Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 130

Tuuraahia Iesu ia haapohehia e aratairaahia e haapohe

Tuuraahia Iesu ia haapohehia e aratairaahia e haapohe

MATAIO 27:31, 32 MAREKO 15:20, 21 LUKA 23:24-31 IOANE 19:6-17

  • IMIRAA PILATO I TE TUU IA IESU

  • FAAUTUARAAHIA IESU E ARATAIRAAHIA E HAAPOHE

Noa ’tu ua hamani-ino-hia e ua faaooohia Iesu, e te imi noa ra Pilato i te tuu ia ’na, aita te mau tahu‘a tiaau e te feia e turu ra ia ratou i fati. Ua hinaaro iho â ratou ia pohe Iesu, a tuô noa ’i: “I nia i te pou! I nia i te pou!” Pahono atura Pilato: “Na outou iho e rave ia ’na no te haapohe atu, aita hoi e tumu e faautua ’i au ia ’na.”—Ioane 19:6.

Aita Pilato i tiaturi i te mau ati Iuda e parau ra e mea tano ia haapohehia Iesu no te mea ua orure oia i te Hau Roma. E ere anei râ e ua hara Iesu i te pae o te haapaoraa? Pari atura ïa ratou ia Iesu i te faaino i te Atua, te parau atoa i parihia ’i Iesu i mua i te Sunederi. Na ô atura ratou: “E ture ta matou, e ia au i ta matou ture, ia pohe oia e tia ’i, no te mea ua parau oia e e tamaiti oia na te Atua.” (Ioane 19:7) A tahi ra Pilato a faaroo ai i teie pariraa.

Ho‘i atura oia i roto i to ’na aorai, e imi atura i te hoê ravea e tuu i teie taata tei hamani-ino-hia, ta ta ’na hoi vahine i moemoeâ. (Mataio 27:19) Eaha ’tura no teie pariraa a te ati Iuda e o “te Tamaiti a te Atua” teie taata tei tapeahia? Ua ite Pilato e no Galilea mai Iesu. (Luka 23:5-7) Ui noa ’tura râ oia ia Iesu: “Nohea mai oe?” (Ioane 19:9) Ua mana‘o anei Pilato e peneia‘e i ora na Iesu na mua ’‘e mai te hoê atua ra te huru?

Na Iesu iho i parau ia Pilato e e arii o ’na, e ere râ ta ’na Faatereraa arii no teie nei ao. Mamû noa ’tura Iesu, aita hoi e faufaa ia tatara ’tu â i ta ’na i parau a‘enei. Puta roa ihora Pilato aita hoi Iesu i hinaaro e pahono, e parau iria maira: “Eita oe e pahono mai? Aita oe i ite e e mana to ’u no te tuu ia oe aore ra no te haapohe ia oe?”—Ioane 19:10.

Parau noa ’tura Iesu: “Aita to oe e mana i nia ia ’u mai te peu aita taua mana ra i horoahia mai ia oe ra e te Atua. No reira, te taata tei tuu ia ’u ia oe ra, e hara rahi a‘e ïa ta ’na.” (Ioane 19:11) Aita Iesu e mana‘o ra i te hoê noa taata, ia Kaiapha râ, te feia i turu ia ’na, e Iuda Isakariota. E utua rahi a‘e ta ratou i ta Pilato.

Ua maere Pilato i te huru o Iesu e ta ’na mau parau. Rahi noa ’tura ïa to ’na mǎta‘u e atua paha Iesu. Imi faahou atura oia i te hoê ravea no te tuu ia ’na. Faahiti maira râ te nahoa i te hoê parau ta Pilato i mǎta‘u na. Patiatia maira ratou: “Ia tuu oe i tena taata, e ere ïa oe i te hoa no Kaisara. Te taata o te faaarii ia ’na iho, te patoi ra ïa ia Kaisara.”—Ioane 19:12.

Aratai faahou maira te tavana ia Iesu i rapaeau, parahi ihora i te vahi haavaraa, e parau atura i te nahoa: “Teie to outou arii!” Aita râ te nahoa na te mǎrû, tuô maira ratou: “Haapohe ia ’na! Haapohe ia ’na! I nia i te pou!” Taparu atura Pilato: “E haapohe au i to outou arii?” Mea au ore na te ati Iuda te faatereraa Roma. Haapapu noa maira râ te mau tahu‘a tiaau: “O Kaisara to matou arii, aita ’tu.”—Ioane 19:14, 15.

No te taiâ, fati ihora Pilato no te onoono o te nahoa, e tuu atura ia Iesu ia haapohehia. Tatara ’tura te mau faehau i te ahu vareau o Iesu e faaahu ihora ia ’na i to ’na ahu tapo‘i. A aratai-ê-hia ’i Iesu, na ’na iho i amo i ta ’na pou haamauiuiraa.

Fatata i te avatea taua Mahana pae ra 14 no Nisana, aita Iesu i taoto mai inanahi mai, e ua faaruru oia i te mauiui rahi. A tautoo noa ’i oia i te amo i te pou, te iti roa ra to ’na puai. Faaue atura te mau faehau i te hoê taata na pihai iho mai, o Simona no Kurene i Afirika, ia amo i te pou i te vahi haapoheraa. E rave rahi te na muri atu ra, te tupaipai ra vetahi i to ratou ouma ma te oto, a ta‘i noa ’i.

 Parau atura Iesu i te mau vahine e oto ra: “Tamahine ma no Ierusalema, a faaea na i te ta‘i no ’u. A ta‘i râ no outou iho e no ta outou mau tamarii. Inaha hoi, te piri mai ra te mau mahana e na ô ai te taata: ‘E oaoa te mau vahine eita ta ratou tamarii e noaa, te mau vahine aita i fanau, e te mau vahine aita ta ratou e aiû!’ I reira ïa te taata e parau ai i te mau mou‘a: ‘A mairi mai i nia ia matou!’ e i te mau aivi: ‘A tapo‘i mai ia matou!’ I te mea e e tupu te reira e mea ota te raau, mai te aha ïa te huru ia mǎrô te raau?”—Luka 23:28-31.

O te nunaa ati Iuda ta Iesu e parau ra. E au ratou i te hoê tumu e pohe ra mea ota rii â te raau, te ora noa ra hoi Iesu e e rave rahi ati Iuda o te tiaturi ra ia ’na. Ia pohe râ Iesu e ia faarue ta ’na mau pǐpǐ i te haapaoraa ati Iuda, e mǎrô te nunaa i te pae varua mai te hoê tumu raau pohe. Ia faaohipa te Atua i te nuu Roma no te haamou i tera nunaa, mea rahi te ta‘i!