Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 124

Tuuraahia te Mesia i te enemi e tapearaahia

Tuuraahia te Mesia i te enemi e tapearaahia

MATAIO 26:47-56 MAREKO 14:43-52 LUKA 22:47-53 IOANE 18:2-12

  • TUURAA IUDA IA IESU I TE ENEMI I TE Ô I GETESEMANE

  • MUTU-Ê-RAA TE TARI‘A O TE HOÊ TAATA IA PETERO

  • TAPEARAAHIA IESU

Ua mairi roa te tuiraa po. Ua tu te mana‘o o te mau tahu‘a e aufau ia Iuda 30 moni ario no te tuu ia Iesu i to ratou rima. Aratai ihora Iuda i te hoê nahoa tahu‘a tiaau e Pharisea e imi ia Iesu. Ua apee atoa mai te tahi mau faehau Roma e mauhaa tama‘i ta ratou e te hoê raatira nuu.

Papu roa e i to Iesu tuuraa ia Iuda ia haere, ua haere tia ’tu Iuda i te mau tahu‘a tiaau. (Ioane 13:27) Haaputuputu maira ratou i ta ratou iho mau tiai e te tahi pǔpǔ faehau. Ua aratai na mua paha Iuda ia ratou i te piha i reira Iesu e ta ’na mau aposetolo i faatupu ai i te Pasa. Haere atura ratou pauroa i te ô i Getesemane i te tahi atu pae o te peho no Kiderona. E mauhaa tama‘i ta ratou e te mori. Ua hinaaro iho â ratou ia itehia mai Iesu.

A aratai ai Iuda i taua nahoa ra na nia i te mou‘a Oliveta, ua papu ia ’na ihea e imi ai ia Iesu. I te hebedoma na mua ’tu, a haere ai Iesu e te mau aposetolo na Betania ’tu i Ierusalema e a ho‘i atu ai i Betania, pinepine ratou i te faaea i te ô i Getesemane. I teie nei râ e po, mea poiri na taua vahi ra. Mea nafea ïa to te mau faehau iteraa o ’na tera, aita hoi ratou i ite a‘enei ia ’na? Na Iuda i horoa i te tahi tapao: “Te taata ta ’u e apa, o ’na ïa, a haru ia ’na e a arato atu eiaha ia ora.”—Mareko 14:44.

A tomo ai ratou i roto i te ô, ite ihora Iuda ia Iesu e ta ’na mau aposetolo e haere tia maira ia ’na. Na ô maira oia: “Ia ora na Rabi!” e apa ihora ia ’na. Parau atura Iesu: “Eaha ta oe ohipa i ǒ nei?” (Mataio 26:49, 50) Pahono atura oia i ta ’na iho uiraa: “Iuda, te tuu ra oe i te Tamaiti a te taata nei i to ’na mau enemi ma te apa?” (Luka 22:48) Aita ’tura oia i haapao faahou i tei tuu ia ’na i te enemi.

Tapiri atura Iesu i te feia e tapea ra i te mori e ui atura: “O vai ta outou e imi nei?” Pahonohia maira: “O Iesu no Nazareta.” Na ô atura oia ma te taiâ ore: “O vau ïa.” (Ioane 18:4, 5) Marua ihora taua mau taata ra no te ite ore eaha te tupu.

Aita Iesu i mana‘o noa ’‘e e horo na roto i te poiri, ua ui faahou râ o vai ta ratou e imi ra. I to ratou parau-faahou-raa mai “O Iesu no Nazareta,” na ô atura oia ma te mǎrû: “Ua parau atu hoi au e o vau. O vau ta outou e imi nei, a tuu ïa ia ratou ia haere.” I teie atoa taime faufaa, ua haamana‘o oia i ta ’na i parau a‘ena, ia ore roa oia ia mo‘e i te hoê a‘e o ta ’na mau pǐpǐ. (Ioane 6:39; 17:12) Ua paruru noa na Iesu i ta ’na mau aposetolo haapao maitai e aita hoê noa ’‘e i mo‘e, “hoê ana‘e râ te taata o te haamouhia,” o Iuda. (Ioane 18:7-9) No reira oia i ani ai ia tuu i ta ’na mau pǐpǐ taiva ore ia haere.

Tia maira te mau faehau e haere maira ia Iesu. Taa ihora i te mau pǐpǐ te ohipa e tupu ra e ui maira: “E te Fatu, e tairi anei matou ia ratou i te ‘o‘e?” (Luka 22:49) Hou Iesu a pahono atu ai, huti maira Petero hoê o na ‘o‘e ta te mau aposetolo i rave mai, tairi ihora ia Malako, te tavini a te tahu‘a rahi, e mutu ê ihora to ’na tari‘a atau.

Tapea ihora Iesu i te tari‘a o Malako e ora ihora. Horoa ’tura oia i te hoê haapiiraa faufaa, a faaue ai ia Petero: “A faaho‘i i ta oe ‘o‘e i roto i te vehî, te feia atoa hoi e rave i te ‘o‘e, e pohe ïa i te ‘o‘e.” E vaiiho oia ia tapeahia oia, ua parau hoi oia: “E nafea ’tura ïa e tupu ai te mau Papai, o tei faaite e ia tupu te reira e tia ’i?” (Mataio 26:52, 54) Na ô faahou atura oia: “Te au‘a ta te Metua i horoa mai, eiaha ïa vau e inu?” (Ioane 18:11) E farii iho â oia i to te Atua hinaaro no ’na, e tae roa i te pohe.

Ui atura Iesu i te nahoa: “Ua haere mai outou e tapea ia ’u ma te ‘o‘e e te raau mai te mea ra e e eiâ vau? I tia noa na hoi au i te mau mahana  atoa i te hiero a haapii ai i te taata, aita râ outou i haru ia ’u. Ua tupu teie mau mea atoa ia tupu hoi ta te mau peropheta i papai.”—Mataio 26:55, 56.

Haru a‘era te mau faehau, te raatira o te nuu e te mau tiai a te ati Iuda ia Iesu e taamu ihora i to ’na na rima. I te iteraa mai te mau aposetolo, horo a‘era ratou. Area “te hoê taata apî,” te pǐpǐ Mareko paha, faaea noa ihora ïa i rotopu i te nahoa no te pee ia Iesu. (Mareko 14:51) Ua itehia râ oia, e tamata a‘era te nahoa i te haru ia ’na, o tei faarue atu i to ’na ahu lino a horo ai.