e hinaaro mau â i te pae materia. Haapapu atura oia e ia tuu ratou i te taviniraa a te Atua i te parahiraa matamua, eiaha ïa ratou e haapeapea. Na ô ihora oia: “A hi‘o maitai na i te mau manu o te reva. Eita ratou e ueue i te huero, e ooti e e haaputu i te maa. Teie râ, te faaamu ra to outou Metua i te ra‘i ia ratou.”—Mataio 6:26.

 E te mau tiare ïa i nia i te mou‘a to reira Iesu e te nahoa? Ua parau Iesu e “aita te ahu o te arii Solomona, noa ’tu to ’na unauna rahi, i hau a‘e i te nehenehe i to te hoê o teie mau tiare.” Eaha ïa te auraa? “Te faaahu nei te Atua i teie mau tiare, o te tupu nei i teie mahana, a hurihia ’tu ai ananahi i roto i te auahi. E hau atu â ïa oia i te faaahu ia outou!” (Mataio 6:29, 30) Horoa ’tura oia i teie a‘oraa paari: “Eiaha ïa outou e haapeapea, a na ô ai: ‘Eaha ta matou e amu, e inu aore ra e oomo?’ . . . Ua ite to outou Metua i te ra‘i e e hinaaro iho â outou i teie mau mea. No reira, a tamau i te imi na mua i te Faatereraa arii a te Atua e ta ’na parau-tia, e e horoahia mai teie mau mea atoa na outou.”—Mataio 6:31-33.

E NAFEA E NOAA ’I TE ORA?

Ua hinaaro te mau aposetolo e te tahi atu mau taata aau tae e ora ma te fariihia mai e te Atua, e ere râ mea ohie. Mea rahi hoi te Pharisea mea faaino e mea haava etaeta roa ia vetahi ê. No reira Iesu i a‘o ai i te feia e faaroo ra ia ’na: “A faaea i te haava ia ore outou ia haavahia, e haavahia hoi outou mai ta outou i haava ia vetahi ê.”—Mataio 7:1, 2.

Mea atâta ia pee i te huru faaino roa o te mau Pharisea, mai ta teie faahoho‘araa a Iesu e faataa ra: “E nehenehe anei te hoê matapo e aratai i te tahi atu matapo? E ore anei raua e topa i roto i te apoo?” E nafea ïa te feia e faaroo ra ia Iesu ia hi‘o ia vetahi ê? Eiaha ïa ma te faaino, e hapa ino mau hoi. Na ô atura Iesu: “E nafea e tia ’i ia oe ia parau i to taeae: ‘Taeae, vaiiho na ia ’u ia iriti i te raau hu‘a roa i roto i to oe mata,’ e aita hoi oe e ite ra i te pou i roto i to oe iho mata? Haavarevare! A iriti na mua i te pou i roto i to oe iho mata, e ite maitai ïa oe ia iriti i te raau hu‘a roa i roto i te mata o to taeae.”—Luka 6:39-42.

E ere te auraa e eiaha roa ’tu te mau pǐpǐ e hi‘o i te taata ma te haro‘aro‘a. Teie hoi ta Iesu i a‘o atu: “Eiaha e horoa i te mea mo‘a na te urî, eiaha atoa e hue i ta outou mau poe na te puaa.” (Mataio 7:6) Mea faufaa roa te pue parau mau o te Parau a te Atua, e au i te poe. Ia haa te tahi mau taata mai te animara ma te ore e haafaufaa i teie pue parau mau faufaa roa, ia vaiiho ïa te mau pǐpǐ ia ratou, a imi atu ai i te feia e farii i te parau mau.

A faahiti faahou ai Iesu i te pure, haapapu ihora oia i te faufaaraa ia tamau i te pure: “A tamau i te ani, e horoahia mai.” E pahono mai iho â te Atua, mai ta Iesu e haapapu ra: “O vai hoi o outou, ia ani mai ta ’na tamaiti i te faraoa, e horoa ’tu ïa i te ofai? . . . No reira, noa ’tu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa to outou Metua i te ra‘i i te horoa i te mau mea maitatai na te feia e ani atu ia ’na!”—Mataio 7:7-11.

Horoa ’tura Iesu i te hoê ture matau-maitai-hia no nia i te haerea: “Te mau mea atoa ïa ta outou e hinaaro ia rave te taata no outou, a rave atoa ïa no ratou.” Mea maitai ia haafaufaa e ia faaohipa tatou paatoa i teie a‘oraa tano. E ere râ mea ohie i te tahi taime, mai ta teie faaueraa a Iesu e faaite ra: “A tomo na te uputa pirihao, mea ateatea hoi te uputa e mea aano te e‘a e tae atu ai i  te haamouraa, e mea rahi o te na reira i te haere. Mea pirihao râ te uputa e mea ôaôa te e‘a e tae atu ai i te ora, e aita i rahi te taata o te ite atu i taua e‘a ra.”—Mataio 7:12-14.

Te vai ra o te tamata i te ume i te mau pǐpǐ ia faarue i te e‘a e tae atu ai i te ora. Faaara ihora ïa Iesu: “A ara i te mau peropheta haavare o te haere mai ia outou mai te mamoe ra te huru, area o roto ra, e luko taehae ïa.” (Mataio 7:15) Parau atura Iesu e i te hotu e itehia ’i te tumu raau maitai e te tumu raau ino. Hoê â huru no te taata. E itehia o vai ma te mau peropheta haavare i ta ratou mau haapiiraa e ohipa. Mai ta Iesu iho â i faataa, e ere noa i te parau a te hoê taata e itehia ’i e e pǐpǐ o ’na na Iesu, i ta ’na atoa râ ohipa. Te parau nei vetahi e o Iesu to ratou Fatu, aita râ ratou e rave ra i te hinaaro o te Atua. Na ô atura Iesu: “Teie ïa ta ’u e parau atu ia ratou: ‘Aore roa vau i ite ia outou! Haere ê atu, outou e ofati nei i te ture!’”—Mataio 7:23.

Faaoti ihora Iesu i ta ’na oreroraa parau: “O te faaroo i ta ’u i parau mai nei e o te haapao atu, e au ïa oia i te hoê taata paari tei faatia i to ’na fare i nia i te pǎpǎ. Mairi ihora te ûa, tahe maira te pape pue, farara a‘era te mata‘i i nia i taua fare ra, aita râ i parari no te mea ua haamauhia i nia i te pǎpǎ.” (Mataio 7:24, 25) No te aha te fare i tia noa ’i? No te mea ua “ô [taua taata ra] i te hoê apoo hohonu e tae roa ’tu i te pǎpǎ, a haamau atu ai i te niu i reira.” (Luka 6:48) Eita ïa e navai noa ia faaroo i ta Iesu mau parau. E titauhia ia tutava tatou i te “haapao atu.”

E te taata e “faaroo i ta [Iesu] i parau mai nei,” “o te ore [râ] e haapao atu”? “E au ïa oia i te taata maamaa tei faatia i to ’na fare i nia i te one.” (Mataio 7:26) E parari taua fare ra i te ûa, te pape pue e te mata‘i.

I roto i teie oreroraa parau, ua maere te nahoa i ta Iesu huru haapiiraa, mai te hoê taata e mana to ’na no ǒ mai i te Atua, eiaha mai te mau aratai haapaoraa. Peneia‘e ua riro mai e rave rahi o tei faaroo ia ’na ei pǐpǐ na ’na.