Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 134

Ua tia mai Iesu!

Ua tia mai Iesu!

MATAIO 28:3-15 MAREKO 16:5-8 LUKA 24:4-12 IOANE 20:2-18

  • FAATIAHIA MAI IESU MAI TE POHE MAI

  • OHIPA I TUPU I TE MENEMA O IESU

  • FARAA ’TU IESU I E RAVE RAU VAHINE

Horuhoru ihora na vahine i to ratou iteraa e aita faahou to Iesu tino i roto i te menema. Horo ihora Maria Magadala ia “Simona Petero ra e i te tahi atu pǐpǐ mea here na Iesu,” te aposetolo Ioane. (Ioane 20:2) Ite a‘era râ te tahi atu mau vahine i faaea ’tu i te menema i te hoê melahi. E melahi atoa to roto mai, “e ahu roa uouo to ’na.”—Mareko 16:5.

Na ô atura hoê o na melahi: “Eiaha e mehameha. Ua ite au e te imi nei outou ia Iesu no Nazareta, tei haapohehia i nia i te pou. Ua faatiahia mai oia, aita oia i ǒ nei. A hi‘o i te vahi i vaiihohia ’i to ’na tino. A haere râ e parau i ta ’na mau pǐpǐ e ia Petero: ‘Te na mua ’tu ra oia ia outou i te haere i Galilea.’” (Mareko 16:6, 7) Horo a‘era na vahine “ma te rûrû e te maere rahi” e faaara i te mau pǐpǐ.—Mareko 16:8.

I te itearaa mai ia Maria Petero raua Ioane, na ô atura oia a paupau ai te aho: “Ua hopoi-ê-hia te Fatu mai roto atu i te menema, e aita matou i ite ihea o ’na i te tuuraahia.” (Ioane 20:2) Horo a‘era Petero raua Ioane i te menema. O Ioane tei tae na mua, mea vitiviti a‘e hoi oia ia Petero. Na rapaeau noa to ’na fâaoraa i roto e iteraa i te ahu lino.

I to Petero iho â taeraa ’tu, tomo ihora oia i roto, e ite atura i te ahu lino e te ahu i vehîhia ’i to Iesu upoo. Tomo atoa ihora Ioane e tiaturi ihora i ta Maria i parau. Noa ’tu ta Iesu i parau na mua ’tu, aita raua i taa noa ’‘e e ua faatiahia mai oia. (Mataio 16:21) Ho‘i ihora Petero i ǒ ’na e Ioane i ǒ ’na ma te taa ore. O Maria râ, tei ho‘i mai i te menema, faaea noa ihora ïa i reira.

Area te tahi atu mau vahine, ua haere ïa e faaara i te mau pǐpǐ e ua faatiahia mai Iesu. A horo noa ’i ratou, farerei maira ratou ia Iesu e na ô  atura Iesu eiaha ratou e mǎta‘u, ia haere râ e faaara i ta ’na mau pǐpǐ ia haere i Galilea, i reira ratou e farerei ai.—Mataio 28:9, 10; Luka 24:8-10.

I te aueueraa te fenua e te faraa mai na melahi i te menema, “rûrû a‘era” te mau faehau “e riro atura mai te taata pohe.” I te ho‘iraa mai to ratou hiroa, tomo a‘era ratou i te oire e “faatia ’tura i te mau tahu‘a tiaau i te mau mea atoa i tupu.” Putuputu a‘era te mau tahu‘a e te mau aratai ati Iuda, faaoti a‘era e peta i te mau faehau ia huna i te ohipa i tupu e ia parau: “Ua haere mai ta Iesu mau pǐpǐ i te po e ua eiâ i to ’na tino a taoto noa ’i matou.”—Mataio 28:4, 11, 13.

Ia taoto noa ’tu te mau faehau Roma i ta ratou ohipa tiairaa, e nehenehe ratou e haapohehia. Na ô atura ïa te mau tahu‘a: “Ia tae noa ’tu teie parau [ta ratou haavare e ua taoto ratou] i te tari‘a o te tavana, eiaha outou e haapeapea, na matou e faataa ’tu ia ’na.” (Mataio 28:14) Rave a‘era te mau faehau i te moni e parau haere a‘era i tei faauehia ’tu e te mau tahu‘a. Atutu atura i rotopu i te ati Iuda te parau haavare ua eiâhia to Iesu tino.

Te ta‘i noa ra Maria Magadala. A fâao ai oia i roto i te menema, ite ihora oia e piti melahi ahu uouo e parahi ra i te vahi i tuuhia ’i to Iesu tino, hoê i te pae upoo e hoê i te pae avae. Ui maira raua: “No te aha oe e ta‘i ai?” Pahono atura oia: “Ua ravehia to ’u Fatu e aita vau i ite ihea o ’na i te tuuraahia.” Hi‘o a‘era oia i muri e ite ihora i te hoê taata tei ui atoa mai: “No te aha oe e ta‘i ai? O vai ta oe e imi nei?” Mana‘o ihora Maria e o te taata tamâ aua e na ô atura: “Mai te peu e na oe i hopoi ê ia ’na, faaite mai ïa ihea to oe tuuraa ia ’na, e rave hoi au ia ’na.”—Ioane 20:13-15.

O Iesu hoi tei faatiahia mai ta Maria e paraparau atu ra. Aita â râ oia i ite atura. I to Iesu râ parauraa, “Maria!” taa ihora ia ’na o Iesu teie na nia i ta ’na huru paraparau. Na ô atura Maria ma te oaoa: “Raboni!” (“Orometua!” te auraa.) No to ’na râ taiâ a‘unei oia e reva ’i i te ra‘i i taua taime ra, haru ihora oia ia Iesu. Parau maira Iesu: “A faaea na i te turui noa i nia ia ’u. Aita â hoi au i haere atura i nia i te Metua ra. A haere na râ i to ’u mau taeae ra e a parau atu: ‘Te haere nei au i nia i to ’u Metua ra e to outou Metua e i to ’u Atua e to outou Atua.’”—Ioane 20:16, 17.

Horo ihora Maria i te vahi i putuputu ai te mau aposetolo e te tahi atu mau pǐpǐ. Na ô atura oia ia ratou: “Ua ite au i te Fatu!” Ua faarooroo a‘enei hoi ratou i te faatiaraa a te tahi atu mau vahine. (Ioane 20:18) No ratou râ, “aita e auraa to teie mau parau.”—Luka 24:11.